se alude speso a qualcun che'l parla par "frasi fate", speso adornando sta alusion con na acesion negativa. Qualcun el se ga divertìo a ironizar su questo, conponendo ad arte diàloghi esclusivamente formà da frasi fate. Ma no ghe xe soło le frasi fate.
Ghe xe, prima de tuto, le "parołe fate". Tìpico de na frase fata el xe che eła la se ripresenta senpre egual o con mìnimali variasion. Par esenpio: I zóvani de ancuo no i ga pì rispeto. Ben, par el steso motivo, tute le parołe le xe "fate", parché le se ripresenta senpre egual. Sicome el xe cussì par tute le parołe, no ghe fasemo caso. Qualche inconveniente el sorze quando volemo intènder qualcosa che nissuna parola esistente la posa rapresentar, par esenpio na qualche nostra invension - material o concetual. No podendo sénplisemente "ripéter" la sòlita parola che la racchiude queło che volemo dir, se trovemo in dificoltà. E se inventemo na nova parola el sorze el problema de èser conprensi, parché no se trata de na parola "fata", e no gavéndola mai sentìa nissun ne capise el significato.
Ghe xe cussì le parołe fate, le quali qualche volta le conpone le frasi fate, e po...?
Po ghe xe i "concèti fati". Lori i xe pì difìsili da identificar, dato che i sorze da'l insenbre de frasi no necesariamente "fate", e anca eséndo sostansialmente senpre eguali, no i ga na forma ùnica e reconosìbile. Tìpico de un concèto fato el xe la evidensa che'l no sia sorto inte'l pensiero de chi lo esterna, ma che'l sia da lu soltanto rinbalzà, proveniente da fora, come evidentemente za sucede con le frasi fate.
El xe terìbile, anzi normal, ma tuti rasonemo in grandìsima prevalensa par concèti fati. Quando esprimemo na opinion che credemo nostra, ripetemo quasi senpre queło che da asè altri el xe za stà espreso, speso asè mejo che da noaltri. Ma parché parlo de "noaltri"? Me dispiaze par "voaltri", ma mi me ciamo fora, no parché la prevalensa dei mii pensieri no la sia costituìa da concèti fati, (e mi ben so che'l lo xe parché cussì el xe par ogni èser uman), ma parché na parte dei concèti che i me frùla in testa non i xe concèti fati. E fao l'esenpio de tuta sta riflesion su i concèti fati, che no go leto o sentìo da nissuna parte e go gavù da pensàrmela tuta da soło.
Se xe cussì orgogliosi de le pròprie opinion, ma le opinion no le xe pròprie, se difende tenacemente le pròprie idee che no le xe pròprie... ma da indove vien tute ste opinion e idee che no le xe nostre anca paréndone che le lo sia e che le ne fa parlar par concèti fati? Ebe, lore le ne vien da le persone con le quali parlemo, ovviamente (el xe stà cussì da senpre), e... da la television.
Scoltando do persone discùter o litigar de polìtica se sentirà, formalmente pezorà, tuta queła schiera de concèti fati che retrovaremo in qualunque programa polìtico televisivo. La diferensa tra na persona e l'altra la se riduse a la diferente conposision del cocktail de concèti fati che ognun el ospita inte la pròpria mente.
Tuto questo no'l xe particolarmente negativo. El pol risultar noioso, ma el xe un concèto fato piutosto siòco sostegnir che'l sia negativo. I concèti fati i xe in un serto senso archetipi, e in quanto tali necesariamente comuni a granda quantità de persone. El xe cussì che fonsiona la comunicasion tra èseri umani. Se no comunicàsimo fasendo uso in grandìsima prevalensa de concèti fati, la pì parte de le volte no riusiresimo asolutamente a capirse a vicenda.
Tutavia, ognun dei milioni e milioni de sìngoli pasi inte'l progreso cultural che inte i mileni el ne ga portà a distìnguerse senpre pì dai altri animali, el xe stà conpìo in virtù de la capasità de tute quełe persone che no le se ga acontentà de rasonar par concèti fati, e le ga conseguentemente evolvù anca serti originali concèti pròpri. No èser sodisfati de pensar inte i soli tèrmini de le pur necesarie concèti fati el xe cussì el primo paso par contribuir a l'evolusion de la spece umana.
Sistematicamente demolir chiunque el se sotrae a la confortante consuetùdine de rasonar par concèti fati, invese, el significa agir in diresion contraria a l'evolusion de l'èser uman.
I concèti fati i xe indispensàbili, parché i permete a le persone de comunicar a un acetàbile liveło de realtà (qualunque cosa sta oscura frase la posa significar).
I concèti originali i serve invese soltanto a'l progreso de la umanità, cussì non i xe indispensàbili, benché i sia altamente auspicàbili.
Acenarò infine a queło che par mi el xe el zinbeło dei concèti: el concèto fato travestìo da concèto original. Che patetichesa la susita in mi la fiera e oscena ostentasion de un concèto presunto original, presunto "novo", presunto "autènticamente pròprio", presunto "intelisente" o ancora pezo "genial", in realtà evidentemente "fato", ovaro preconfesionà, precoto e stracoto. El concèto fato no'l xe in sé negativo. Ma el diventa redìcolo e patètico quando el milanta de èser queło che no'l xe, ovaro un concèto novo e original. L'èser uman el esibise le so miserie manco dignitose quando el presume de èser o de far queło che no'l xe e no'l fa.
Riasumendo: La frase fata la xe sensa dubio la quintesensa de un concèto fato, ma se pol esprìmer concèti fati anca sensa ricórer a le frasi fate. Tuti queli che i se conpiaze de no parlar par frasi fate, i analiza i so concèti par verificar se i sia fati o manco. Se ve dà fastidio analizar i vostri concèti, ciapè a bersajo queli dei altri. Sercè de capir quanto de un concèto el sia el prodoto de la mente che lo ga espreso, e quanto el sia invese la pura ripetision de argomenti za sentìi in tute le salse, cussì queło che mi ciamo un concèto fato.
Par ancuo el xe tuto. Scusème se no me son ategnù a concèti fati, e scusème ancora de pì se invese lo go fato.

Roberto Quaglia