Caro Maurizio Costanzo Show,

ogni tantu ntâ vita ci voli imitari la publicità, o puru cchiù spissu, suprattuttu si si runa retta â publicità stissa.
Allura aju pinsatu ca era obbligatoriu, pi mia, ti fari ’na offerta speciali puru ju, comu li pubblicitari ni hannu ’nsignatu ca sia beni fari.
Ô prezzu di ’na sula lettera, oggi, ti ni spidisciu addirittura cincu. Cincu lettiri ô Maurizio Costanzo Show ô prezzu di una!
Sarà oggi lu Gigi Picetti ca ’n mia si cela a l’aviri produtti. Nun lu dicu tantu a tia, quantu lu arricordu a iddu e a mia.

Caro Maurizio Costanzo Show,
Aju 49 anni e menzu e nun mi sugnu mai spusatu.
Mi sugnu tinutu libbiru e arricchutu di espirienza, di ’nfurmazioni.
Mi ritegnu ô passu cî tempi e dìcinu ca nun sugnu po’ accussì mali estèticamenti.
Nun sugnu pilatu, nun aju la panza, e aju quasi tutti li denti mei.
Certu, pâ strata mi giru a taliari li picciotti, e quarcuna mi strappa puru nu cummentu, pi comm’è e comu va vistuta.
Ma quannu era picciottu era difficili l’approcciu (nun parramu po’ dâ cunclusioni) pirchì li fimmini èranu tutti timurati.
Ora ca c’è lu libbiralismu e tuttu è permisu anzi a aviri puduri si fa brutta figura, li giuvani ca si riàlanu ê sò teppistiddi coetanei rifùgginu di ’na pirsuna sana e matura comu a mia ca sapissi oltretuttu suddisfarili cu cumpitenza.
Dumannu pirchì a sti giuvani nun interessanu li omini câ u maiuscula e si sbaciùcchianu e si strùscianu a ogni cantuni abbasta ca sianu dî loru. Pi mia chistu è razzismu. Sinnò, picciotti d’ora, rispunnìti pirchì.

Caro Maurizio Costanzo Show,
A mia mi piaci assai scriviri. Certi voti mi scappa propriu di scriviri. Scrivu ô ristoranti, speci doppu manciatu, supra li tuvagghiuliddi. Scrivu ntê sali d’aspettu di stazioni e dintisti. Scrivu puru ntô gabbinettu, supra la mia carta pirsunali. Tutti li mei amici e parenti puru maligni apprizzanu li cosi ca scrivu quannu li sottopongu, sugnu jutu ’n redazioni di giurnali e riviste e di quasi tutti li editturi di Milano, ma mi sugnu sempri sintutu rispònniri: cuntinui accussì ca sta jennu beni, ripassi cchiù avanti, ecc. Pirchì allura li cosi ca scrivu vànnu beni ô pùbblicu e nun a cu’ pùbblica?
È quistioni di amicizii, di raccumannazioni, nun vogghiu pinsari di mafia?
Si vulìti pozzu vìniri a vi truvari cu nu pocu di fogghi, sacciu puru lèggiri beni, e po’ cridu ca sia sempri megghiu ca ’na cosa la leggi cu’ l’ha scritta, pirchì megghiu di iddu nuddu la canusci. Aju pàggini supra quasi tutti li argumenti, dipenni chi vi interessa.
Speru ca sta mia ’ncontra lu vostru favuri e intantu cumplimenti pi ’na trasmissioni ca propriu ci vuliva.

Caro Maurizio Costanzo Show,
Sugnu pòviru, dumannu ’n giru li sordi di vint’anni.
Però lu fazzu cu educazioni e nun vogghiu essiri insistenti. Fina a ora la genti è sempri stata gentili cu mia e nun m’ha mai fattu mancari nenti. Però si nun fussi ca sugnu statu previdenti ’n st’anni ora mi truvirìa ’n serii difficultà. Nun parru accussì sulu pi interessi pirsunali, ma puru pi àutri comu a mia ca stannu peggiu.
Tutti dìcinu ca c’è la crisi dû capitali e nuddu s’è addunatu ca c’è puru chidda dî spìccioli. Tra li drugati ca si pòrtanu via li 100 liri cu arruganza, li picciriddi ca mèttinu li 200 ntê machinetti dî jochi automàtici, li novi tilèfuni a muneti di 100 e 200 e 500 senza restu, li parchìmitri ca ni ’ngòianu tuttu lu jornu e, dulcis in fundo, o megghiu "in cauda venenum" li machinetti dî autobbus ca ’n càmmiu dû bigglettu si pìgghianu li 50, li 100, li 200 e a Milano ora aju saputu puru li 500, chi rimani di dari a nu puvireddu? Nun certu li sordi di carta o li assegni circulari (beddi tempi dî mini-assegni!) spicialmenti a Gènova.
Ma lu sannu chiddi ca mèttinu sti màchini mangiasordi a ogni crucicchiu ca cumpònu n’attu gravimenti antisuciali?
Ni vògghinu ridùciri â fami, nuiautri ca nun pisamu supra l’ecunumìa dû travagghiu e ci arrangiamu ’n propriu?
Dumannu a guvirnanti e amministraturi pùbblici ca midìtinu supra lu prubblema si vògghinu puru lu nostru votu, e sianu ’na vota tantu iddi ca li prubblemi ci li crèanu a truvari la suluzioni.

Caro Maurizio Costanzo Show,
è la prima vota ca mi decidu a scriviri a ’na trasmissioni, e sulu pirchì aju saputu ca veramenti c’è nu spaziu libbiru ê opinioni dî tilispittaturi, ca accussì pònnu collaburari â civili discussioni tra la genti.
Vegnu sùbbitu ô dunqui pi vi espòniri lu casu ca mi sta a cori: ju aju sempri fumatu li sicaretti Nazionali Semplici senza Filtro, vuoi pi ecunumìa, vuoi pi abitudini. Lu prezzu s’è sempri mantinutu cchiù ca accittabbili pirchì è notu ca sti sicaretti li avemu ntô panieri, tuccannu lu quali si sposta la scala mòbbili o megghiu a diri la cuntinginza.
Tuttu jirìa beni si li suddetti Nazionali si truvassiru ’n cunsegna dî vari tabbaccari di Gènova. Ma gira gira è sempri cchiù difficili l’aviri, sia pirchì dìcinu ca ni cunsègnanu pochi, sia pirchì fòrsi nun vurrìa pinsari mali ma li tabbaccari li risèrvanu prubbabbilmenti a amici e parenti ca si li prinòtanu e accapàrranu.
Parrannu di stu prubblema Dumènica 20 Nuvembri ’n nu Bar di Corso Sardegna cu svariati amici è sautatu fora ca si putissi obbligari lu Monopolio a fari ’n modu ca nu pruduttu fattu pû cunsumu pupulari sia veramenti truvabbili ntâ quantità giusta ô bisognu ca ni hannu li sò fumaturi. E comu putiri fari chistu?
Tutti sannu ca si ci si reca ’n nu panificiu e si dumanna dû pani cumuni a l’acqua, chiddu menu caru, lu panitteri stissu ca è sprovvidutu è tinutu a cunsignari a l’acquirenti lu pani di prezzu ca havi immediatamenti ô di supra, ma (impurtanti) ô STISSU prezzu di chiddu cchiù econòmicu ca nun si trova ’n cundizioni di furniri.
Allura nu miu amicu fidatu dicia ca lu sò legali (’n ’na Causa ’n Pretura pi rumuri dû vicinu di supra) ci avia garantutu ca si po’ fari uguali puru pî Nazionali Semplici, si nun li dànnu avennu ô loru postu li Super senza filtru di 400 liri e si mancu chisti ci su’, li Alfa di 700 liri e via acchianannu fina ô tipu ca hannu, però sempri a 230 liri ô pacchettu comu li Nazionali Semplici.
Si tutti quanti aduttassimu stu sistema nun sarrìamu cchiù pigghiati ’n giru di nu Guvernu ca fa finta di pinsari ô sò pòpulu e po’ nun fa abbastanza sicaretti pû bisognu dî fumaturi cchiù pupulari.
Accussì facennu sarrìanu obbligati pi nun rimittirci a fari cchiù Nazionali e senza rìsicu pi nuiautri si nun chiddu di fumari semmai ’na sicaretta cchiù cara ô stissu impurtu.
Si tra li vostri spittaturi c’è n’Avvocatu gradirìa confirma ntô sensu di chiddu espostu, ca è già comu dicu pareri di nu legali.
Grazii dâ ospitalità e n’appellu a tutti li fumaturi di Nazionali Semplici senza filtru a essiri uniti e cumpatti ntê nostri sacrusanti diritti.

Caro Maurizio Costanzo Show,
Travagghiu ’n portu saltuariamenti e sugnu puru appassiunatu di futugrafìa. Tutti li voti ca arriva ’na navi giappunisi mi arrangiu cû pocu ’nglisi ca masticu a mi fari spiegari dû equipaggiu li novità futugràfichi ca si pòrtanu darreri. Mèrcuri scorsu su’ scinnuti nu gruppu di sti giapunisi tutti câ Nikon e lu teleobbiettivu.
Ci aju chiestu pirchì nenti nurmali e grandanguli e m’hannu fattu capiri ca pî jatti ca avìvanu a futugrafari nun jivanu beni.
Nu mancinanti m’ha vulutu diri ca iddi ’n Giappone hannu ’na grossa fàbbrica industriali di nu tammuru dittu "sciamisen" ca veni custruitu cu peddi di jattu o puru cunigghiu.
Lu jornu doppu ’n Sottoripa l’aju biccati sparsi pî vaneddi ca facìvanu daveru li foto ê jatti.
Ora, ju nun aju particulari simpatìa pî felini, ma nun mi sta beni ca sti giapunisi fànnu li sò tammura cî nostri jatti.
Nun mi dilungu cchiù, pruvveda cu’ di duviri.

Caro Maurizio Costanzo Show,
Sugnu nu pinziunatu di Piazza Terralba di settantasei anni.
Cu sti beddi jorna di suli ca ni riala l’invernu, l’àutra matina sugnu jutu a mi pigghiari l’aria bona â Villa Imperiale.
Comu mi sugnu assittatu supra la prima banca mi sugnu truvatu ’na siringa chiantata ntô didarreri.
È mai possibbili ca n’onestu cittadinu ca ha travagghiatu tutta la vita rìsica la tossicodipindenza involuntaria pirchì làssanu ’n giru sti siringhi ca po’ mi si chiàntanu ’n culu? Scusati l’esprissioni ma sugnu propriu fora di mia.

Gigi Picetti

Lassa nu Cummentu. Leggi li cummenti di l’àutri. Mi piaci! Mi piaci! Mi piaci! Ìnnici dî lèttiri. Cupirtina. Ma chi è Roberto Quaglia?