invito chiunque el staga lezendo ste righe, che'l sia elo o eła, màscio o fémena o tuti do o nissun dei do, a no pensar al sesso de chi el ga scrito queło che ti te si drio lèzer. Chi el scrive, par ti ancuo no'l ga sesso, anzi, chi el scrive ancuo no'l esiste, par ti. Ghe xe soło ste parołe e ti te łe lezi.
Nissun cussì el ga scrito ste parołe. Ste parołe łe rispècia un ponto de vista asètico, lontan, asesuà, come queło de un estraterestre ideal. Eco, se propio ti vol imaginar qualchedun che'l sia el responsàbile de queło che ti te lezi, considérame el to òspite estraterestre.
Son cussì virtualmente un estraterestre, gentilmente ospità da la to mente e dai so dintorni, ovaro la società de cui ti te si parte. No cognosso i vostri concèti de Ben e de Mal, parché no go i vostri preconceti, e cussì par evitar de far l'un o l'altro no fao gnente, ma naturalmente parlo, e descrivo queło che vedo. Spero de no far el Mal o el Ben senplicemente parlando, ma in fin dei conti la xe l'ùnica licensa che me ciapo.
Dal ponto de vista estraterestre, le consuetùdini sesuali de na società che no se cognosse le xe un dei argomenti pì efìcaci trastulo. Parlarò alora de queło pì bufo che go osservà in ste vostre abitùdini.
Par còsmica decensa no traso dentro al particolar dei vostri fìsici incastri amorosi. Me astegno anca dal sciocamente ripèter tuto queło a voaltri perfetamente noto, par no anoiarve. De fato ve parlarò de queło che go osservà dei vostri conportamenti sesuali no quando ghe xe un raporto sesual conclamà, ma quando no ghe xe.
Queło che in modo particolar el ga de fato tirà la mia atension el xe la curiosa modalità vostra de relasionarve tra un sesso e l'altro propio quando ghe xe totale asensa de raporto sesual conclamà.
Oviamente no ghe xe gnente da dir de quando i màsci e le fémene i xe conpletamente separà i uni dai altri, fìsicamente e sensorialmente, parché alora gnente tra màsci e fémene el suzede.
Ma pena i se retrova a condivìder i stesi spazi, eco che la situasion la canbia. Anca se no i se cognosse, màsci umani e fémene umane i ga un recìproco conportamento sesual. I fa ovaro robe che łe càusa efeti de natura sesual sora quei del sesso oposto.
Sti efeti i pol naturalmente èser piacévoli o spiacévoli, e i xe de fato senpre o l'un o l'altro o tuti do.
Particolarmente bufi, dal ponto de vista estraterestre mio, i xe i efeti negativi. La xe de fato la soferensa la facenda pì intrigante par chi no la subisse, e la devènta anca la pì bufa quando drento a le cause che la determina se coje l'elemento asurdo e cussì la natura grotesca. Dal ponto de vista estraterestre mio, còjer ste robe el xe un zogo da fioi estraterestri.
Come xelo che se registra un efeto negativo? Ebe, podarìsimo dir che ghe xe un efeto negativo quando un màscio o na fémena, a causa de la visina presensa de qualchedun del sesso oposto, el prova un senso de malèser emosional. In serti casi, go notà, par davero che màsci e fémene che no se cognosse i fa a gara par infliderse a visenda sti malèsari emosionali.
El malèser emosional pì frequentemente provà dal màscio, trovàndose visin a na fémena, el xe causà da la sénplise osservasion de la fémena, spesie se de eła i xe visìbili o evidensià i genitali, o serte zone del corpo che łe funge da riciamo sesual. El xe curioso come el basta cussì poco par causar malèser emosional inte la pì parte dei màsci. Evidentemente, el màscio el xe asè sensìbile riguardo serti so istinti, e quando el subisse un riciamo sesual el sofre se no ghe xe permeso de rispónderghe. Pì forte el xe cussì el riciamo sesual, pì groso el xe cussì el malèser emosional del màscio a'l qual no ghe xe conceso de rispónder a sto riciamo.
