semo inte la època de le spesialisasion. Al de sora de qualunque culto, relijoso o pagan, regna sovran el culto dei culti, el culto de la spesialisasion.
La spesialisasion la xe indispensàbile inte na società altamente conplessa come queła atual, na società industrial in senpre pì ràpida tecnolojisasion. Ghe xe senpre pì funsion da incarnar, par far funsionar la senpre pì conplessa màchina de la società umana, e ogni funsion la genera prima o po' una o pì sub-funsion che a la so volta łe se riprodurà in na ramificasion sensa fine, almanco dal atual ponto de vista nostro. Ghe vol spesialisti senpre pì conpetenti a saver far na senpre minor parte del insieme de le robe da far.
Sta corsa a la spesialisasion la sta canbiando l'umanità asè pì de quanto altri eventi i la àbia canbià inte i sècoli pasà.
Tute le istitusion scolàstiche łe persegue la produsion de individui spesialisà in qualcosa, el che implica che lori i gavarà necesariamente da ignorar tuto el resto. La regina de le mercansie che l'università la insegna, inte la società nostra, la xe la ilusion de insegnar qualcosa de significativo. In realtà la insegna soltanto qualcosa de ùtile, quando va ben. Mai o quasi qualcosa de realmente significativo in un senso pì anpio.
El saver uman el crese de fato con cresente crésita, se me consentì un bìstico verbal, a na velocità superior a queła che sarìa necesaria al faraginoso sistema universitario par adeguarse a le nove proprietà che sto saver el asume. Inte le università i insegna dosenti che i ga studià vari deceni fa queło che ancora deso i insegna, e la esplosiva crésita de le umane nosion che la contradistingue sta època de la aventura umana la rende presto fatalmente obsolete quando no paleolìtiche le credense culturali de chi, tropo ocupà a insegnar in càtedra, el se ga desmentegà de continuar a inparar queło de novo che'l xe stà edificà sora el vecio.
Le università łe xe cussì pì che altro atroci palestre de conformismo, situà inte'l pasà remoto del mejor momento cultural atual, che łe sforna par el pì idioti programà a eseguir na pìcola classe de funsion conplesse, convinti de èserse fati na cultura, e cussì paradossalmente pì ignoranti del ignorante che almanco la so ignoransa no la ignora. Come el ga dito Graciàn Y Morales, inte'l cèlebre best seller so "El Criticòn" quatro sècoli fa: "El primo paso verso la ignoransa el xe presùmer de saver, e asè i savarìa se no i pensase de saver." E se no ve basta Graciàn Y Morales, che dito tra noaltri no go la mìnima idea de chi'l sia, ghe meto dentro Goethe, a serti de noaltri pì familiar, el qual invese el ga dito (tra l'altro): "Gnente el xe pì terìbile de na ignoransa ativa." Secondo M. de Montaigne, invese, "La ignoransa che se cognosse, se júdica e se condana no la xe na intiera ignoransa: parché la lo sia, ghe vol che la ignora se stesa.", e Gigi Picetti el aserisse che "Pì crese la conossensa coletiva pì se riduse queła individual.", mentre Socrate, pì crìpticamente el sostegneva: