Caru Maurizio Costanzo Show,

onni tantu in sa vida bi cheret imitare sa publitzidade, o fintzas prus ispissu, suba de totu si si dat contu a sa publitzidade etotu.
Tando apo pensadu chi fiat obligatòriu, pro mie, ti fàghere una oferta ispetziale fintzas deo, comente sos publitzitàrios nos ant imparadu chi siat bene fàghere.
A su prètziu de una sola lìtera, oe, ti nde ispedisco fintzas chimbe. Chimbe lìteras a su Maurizio Costanzo Show a su prètziu de una!
At a èssere oe su Gigi Picetti chi in me si cuat a las àere produidas. No lu naro tantu a tie, cantu lu arregordo a issu e a mie.

Caru Maurizio Costanzo Show,
Tèngio 49 annos e mesu e no mi so mai cojuadu.
Mi so mantesu lìberu e arricchidu de esperièntzia, de informatzione.
Mi ritèngio a su passu cun sos tempos e narant chi no so poi gasi male estèticamente.
No so pelau, no tèngio sa brente, e tèngio belle totu sos dentes mios.
Tzertu, pro carrela mi boto a abbaidare sas piseddhas, e calicuna mi istratzat fintzas unu cummentu, pro comente est e comente andat bestida.
Ma cando fia piseddu fiat difìtzile s'approtzu (no faeddemus poi de sa cunclusione) proite sas fèminas fiant totu timoradas.
Immoe chi b'at su liberalismu e totu est permìtidu antzis a àere pudore si faghet bruta figura, sas giòvanas chi si regalant a sos tzerpitzeddos coetàneos issoro rifughint dae una persone sana e madura comente a mie chi diat ischire in prus las satisfàghere cun cumpetèntzia.
Domando proite a custas giòvanas no interessant sos òmines cun sa u majùscula e si basiòtigant e si istrùssiant a onni cantone bastat chi siant de sos issoro. Pro mie custu est ratzismu. Sinono, piseddhas de immoe, rispondide proite.

Caru Maurizio Costanzo Show,
A mie praghet meda iscrìere. Tzertas bortas mi iscapat pròpiu de iscrìere. Iscrio a su ristorante, spetzie a pustis mandigadu, subra sos tovagliolos. Iscrio in sas salas de isetu de istatzione e dentistas. Iscrio fintzas in su gabinetu, subra sa carta personale mia. Totu sos amigos e parentes mios fintzas malignos apretziant sas cosas chi iscrio cando las sutopòngio, so andadu in redatziones de giornales e rivistas e dae belle totu sos editores de Milanu, ma mi so semper intesu rispòndere: sighi gasi chi est andende bene, torra a colare prus a in antis, etc. Proite tando sas cosas chi iscrio andant bene a su pùblicu e no a chie pùblicat?
Est chistione de amighèntzias, de racumandatziones, no chèrgio pensare de màfia?
Si cherides potzo bènnere a bos agatare cun unu pagu de fògios, isco fintzas lèghere bene, e poi creo chi siat semper mègius chi una cosa la legat chie l'at iscrita, proite mègius de issu nemos la connoschet. Tèngio pàginas subra belle totu sos argumentos, dipendet ite bos interessat.
Ispero chi custa mia atopet su favore bostru e intantu cumplimentos pro una trasmissione chi pròpiu bi cheriat.

Caru Maurizio Costanzo Show,
So pòveru, domando in giru dinari dae bint'annos.
Però lu fatzo cun educatzione e no chèrgio èssere insistente. Finas a immoe sa gente est semper istada gentile cun megus e no m'at mai fatu mancare nudda. Però si no fiat chi so istadu prevvidente in custos annos immoe mi diat agatare in sèrias dificultades. No faeddo gasi isceti pro interessu personale, ma fintzas pro àteros comente a mie chi istant peus.
Totus narant chi b'at sa crisi de su capitale e nemos si est acatadu chi b'at fintzas cussa de sos ispìtzios. Tra sos drogados chi si pòrtant a foras sas 100 liras cun arrogàntzia, sos piseddhigheddos chi ponent sas 200 in sas machineddas de sos giogos automàticos, sos noos telèfonos a monedas dae 100 e 200 e 500 sena resto, sos parchìmetros chi nde ingullint totu sa die e, dulcis in fundo, o mègius "in cauda venenum" sas machineddas de sos autobus chi in càmbiu de su biglietu si pigant sas 50, sas 100, sas 200 e a Milanu immoe apo ischidu fintzas sas 500, ite abbarrat de dare a unu poborittu? No tzertu sos dinaris de carta o sos assignos circolares (bellos tempos de sos mini-assignos!) ispetzialmente a Gènova.
Ma lu ischint cussos chi ponent custas màchinas mandiga-dinari a onni crotzìcu chi cumprint un'atu gravemente antisotziale?
Nos cherent redùere a sa fàmine, nois chi no pesamus subra sa economia de su traballu e nos arrangiamus in pròpiu?
Domando a guvernantes e amministradores pùblicos chi mèditent subra su problema si cherent fintzas su votu nostru, e siant una borta tantu issos chi sos problemas nos los creant a agatare sa solutzione.

