Caro Maurizio Costanzo Show,

ògni tant int la vétta biṡåggna imitèr la publizitè, o anc pió spass, såver tótt s'as dà réta ala publizitè istàssa.
Alåra a i ò pinsè ch'l'êra obligatôri, par mé, fèret un'ufêrta spezièl anca mé, cme i publizitèri i s an insgnè ch'al séppa bän fèr.
Al prêzi d'una såula lêtra, incû, a t in spediss adiritûra zénch. Zénch lêtri al Maurizio Costanzo Show al prêzi d'óna!
Al srà incû al Gigi Picetti ch'in mé al s scånd a avairli prodótti. An al dâg brîṡa tant a té, quant a al arcôrd a ló e a mé.

Caro Maurizio Costanzo Show,
A i ò 49 ân e mèż e an m sån mâi maridè.
A m sån tgnó lébber e arriché d'esperiänza, d'informaziån.
A m ritègn al pâs con i tänp e i dîṡen ch'an sån dåp acsé mèl estêticamänt.
An sån brîṡa cålv, an ò brîṡa la panza, e a i ò quèṡi tótt i dént mî.
Sicûr, par la strè a m żîr a guardèr äli ragazôli, e quèlcdóna la m strâpa anc un cumänt, par cme l'é e cme la va vsté.
Mo quand a êra ragazål l'êra difézzil l'apråć (an parlän dåp dla concluṡiån) parché äli dòni äli êren tótti timorè.
Adès ch'ai é al liberalîṡum e tótt l'é permàss anzi a avair pudåur as fa brótta figûra, äli żåvni ch'äli s regâlen ai så tepistén coetâni äli rifûggen da una persåna sàna e madûra cme mé ch'la savrévv ôltretótt sodisfèrli con competänza.
A dmand parché a sti żåvni an interèsen brîṡa i òmen con la u maióscola e äli s baṡócen e äli s strûsen a ògni cantån bâsta ch'i séppen di så. Par mé quasst l'é razîṡum. S'nå, ragazôli d'adès, rispundî parché.

Caro Maurizio Costanzo Show,
A mé am pièṡ bän scrîver. Däli vôlt am scapa pròpri da scrîver. A scrîv al ristorànt, spêzie dåp magnè, in vatta ai tovagliolén. A scrîv int äli sèl d'aspèt ed staziån e dentéssta. A scrîv anc int la toilette, in vatta ala mî cârta personèl. Tótt i mî amîgh e parént anc maléggn i apréżen äli cås ch'a scrîv quand a äli sottopångh, a sån andè in redaziån ed giornèl e revéssti e da quèṡi tótt i editûr ed Milàn, mo a m sån sänper sintó rispånder: al continua acsé ch'al stà andänd bän, al ripâsa pió avanti, ecc. Parché alåra äli cås ch'a scrîv äli van bän al públich e brîṡa a chi al pública?
L'é questiån d'amicézzi, ed racomandaziån, an vói brîṡa pinsèr ed mâfia?
S'a vlî a pås gnîr a truvèrv con un påch ed fói, a sò anc lèzer bän, e dåp a crädd ch'al séppa sänper méi ch'una cåsa la lêǵa chi l'à scrétta, parché méi ed ló inción la cgnóss. A i ò pâgini in vatta a quèṡi tótt i argomänt, al dipänd csa v interèsa.
A spêr ch'sta mî l'incåntra al våster favåur e intant complimänt par una trasmisiån ch'pròpri ai vlêva.

Caro Maurizio Costanzo Show,
A sån påver, a dmand in gîr i såld da vint'ân.
Però a al fâg con educaziån e an vói brîṡa èser inséstänt. Fén adès la zänt l'é sänper stè gentîl con mé e an m à mâi fât manchèr gnínt. Però s'an fóss brîṡa ch'a sån stè previdänt in sti ân adès a m truvarévv in sêri dificoltè. An parl dånca såul par interès personèl, mo anc par èter cme mé ch'i stan pîṡ.
Tótt i dîṡen ch'ai é la criṡi dal capitèl e inción al s é adè ch'ai é anc cla di spéciol. Tra i drughè ch'i s pårten vî äli 100 lîr con aroganza, i ragazû ch'i métten äli 200 int äli mâchinén'ni di żûgh automâtich, i nåv telêfon a monêd da 100 e 200 e 500 sänza rèst, i parchímetri ch'i n ingåien tótt al dé e, dulcis in fundo, o méi "in cauda venenum" äli mâchinén'ni di autobus ch'in câmbi dal biliétt i s ciâpen äli 50, äli 100, äli 200 e a Milàn adès a i ò savó anc äli 500, csa arèsta da dèr a un puvrét? Brîṡa sicûr i såld ed cârta o i asèggn zircolèr (bî tänp di mini-asèggn!) spezialmänt a Gènova.
Mo i al san chi ch'i métten sti mâchini magnasåld a ògni crociâri ch'i compéssen un ât gravemänt antisocièl?
I s vålen ridûṡer ala fâm, nuèter ch'an peṡän brîṡa in vatta a l'economî dal lavurîr e a s arangän in propi?
A dmand a governànt e aministradûr públich ch'i mediten in vatta al problêma s'i vålen anc al nåster vót, e ch'i séppen una vôlta tant låur ch'i problêma i s i crêen a truvèr la soluziån.

