Caro Maurizio Costanzo Show,

ogni tanto inte la vita ghe vol imitar la publisità, o anca pì speso, soratuto se se ghe dà reta a la publisità stesa.
Alora go pensà che'l gera obligatòrio, par mi, farte na oferta spesial anca mi, come i publisitari i ne ga inparà che'l sia ben far.
A'l presio de na soła létera, ancuo, te ne spediso adiritura sinque. Sinque létere a'l Maurizio Costanzo Show a'l presio de una!
El sarà ancuo el Gigi Picetti che in mi el se seła a gaverle prodote. No lo digo tanto a ti, quanto lo ricordo a lu e a mi.

Caro Maurizio Costanzo Show,
Go 49 ani e mezo e no me son mai sposà.
Me son tegnù lìbero e richìo de esperiensa, de informasion.
Me ritegno a'l paso coi tenpi e i dise che no son po cussì mal estèticamente.
No son pelà, no go la pansa, e go quasi tuti i mii denti.
Serto, par strada me buto a vardar le tose, e qualcheduna me strapa anca un comento, par com'el xe e come la va vestìa.
Ma quando gero zóvane el gera difìsile l'aproci (no parlemo po de la conclusion) parché le fémene le gera tute timorate.
Deso che ghe xe el liberalismo e tuto el xe permeso anzi a gaver pudor se fa bruta figura, le zóvani che le se regała ai tepisteli so coetanei le rifuze na persona sana e matura come mi che saveria oltretuto sodisfarle con conpetensa.
Domando parché a ste zóvani no ghe interesa i òmeni co la u maiùscola e le se basuca e le se strùsia a ogni canton basta che i sia dei lori. Par mi questo el xe rasismo. Senò, tose de deso, rispondì parché.

Caro Maurizio Costanzo Show,
A mi me piaze asè scrìver. Serte volte me scapa proprio de scrìver. Scrivo a'l ristorante, spece dopo magnà, su le tovajołine. Scrivo inte le sale de speto de stasion e dentisti. Scrivo anca inte'l gabineto, su la mia carta personal. Tuti i mii amighi e parenti anca maligni i apreza le cose che scrivo quando li sotopongo, son ndà in redasion de giornali e riviste e da quasi tuti i editori de Milan, ma me son senpre sentìo rispónder: continua cussì che'l va ben, ripasa pì avanti, ecc. Parché alora le cose che scrivo le va ben a'l pùblico e no a chi pùblica?
El xe question de amicisie, de racomandasion, no vojo pensar de mafia?
Se volì poso venir a trovarve con un poco de fòji, so anca lézer ben, e po credo che'l sia senpre mejo che na cosa la lese chi la ga scrita, parché mejo de lu nissun la conose. Go pàgine su quasi tuti i argomenti, dipende cosa ve interesa.
Spero che sta mia la incontra el vostro favor e intanto conplimenti par na trasmision che proprio ghe voleva.

Caro Maurizio Costanzo Show,
Son poareto, domando atorno schei da vint'ani.
Però lo fao con educasion e no vojo èser insistente. Fin a deso la gente la xe senpre stà gentil con mi e no la me ga mai fato mancar gnente. Però se no fuse che son stà previdente in sti ani deso me trovaria in sèrie dificoltà. No parlo cussì soło par interese personal, ma anca par altri come mi che i sta pezo.
Tuti i dise che ghe xe la crisi del capital e nissun se ga incorto che ghe xe anca queła dei schei spìssoli. Tra i drogà che i se porta via le 100 lire con arogansa, i toseti che i mete le 200 inte le machinete dei zoghi automàtici, i novi telèfoni a monede da 100 e 200 e 500 sensa resto, i parchìmetri che i ne ingiote tuto el giorno e, dulcis in fundo, o mejo "in cauda venenum" le machinete dei autobus che in canbio del bijeto le se ciapa le 50, le 100, le 200 e a Milan deso go savù anca le 500, cosa resta da dar a un poareto? No serto i schei de carta o i asegni circolari (bei tenpi dei mini-asegni!) spesialmente a Zènova.
Ma lo sa queli che i mete ste màchine magnaschei a ogni crosicio che i conpie un ato gravemente antisocial?
I ne vol ridur a la fame, noaltri che no pesemo su la economia del lavor e se rangemo in proprio?
Domando a governanti e aministratori pùblici che i medita su'l problema se i vol anca el nostro voto, e che i sia na volta tanto lori che i problemi ne li crea a trovar la solusion.

