sèmm in la època di specializzazion. Al de sora de qualunque cült, religios o pagan, el regna sovran el cült di cült, el cült de la specializzazion.
La specializzazion l'è indispensàbil in ona società altament complessa come quela attüal, ona società indüstrial in semper pü ràpida tecnologicizzazion. Ghe hinn semper pü funzion de incarnà, per fà funzionà la semper pü complessa màchina de la società ümana, e ògni funzion la genera prima o poeu vüna o pü sub-funzion che a la lor vòlta se riprodürann in ona ramificazion senza fin, almen del nòster attüal pont de vista. Ghe voeuren specialista semper pü competent a savè fà ona semper minor part del insèma di ròb de fà.
Sta corsa a la specializzazion la sta cambiand l'ümanità assee pü de quant alter event l'àbbien cambiada in di sècoi che hinn staa.
Tütt i istitüzion scolàstich perségüen la produzion de individü specializzaa in quaicòssa, quell che implica che lor gh'avarann necessariament de ignorà tütt el rest. La regina di mercanzìe che l'üniversità la insègna, in la nòstra società, l'è la ilüsion de insegnà quaicòssa de significativ. In realtà la insègna domà quaicòssa de ütil, quand la va ben. Mai o quasi quaicòssa de realment significativ in on sens pü ampi.
El savè üman el cress defatti con crescenta crescita, se me consentii on bisticc verbal, a ona velocità superior a quela che la sarìa necessaria al farraginos sistema üniversitari per adegüàss a i noeuv proprietà che sto savè el assüm. In di üniversità insègnen docent che hann stüdiaa vari decenni fa quell che ancamò adess insègnen, e la esplosiva crescita di üman nozion che contradistingue st'època de la aventüra ümana la rend prest fatalment obsolet quand minga paleolìtich i credenz cültüral de chi, tròpp ocüpaa a insegnà in càtedra, el s'è scordaa de continuà a imparà quell de noeuv che l'è staa edificaa sora el vècc.
I üniversità hinn inscì pü che alter atroci palestr de conformismo, situaa in del passaa remòt del mej moment cültüral attüal, i qual sfòrnen per la pü part idiòt programaa a esegüì ona piscinina class de funzion complessi, convint de vèss faa ona cültüra, e inscì paradossalment pü ignorant del ignorant che almen la pròpria ignoranza el ignòra minga. Come el disett Graciàn Y Morales, in del cèlebre sò best seller "El Criticòn" quatter sècoi fa: "El prim pass vers la ignoranza l'è presüm de savè, e assee savaríen se pensàssen minga de savè." E se ve basta minga Graciàn Y Morales, che ditt tra nün gh'hoo minga la mìnima idea de chi el sia, ghe meni dent Goethe, a cert de nün pü familiar, el qual inveci el disett (tra l'alter): "Nagòtt l'è pü terrìbil de ona ignoranza attiva." Second M. de Montaigne, inveci, "La ignoranza che se conoss, se giüdica e se condanna l'è minga ona 'ntrega ignoranza: perché el sia, ghe voeur che la ignòra sé stessa.", e Gigi Picetti el asseriss che "Pü cress la conoscenza colettiva pü se ridüs quela individüal.", mentre Socrate, pü crìptament el sostegneva: