Continuo a notar che da ti se parla de tuto, fora che de fantasiensa. Cussì, a benefìsio de la Umanità Italiana, de la quale solitamente ti sì palatin ti pì de asè altri, me trovo invese costreto a parlarne un poco mi. Cosa xe la fantasiensa? Come la xe nata? Quando la xe nata? Parché la xe nata? Partimo da'l inisio, ovaro da'l sècolo scorso.
Inte'l mondo ocidental, fin a la rivolusion industrial del disanovèsimo sècolo, el futuro de la società el gera par el indivìduo un "anbiente" che no'l destava particolar curiosità. El progreso tecnològico el trasformava za da mileni la società - el xe vero - ma el sviłupo, anca aselerando continuamente, no'l gera mai stà fàsilmente persepìbile da'l indivìduo in prima persona. Inte'l arco de na vita umana, i gera ben pochi o adiritura nuli i progresi tecnològici e le relative trasformasion del viver cotidian che la società la produseva. Se nasceva e se invecià in un mondo che'l canbiava tropo lentamente parché se riusise a incorzerse che l'onda del canbiamento la saria proseguìa oltre la pròpria morte. El fioło de un caleger el inparava el lavor del pare par po un giorno trasmétarlo a'l pròprio fioło, e no ghe gera nissun rìsego che intanto qualchedun altro el inventase un novo sistema automatizà par la produsion de scarpe. El futuro tecnològico no'l esisteva, a liveło de la cosiensa comune. Queło che'l gera, el saria senpre stà anca dopo. Le sporàdiche invension che pur, inte i mileni, le gaveva fato far pasi da gigante a la spece umana, le gera consideri ecesion miracolose a na règola de imutabilità de la tecnologia. Le invension de la umanità, rare inte'l corso de na vita umana, le gera asimilà come na magia che inprovisamente la devenise posìbile, e cussì acetà come na nova norma, un prodigioso traguardo rivà oltre el qual gnente de novo el pol pì venir inventà.
El Regno del Ignoto no'l gera cussì sito inte'l futuro (che la cosiensa comune la se imaginava presoché idèntico a'l presente), ma in un altro canton, in un altro luogo. El gera un altro canton, in un paese lontan, oltre i confini del mondo conosùo, inte'l Regno dei Cieli e in mile altre località imaginarie che se consumava mirabolanti aventure e aliene vicende. La imaginasion, inte i sognatori che na potente imaginasion i gaveva, la esplorava senpre inte'l spasio e mai inte'l tenpo, parché el gera amisìbile che a luoghi lontani i podese corispónder ignoti contesti, (dopotuto, ogni tanto qualcun el tornava da longhìsimi viaji contando che efetivamente esisteva luoghi conpletamente diversi dai soi, abità da persone con face usi e costumi diversi asè), ma el gera asolutamente inamisìbile che a momenti tenporali lontani (inte'l futuro, ovviamente) i podese corispónder contesti diferenti da queło presente. A dimostrasion de tuto questo se considera tuta la letaratura fantàstica scaturìa da la umanità par mileni: no ghe xe presoché trasa de narasion indove l'alienità del contesto la sia rapresentà da un spostamento de la asion longo l'ase del tenpo, verso el futuro, intanto che invese abonda le storie de viaji in luoghi alieni parché remoti inte'l spasio.
Sto stato de le cose el se ga alterà significativamente co la rivolusion industrial del disanovèsimo sècolo. La aselerasion del sviłupo tecnològico la ga causà trasformasion talmente frequenti inte la vita de le persone, da no rénder pì inamisìbile el concèto che'l sviłupo tecnològico el gavaria podùo in futuro trasformar ulteriormente la vita de le persone.
El riflèso de questo su la letaratura el xe stà che la xe nata la fantasiensa (in inglese, pì pròpriamente: science fiction, ovaro letaratura de siensa). Mary Shelley (la mujer del cèlebre poeta) la ga ipotizà che i progresi inte la biochìmica e inte la chirurgia i gavaria un giorno consentìo de rizenerar in laboratòrio la vita, e la ga scrito Frankenstein. Jules Verne, anca restando ancorà a la tradision che la ricercava l'alienità in un altro canton, mediante viaji, el ga ipotizà che le saria stà i progresi tecnològici a rénder posìbili i so viaji inte i luoghi pì disparà. H.G. Wells, inspirà da la convinsion sientìfica de la època che Marte el podese ospitar vita extraterestre, el ga scrito "La guerra dei mondi", el primo romanzo inte'l quale la tera la venise invasa da extraterestri. Inte'l 1926 Hugo Gernsback, inte i USA, el ga fondà la prima rivista spesializà in letaratura de fantasiensa, ma el xe stà soło co l'irusion de John Campbell Jr., inte'l 1938, a la guida de la rivista Astounding Stories, che na nova e foltìsima schiera de scritori la se ga formà, dando el via a queła che'l xe stà dopo ciamà "L'età d'oro della Fantascienza". Ricordemo, de sta nova generasion de autori, tre nomi che forse gavarì za sentìo: Isaac Asimov, Robert Heinlein, Arthur Clark. In sta fase, i temi dominanti de le storie i xe deventà, par la prima volta, estrapolasion rigorosamente sientìfiche su'l futuro progreso de la tècnica. La sconsertante esplosion de la bonba atòmica su Hiroshima la ga spiegà inequivocabilmente a'l mondo che'l futuro el gera za scominsià, e senpre pì gente la se ga interesà a la fantasiensa par sercar de capir come el futuro el saria podùo èser.
Po la xe stà inventà la television. I letori de narativa tradisional i ga abandonà in masa i libri par dedicarse a'l novo e imperituro so pasatenpo. Ma i letori de fantasiensa i xe aumentà, e cussì anca i autori.
Da la seconda metà dei ani sinquanta in poi, e par tuti i ani sesanta, la fantasiensa la xe entrà in na nova fase, che la xe stà ciamà "New Wave". Le storie su la siensa e i siensiati no le gera pì a'l sentro de la atension. Protagonista de la nova fantasiensa la xe deventà la gente comune, che la subiva i efeti dei progresi tecnològici. Le estrapolasion dei scritori no le gera pì limità a le pure invension tecnològiche, ma le se aventurava anca inte la sociologia e inte la psicologia. La fantasiensa la gera cresìa e maturà, la se gera richìa. La gaveva prepotentemente fato irusion inte'l canpo la sàtira social.
Inte i ani otanta el xe nato el movimento cyberpunk, tutora rigoglioso, ciamà anca neuromàntico (da Norman Spinrad). Personaji neuromàntici, inte i romanzi cyberpunk come fora de lori (el movimento cyberpunk el xe de fato tracimà dai so àrzeni letarari par diventar un fenòmeno social), i xe speso na nova generasion de ribeli tecnologizà. El sfrenà sviłupo de la informàtica el induse in pì a crédar che in futuro el concèto steso de realtà el ne posa venir conpletamente trasfigurà, e le estrapolasion su questo cussì le fioca. La "Realtà Virtual" la xe par noaltri ancora soło un videogame, ma in futuro...
La fantasiensa no la se ferma qua. Noaltri invese sì.

Roberto Quaglia