Caro Maurizio Costanzo Show,
el xe la prima volta che me decido a scrìver a na trasmision, e soło parché go savù che davero ghe xe un spasio lìbero a le opinion dei telespetatori, che cussì i pol colaborar a la sivil discusion tra la gente.
Vegno sùbito a'l dunque par esponerve el caso che me sta a cor: mi go senpre fumà le sigarete Nazionali Sénplisi sensa Filtro, sia par economia, sia par abitùdine. El presio el se ga senpre mantegnù pì che acetàbile parché el xe noto che ste sigarete le tegnemo inte'l panier, tocando el qual se sposta la scala mòbile o mejo a dir la continzensa.
Tuto ndaria ben se le sudete Nazionali se trovase in consegna dai vari tabachini de Zènova. Ma gira gira el xe senpre pì difìsile gaverle, sia parché i dise che ghe ne consegna poche, sia parché forse no voraria pensar mal ma i tabachini le riserva probabilmente a amighi e parenti che se le prenota e acapara.
Parlando de sto problema Doménega 20 Novenbre in un Bar de Corso Sardegna con svariati amighi el xe saltà fora che se podaria obligar el Monopòlio a far in modo che un prodoto fato par el consumo popolar el sia davero trovàbile inte la quantità giusta a'l bisogno che ghe ne ga i so fumatori. E come poder far questo?
Tuti i sa che se se se reca in un panifìsio e se domanda del pan comune a l'aqua, queło manco caro, el panater steso che'l xe sprovedùo el xe tegnù a consegnar a l'aquirente el pan de presio che'l ga imediatamente a queło de sora, ma (inportante) a'l STESO presio de queło pì econòmico che no'l se trova in condision de fornir.
Alora un mio amigo fidà el diseva che'l so legal (in na Causa in Pretura par rumori del visin de sora) el ghe gaveva garantìo che se pol far egual anca par le Nazionali Sénplisi, se no le dà gavendo a'l so posto le Super sensa filtro da 400 lire e se gnanca queste ghe xe, le Alfa da 700 lire e via salendo fin a'l tipo che i ga, però senpre a 230 lire el pacheto come le Nazionali Sénplisi.
Se tuti quanti adotàsimo sto sistema no saresimo pì ciapà in giro da un Governo che'l fa finta de pensar a'l so pòpoło e po no'l fa abastansa sigarete par el bisogno dei fumatori pì popolari.
Cussì fasendo i saria obligà par no rimétarghe a far pì Nazionali e sensa rìsego par noaltri se no queło de fumar semai na sigareta pì cara a'l steso inporto.
Se tra i vostri spetatori ghe xe un Avocato gradiria conferma inte'l senso de queło esposto, che'l xe za come digo parer de un legal.
Grasie de la ospitalità e un apeło a tuti i fumatori de Nazionali Sénplisi sensa filtro a èser uniti e conpati inte i sacrosanti nostri diriti.

Caro Maurizio Costanzo Show,
Lavoro in porto saltuariamente e son anca apasionà de fotografia. Tute le volte che riva na nave giaponese me rango co'l poco inglese che mastego a farme spiegar da l'echipajo le novità fotogràfiche che i se porta drio. Mèrcore scorso i xe smontà un grupo de sti giaponesi tuti co la Nikon e el teleobietivo.
Ghe go domandà parché gnente normal e grandàngoli e i me ga fato capir che par i gati che i gaveva da fotografar no i ndava ben.
Un che parlava a segni el me ga volù dir che lori in Giapon i ga na grosa fàbrica industrial de un tanburo dito "sciamisen" che'l vien costruìo con pele de gato o anca conejo.
El giorno dopo in Sottoripa li go becà sparsi par i vicoli che i faseva davero le foto ai gati.
Deso, mi no go particolar sinpatia par i felini, ma no me sta ben che sti giaponesi i fa i so tanburi con i nostri gati.
No me dilungo pì, proveda chi de dover.

Caro Maurizio Costanzo Show,
Son un pensionà de Piasa Terralba de setantasie ani.
Con sti bei giorni de sol che ne regała el inverno, l'altra matina son ndà a ciaparme l'aria bona a la Villa Imperiale.
Come me son sentà su la prima panca me son trovà na siringa piantà inte'l dedrio.
El xe mai posìbile che un onesto sitadin che'l ga lavorà tuta la vita el rìsega la tossicodipendensa involontaria parché i lasa atorno ste siringhe che po le me se pianta in culo? Scusè l'espresion ma son proprio fora de mi.

Gigi Picetti

Lassa un Comento. Lezi i comenti dei altri. Me piaze! Me piaze! Me piaze! Ìndeze de le létere. Covertina. Ma chi elo Roberto Quaglia?