Caru Maurizio Costanzo Show,
est sa prima borta chi mi detzido a iscrìere a una trasmissione, e isceti proite apo ischidu chi a beru b'at unu ispàtziu lìberu a sas opiniones de sos telespetadores, chi gasi podent collaborare a sa tzivile discussione tra sa gente.
Bèngio luego a su dunca pro bos espònnere su casu chi mi istat a coro: deo apo semper fumadu sas sigaretas Nazionali Semplici senza Filtro, siat pro economia, siat pro abitùdine. Su prètziu si est semper mantesu prus che atzetàbile proite est notu chi custas sigaretas las tenimus in su panieri, tochende su cale si ispostat sa iscala mòbile o mègius a nàrrere sa contingèntzia.
Totu diat andare bene si sas suddetas Nazionali si agatarent in consigna dae sos vàrios tabacaios de Gènova. Ma gira gira est semper prus difìtzile a las àere, siat proite narant chi nde consignant pagas, siat proite forsis no dia chèrrere pensare male ma sos tabacaios las riservant probabilmente a amigos e parentes chi si las prenotant e acaparrant.
Faeddende de custu problema Domìniga 20 de Santandria in unu Bar de Corso Sardegna cun svàrios amigos est sartadu a foras chi si diat pòdere obligare su Monopòliu a fàghere in modu chi unu produtu fatu pro su cunsumu populare siat a beru agatàbile in sa cantidade giusta a su bisòngiu chi nde tenent sos fumadores suos. E comente podet fàghere custu?
Totus ischint chi si si andat in unu panifìtziu e si domandat su pane comunu a s'abba, cussu prus pagu caru, su panateri etotu chi est isproveddadu est tentu a consignare a s'acuirente su pane de prètziu chi tenet immediatamente a su de subra, ma (importante) a su MATESSI prètziu de cussu prus econòmicu chi no si agatat in conditzione de fornire.
Tando un'amigu fidadu meu naraiat chi su legale suo (in una Càusa in Pretura pro frunidos de su bighinu de subra) l'aiat garantidu chi si podet fàghere eguale fintzas pro sas Nazionali Semplici, si no las dant aende a su postu issoro sas Super senza filtro dae 400 liras e si nemmancu custas bi sunt, sas Alfa dae 700 liras e via pesende finas a su tipu chi tenent, però semper a 230 liras a su pachetu comente sas Nazionali Semplici.
Si totus adotaramus custu sistema no diamus èssere prus leados in giru dae unu Guvernu chi faghet finta de pensare a su pòpulu suo e poi no faghet abbastantza sigaretas pro su bisòngiu de sos fumadores prus populares.
Gasi faghende diant èssere obligados pro no bi pèrdere a fàghere prus Nazionali e sena riscu pro nois si no cussu de fumare semmai una sigareta prus cara a su matessi importu.
Si tra sos ispetadores bostros b'at un'Avocadu diat gradire cunfirma in su sensu de su chi apo espostu, chi est giai comente naro pàrere de unu legale.
Gràtzias de sa ospitalidade e un'appellu a totu sos fumadores de Nazionali Semplici senza filtro a èssere aunidos e cumpatos in sos sacrosantos deretos nostros.

Caru Maurizio Costanzo Show,
Traballo in portu saltuariamente e so fintzas apassionadu de fotografia. Totu sas bortas chi arribat una nae giaponesa mi arràngio cun su pagu inglesu chi màstico a mi fàghere ispiegare dae s'echipàgiu sas novidades fotogràficas chi si pòrtant in segus. Mèrcuris coladu sunt falados unu grupu de custos giaponesos totu cun sa Nikon e su teleobietivu.
Lis apo pedidu proite nudda normale e grandàngulos e m'ant fatu cumprèndere chi pro sos gatos chi depiant fotografare no andaiant bene.
Unu mancinante m'at chèrfidu nàrrere chi issos in Giappone tenent una manna fàbrica industriale de unu tamburru naradu "sciamisen" chi benit costruidu cun pedde de gatu o fintzas cunillu.
Sa die a pustis in Sottoripa los apo becados isperdidos pro sas caleddas chi faghiant a beru sas fotos a sos gatos.
Immoe, deo no tèngio particulare simpatia pro sos felinos, ma no mi istat bene chi custos giaponesos faghent sos tamburros issoro cun sos gatos nostros.
No mi dilungo prus, provvedat chie de dovere.

Caru Maurizio Costanzo Show,
So unu pensionadu de Piazza Terralba de setantases annos.
Cun custas bellas dies de sole chi nos regalat s'ierru, s'àtera manzanu so andadu a mi pigare s'aera bona a sa Villa Imperiale.
Comente mi so sètzidu subra sa prima banca mi so agatadu una siringa piantada in su daesegus.
Est mai possìbile chi un'onestu tzitadinu chi at traballadu tota sa vida arriscat sa tossicodipendèntzia involontària proite lassant in giru custas siringas chi poi mi si piantant in culu? Iscusade s'espressione ma so pròpiu fora de me.

Gigi Picetti

Lassa unu Cummentu. Lege sos cummentos de sos àteros. Mi praghet! Mi praghet! Mi praghet! Ìndighe de sas lìteras. Cubertina. Ma chie est Roberto Quaglia?