El malèser emosional pì frequentemente provà da la fémena, trovàndose visin a un màscio, el xe che'l màscio el rispónde ai riciami sesuali co i quali eła la lo ga colpìo par sbaljo. No vojo de fato pensar che na fémena la indirisa riciami sesuali verso màsci che no la voja colpir co lori. La risposta del màscio ai riciami sesuali che'l ga ricevù, i xe riciami sesuali anca lori, sebén i àbia forma diversa. Mentre i riciami de la fémena verso el màscio i xe prevalentemente de tipo visivo, quei del màscio verso la fémena i xe speso de tipo vocal-auditivo, qualche volta anca tàtile. El màscio el emete donca soni de inequivocàbile contenùo sesual, opur el toca co la man łe parti de riciamo sesual feminile che łe lo ga riciamà. Ricevendo sti riciami la fémena la trae speso un malèser emosional paragonàbile a queło che'l trae el màscio ricevendo quei de la fémena. Sebén qualche volta el màscio uman el emeta sti so riciami sonori o tàtili anca sensa che la fémena la àbia prima emeso i so riciami visivi, go constatà che inte la magioransa dei casi la xe la fémena a emèter par prima i so segnali visivi, ai quali el màscio, quando no'l riese a reprìmerse, el rispónde co i soi.
Queło che ai inocenti oci estraterestri mii el par spasosìsimo parché asurdamente grotesco inte'l contesto de la presunta siviltà del cussì dito èser uman, spesie presunta inteligente de sto pianeta altrimenti coerente, el xe che ghe xe drento a i èsari umani granda disparità de judisio rispeto al fato de causar ai individui de sesso oposto al propio, malèser emosional mediante la emision dei caraterìstici riciami sesuali propi. In altre parołe, sia màsci che fémene i xe prevalentemente d'acordo che la fémena la àbia el pien dirito de colpir qualunque màscio la incontra par via co i potenti riciami sesuali visivi propi, causàndoghe eventual malèser emosional, mentre l'omo no'l àbia dirito de colpir qualunque fémena el incontra par via co i riciami sesuali vocali propi, o moderatamente tàtili, causàndoghe eventual malèser emosional. I riciami sesuali maschili i vien ciamà "ati de lìbidine", parché evidentemente i serve al màscio par comunicar la so lìbido a la fémena verso la qual el li conpie. Curiosamente, i riciami sesuali feminili no i vien ciamà "ati de lìbidine", sebén evidentemente i serva a la fémena par comunicar la so lìbido a tuti i màsci che i xe in grado de védarla. Dal modesto ponto de vista estraterestre mio me par che la fémena umana, mostrando o evidensiando le parti sesuali del corpo propio, la conpie automàticamente "ati de lìbidine" verso chiunque vedéndola cussì el prova el malèser emosional de cui gavemo za parlà.
No vorìa che qualchedun el pensase mal de noaltri estraterestri parché digo queło che vedo.
La natura, oviamente, no la se cura dei pregiudisi de le spesie inferiori come queła umana a cui mi no aparteñgo, e inte'l tenpo la reequilibra le asimetrie che no le ga senso.
Se in futuro le fémene umane łe lansarà senpre de pì i so riciami sesuali esibindo dovunque cui e peti, senpre pì speso gonfi de silicon, acadarà cussì prima o po', fatalmente, che i màsci umani i se emansipa dal archetipo cultural che ancora el li tratien dal far tuti senpre l'isteso, e i se adegua a far tuti l'isteso, e senpre.
Questo el xe queło che mi go notà, dal ponto de vista estraterestre mio. Sti problemi personalmente no i me toca, dato che noaltri de la spesie estraterestre mia semo sesualmente autòctoni, e un dì ve spiegarò cosa questo el significa.
Pensè ben a queło che ve go dito, dato che dopotuto no ve càpita tuti i dì che un estraterestre el ve fasa notar robe sora el vostro modo de vìver che elo el riese a véder soło parché el xe un estraterestre, e no'l ga cussì interese personal inte la facenda de la esistensa umana. Pensèghe, sensa convìnserve che mi gàbia torto sensa gnanca vérghe pensà. No pol de fato aver torto, parché no go espreso nissuna opinion. Ve go soło contà cosa se vede da qua sora da indove mi ve vedo, e no credè che gàbia visto mal, parché go na òtima vista. Metéve al posto mio e vardève, e anca voaltri gavarì un poco de la sagesa estraterestre mia.

Roberto Quaglia