par i to spetatori pì pìcoli, ancuo te conto na fàvola, la fàvola de la Creatura Sfortunà.

Ghe gera na volta na creatura sfortunà, che la vardava senpre la television. La matina la ndava a scola, come tute le creature de la so età, ma el dopopranzo la se piasava senpre davanti a la television e no la se moveva pì, fin a quando el gera l'ora de ndar a leto.
Dato che la vardava senpre la television, sta creatura sfortunà no la gaveva amici, fora quei che i stava drento la television. Eła la gera convinta de aver tanti amici, parché la television la gera tuta piena de sinpàtiche persone che łe pareva propio so amici. Ghe gera tanti tanti cartoni, e i gera tuti so amici. Purtropo però la creatura sfortunà la se sentiva l'isteso asè soła, anca se la gaveva tuti quei strani amici drento la television. Questa la gera la prima de le so sfortune.
A scola le altre creature łe ghe contava che'l dì prima i gaveva zogà tuto el dopopranzo. E la creatura sfortunà la rispondeva che eła no la gaveva zogà, ma che la gaveva vardà i so amici drento la television a zogar par eła. Quando le creature no sfortunà łe ndava la doménega dopopranzo in bicicleta, la creatura sfortunà la vardava invese qualche figura che la ndava in bicicleta drento la television.
La so conpagna de banco la ghe diseva senpre quanto la se divertiva a zogar co le so nove banbole. Queła creatura sfortunà no la se divertiva a zogar co le so nove banbole, parché no la gaveva tenpo. La pasava de fato tuto el so tenpo a vardar le creature drento la television a zogar co le so nove banbole.
Xe pasà i ani, e la creatura sfortunà la cresseva, ma la restava senpre na creatura, anca se cressùa, e senpre sfortunà. Le altre creature łe se ricordava de quando łe gera stà pì pìcole, e ne parlava tra lori. La creatura sfortunà no la riusiva a ricordarse de quando la gera stà pì pìcola, parché la se ricordava soltanto de quando i gera stà pì pìcoli tuti i so amici drento la television. Quando a scola la contava qualcosa a le altre creature no sfortunà, la podeva senpre contar soło queło che la gaveva visto drento la television, parché inte la so vita no la gaveva mai visto altro. "Te piaze pasegiar drento el bosco?" ghe domandava ogni tanto un conpagno.
E la creatura sfortunà la rispondeva: "Al Grande Pufo ghe piaze asè pasegiar drento el bosco". Po' la zontava "A Capuseto Roso anca, ma la ga da star atenta al Lovo." Ma eła no la ghe gera mai stà drento el bosco.
Anca a Nadal, la creatura sfortunà la gera sfortunà, parché le altre creature łe contava dei bei regali che i gaveva ricevù da Babo Nadal che'l gera intrà de scondon drento le so case, e eła invese la se ricordava soltanto dei bei regali che le creature drento la television łe gaveva ricevù da Babo Nadal che'l gera intrà mia tanto de scondon drento la Television.
Xe pasà altri ani, e la creatura sfortunà la gera senpre na creatura, anca se senpre pì cressùa, e senpre pì sfortunà.
No la se ricordava de fato gnente, de tuti i ani che i gera pasà, ma la se ricordava soltanto queło che la gaveva visto in television. No la se ricordava gnanca pì come i gera fati i so genitori, parché no i apareva mai in television e alora eła no la li vardava, e alora dopo un poco anca lori i gaveva finìo de vardar eła.
"Poareta mi!" la se ga dito un dì la creatura sfortunà "No me ricordo pì gnanca come xe fata mia mama!"
La ga provà alora a no vardar la television par véder la so mama, ma no la ghe riusiva. Da tute le parti la vardava, la vedeva soltanto la television. La se gera abituà a vardarla cussì tanto che ormai no la vedeva pì gnente altro. Anca a scola, tute le so conpagne łe xe sparìe davanti ai so oci, sostituìe da tante pìcole television che łe saltelava qua e là. La maestra la se ga trasformà in un grando grando televisoron con dentro soltanto la fàcia de na strega che la ghe sgridava de continuo.
"Poareta mi!" la se diseva la creatura sfortunà "Son senpre pì sfortunà! Oh, come vorìa finir de vardar senpre la television!"
Ma el gera ahimè tropo tardi! Ormai eła la gera par senpre na vìtima de la television! No la gaveva pì so pensieri, ma soło pensieri che la television la gaveva meso drento de eła. No la gaveva so ricordi, ma soło ricordi provenienti da la television.
Po' un dì la creatura sfortunà la ga perso anca el so nome, e xe par questo che'l so nome no'l apare in sta fàvola. Nissuna de le persone che łe apareva drento la television la gaveva mai pronunsià el so nome, e alora eła la lo gaveva desmentegà.
Quando un dì la creatura sfortunà la xe sparìa, nissun se ne ga incorto, gnanca eła, dato che eła la se incorzeva soltanto de le robe che łe suzedeva drento la television, e drento la television eła no la gera mai sparìa dato che no la ghe gera mai gnanca aparìa.
Nissun ancuo se ricorda pì de la poareta creatura sfortunà che la vardava tropo la television.
Nissun fora la persona bona che la ga scrito sta fàvola par salvar tute le creature che łe varda tropo la television invese de divertirse zogando come se deve, e i rìsega cussì anca lori de sconparir dal mondo, come la creatura sfortunà che ancuo nissun se ricorda pì.

Roberto Quaglia