 |
           | |
Parra d’a saggiu a n’ignoranti e iddu dirà ca hai pocu sennu.
EURIPIDE
|
 |
 Caro Maurizio Costanzo Show,
 "
Li università custruìscinu li accussì ditti eruditi, li parti custituenti la Granni Màchina Dû Sapiri Umanu. Sti parti su’ pruggittati pi addivintari ingranaggi microscòpici dâ Granni Màchina, e tali addivèntanu. La Granni Màchina è cecata, puru ntâ sò crescenti Moli & Cumplissità. ’N nudda dî università dâ Granni Màchina veni pirsiguitu lu sapiri pû sapiri, pi custruiri accussì ingranaggi (eruditi) ca esplòrinu e capiscianu lu significatu dû ’nsemi dî ingranaggi. Facitimi l’esempiu di ’na università ca custituisca ’na eccezzioni, e ju vi dimustrirò ca siti ’n erruri, pirchì è propriu ntâ impustazioni statica ’mmeci ca dinàmica, burocratica, fundamintalmenti cunservatrici di qualsiasi istituzioni universitaria ca li fruntieri dâ vera istruzioni hannu lu sò lìmiti e lu prugressu mintali s’arresta o comunqui rallenta.
Si quarchidunu ’mpara a pinsari, a scola o ntâ università, nun è ’n virtù ma a dispiettu dî ’nsignamenti ca ricivi. Fora furmidabbili eccezzioni, ogni prufissuri nun ’nsigna a pinsari ’n sé, ma a pinsari comu a sé.
Sta cunsuetudini, di parti di cu’ ’nsigna, di perpetuari li propri lìmiti, flagella unni sia ogni categurìa scolastica. Ntê patetichi accademii di arti nun è l’arti a essiri ’nsignata, ma lu scimmiottamentu dî prifirenzi stilistichi di cu’ ’nsigna. Farsesca è la omogeneità dî prudutti pittòrici dî allievi di ’na accademica, "casualmenti" ’n sintunìa cî gusti di prufissuri ca cassannu cu’ diverga dî stereòtipi a iddi cari accídinu automàticamenti ogni putinziali autènticu artista.
Ntê tristi scoli di ricitazioni di teatri stàbbili o instàbbili, li aspiranti atturi vèninu omogeneizzati fina a divintari tutti grotteschi fotocopii di nu stissu stereòtipu. Li puvireddi e li puvireddi, spugghiati di ogni individualità, rivistuti sulamenti cû certificatu di atturi e di attrici, su’ custritti pû restu dâ sò vita a parrari la lingua italiana cu ’na dizioni assurda, fora dû usu cumuni di qualsiasi italianu nurmali e anurmali, ca rendi farsu e insuppurtabbili ogni sò gestu e parola, supra lu parcu teatrali e supra la scena dâ vita. L’atturi, ovveru chiddu vutatusi a trascènniri la propria singulari pirsunalità pi ni acquisiri ’na multitúdini, perdi ’mmeci puru la propria. ’Na sò frasi sulamenti, e cu’ sia capisci sùbbitu ca iddu è n’atturi, cioè quarchidunu ca pi vuliri fari finta di essiri cu’ nun è finisci ’mmeci pi sumigghiari sulamenti chiddu ca è, e cioè n’atturi. Chiddu ca vosi addivintari atturi pi sumigghiari puru àutri oltri a sé, finì pi nun sumigghiari cchiù nuddu, mancu sé stissu, sumigghiannu ’mmeci sempri e sulamenti ’n ogni sò gestu n’atturi e nenti di cchiù.
Si tra li miliuni di scoli ca ntô munnu esistinu, una sulamenti ’nsignassi a capiri e sviluppari arti e música, a sviluppari talenti di atturi e di buffuni, a esplurari li misteri dî implicazioni filusòfichi posti dâ fisica quantistica, a spugghiari la ricerca pâ comprinsioni dû ànimu umanu dî precuncetti ca unni sia si prufessanu, a s’immergiri ntê teurìi dâ Relatività, dâ Informazioni, dû Caos, a fagucitari ogni littiratura ca daveru valga la pena cunsidirari, e a fari tutti sti e àutri validi cosi ô stissu tempu, prucidennu quannu è lu casu pi sìtisi estremi, trascurannu inútili dettagghi di cui c’è unni sia troppa abbunnanza, a sviluppari accussì la visioni cchiù onnicomprensiva possibbili dî maravigghi dû munnu ca la Granni Màchina Dû Sapiri Umanu già cunteni... embè, si ci fussi puru sulamenti ’na sula scola ô munnu ca si prupunissi o addirittura s’adupirassi a fari chistu, sarrìa già quarchi cosa. Ma nun c’è. Ci sarà.
Roberto Quaglia
L’òpira "Caro Maurizio Costanzo Show...", sana sana o ’n parti, pò essiri liggiuta, scarcata supra ô computer, stampata e cupiata senza lìmiti, sulu pi usu pirsunali. Tutti li testi e li illustrazioni su’ pruprità di Roberto Quaglia e nun pònnu essiri adupirati sani sani o ’n parti senza autorizzazioni. Lu prugettu gràficu e li cumpunenti gràfichi di sti pàggini su’ pruprità riservata di Roberto Quaglia. L’òpira "Caro Maurizio Costanzo Show...", sana sana o ’n parti, nun pò essiri missa ’n vènnita a nuddu tìtulu senza privia autorizzazioni. 
|