Caro Maurizio Costanzo Show,
l'é la prémma vôlta ch'a m decéd a scrîver a una trasmisiån, e såul parché a i ò savó ch'veramänt ai é un spâzi lébber ali opiniån di telespetatûr, ch'acsé i pålen colaborèr ala zivîl discusiån tra la zänt.
A vègn sóbbit al dånca par espånerv al câṡ ch'am stà a côr: mé a i ò sänper fumè äli zigarèt Nazionali Semplici sänza Félter, vå par economî, vå par abitûdin. Al prêzi al s é sänper mantgnó pió ch'azetâbil parché l'é nòt ch'sti zigarèt a äli gh avän int al panîr, tuchänd al quèl as spåsta la scâla mòbil o méi a dîr la contingänza.
Tótt al andarévv bän se äli suddéti Nazionali äli s truvéssen in consêgna dai vâri tabachén ed Gènova. Mo żîra żîra l'é sänper pió difézzil avairli, sî parché i dîṡen ch'i n consêgnen påchi, sî parché fårsi an vrévv brîṡa pinsèr mèl mo i tabachén äli riservèn probâbilmänt a amîgh e parént ch'i s äli prenåten e acâpren.
Parländ ed st'problêma Dménnica 20 Nuvémber in un Bar ed Corso Sardegna con dṡvêrs amîgh l'é saltè fòra ch'as psrévv obligèr al Monopòli a fèr in môd ch'un prodót fât par al consómm popolèr al séppa veramänt truvâbil int la quantitè giósta al biṡåggn ch'i n an i så fumadûr. E cme psair fèr quasst?
Tótt i san che s'as va in un panifézzi e as dmanda dal pan comón a l'âqua, quall manc chèr, al fornèr istàss ch'l'é sprovvedó l'é tgnó a consegnèr a l'acuiränt al pan ed prêzi ch'al gh à imediatamänt al di såura, mo (impurtànt) al STÀSS prêzi ed quall pió econåmich ch'an s tråva in condiziån ed furnîr.
Alåra un mî amîgh fidè al diṡêva ch'al så legèl (in una Cauṡa in Pretûra par rumûr dal viṡén ed såura) al i avêva garanté ch'as på fèr eguèl anc par äli Nazionali Semplici, s'an äli dan avänd al så påst äli Super sänza félter da 400 lîr e s'gnanc quassti ai én, äli Alfa da 700 lîr e vî saländ fén al tîp ch'i an, però sänper a 230 lîr al pachèt cme äli Nazionali Semplici.
S'a adotéssen tótt quant st'sistêma an srén pió ciapè in gîr da un Guêren ch'al fa finta ed pinsèr al så påpol e dåp an fa brîṡa abastanza zigarèt par al biṡåggn di fumadûr pió popolèr.
Acsé faṡänd i srévnen obligè par an rimétteregh brîṡa a fèr pió Nazionali e sänza réṡich par nuèter s'an é brîṡa quall ed fumèr semmâi una zigarèta pió chèra al stàss impôrt.
Se tra i våster spetatûr ai é un Avuchèt a gradirévv conferma int al säns ed quant espåst, ch'l'é bèle cme a dâg parair d'un legèl.
Grâzie dl'ospitalitè e un apèl a tótt i fumadûr ed Nazionali Semplici sänza félter a èser uné e compât int i nåster sacrosànt dirétt.

Caro Maurizio Costanzo Show,
A lavår in pôrt saltuariamänt e a sån anc apasionè ed fotografî. Tótti äli vôlt ch'ariva una nèv giaponaiṡa a m arànż col påch inglaiṡ ch'a mâstegh a fèrum spieghèr da l'equipâg̈ äli novitè fotogrâfichi ch'i s pårten drî. Mêrcol pasè i én gnó żå un grópp ed sti giaponaiṡ tótt con la Nikon e al teleobietîv.
A i ò dmandè parché gnínt normèl e grandângol e i m an fât capîr ch'par i gât ch'i duvêven fotografèr an andèven brîṡa bän.
Un mancinànt al m à vló dîr ch'låur in Giapån i an una gròsa fàbrica industrièl d'un tambûr détt "sciamisen" ch'al vén costrué con pèl ed gât o anc cunéli.
Al dé dåp in Sottoripa a i ò bechè sparpaiè par i caruż ch'i faṡêven dabån äli fòto ai gât.
Adès, mé an ò brîṡa particolèr simpatî par i felén, mo an m stà bän ch'sti giaponaiṡ i fâghen i så tambûr con i nåster gât.
An m dilóngh ôlter, ch'al provéda chi ed duvair.

Caro Maurizio Costanzo Show,
A sån un pensionè ed Piazza Terralba ed setantasî ân.
Con sti bî dé ed såul ch'a s regâla l'invêren, cl'ètra matén'na a sån andè a ciapèrum l'âria bôna ala Villa Imperiale.
Apêna a m sån astè in vatta ala prémma banchén'na a m sån truvè una siringa piantè int al drî.
L'é mâi possébbil ch'un onèst citadén ch'l'à lavurè tótta la vétta al réṡga la tossicodipendänza involontèria parché i lâsen in gîr sti siringhi ch'dåp äli m s piânten int al cûl? Scuṡè l'espresiån mo a sån pròpri fòra ed mé.

Gigi Picetti

Lâsa un Cumänt. Lêż i cumänt ed chi èter. Am pièṡ! Am pièṡ! Am pièṡ! Éndiz däli lêtri. Cuvêrta. Ma chi è Roberto Quaglia?