Cjâr Maurizio Costanzo Show,

ogni tant te vite bisugne imitâ la publicitât, o ancje plui dispès, soredut se si i da bade ae publicitât stesse.
Alore o ai pensât che al jere obligatori, par me, fâti une ufierte speciâl ancje jo, come che i publicitaris nus àn insegnât che al è ben fâ.
Al presit di une letare sole, vuê, ti 'nt spedìs adiriture cinc. Cinc letaris al Maurizio Costanzo Show al presit di une!
Al sarà vuê il Gigi Picetti che si plate in me a vêlis produsudis. No lu dîs tant a ti, trop che ju ricuardi a lui e a me.

Cjâr Maurizio Costanzo Show,
O ai 49 agns e mieç e no mi soi mai sposât.
Mi soi tignût libar e inricjît di esperience, di informazions.
Mi ten al pas cui timps e a disin che no soi po cussì mâl esteticamentri.
No soi pelât, no ai la panse, e o ai cuasi ducj i dincj miei.
Di sigûr, pe strade mi volti a cjalâ lis fantatis, e cualchidune mi strape ancje un coment, par cemût che e je e cemût che e va vistude.
Ma cuant che o jeri zovin al jere dificil l'aproç (no fevelìn po de conclusion) parcè che lis feminis a jerin dutis timoradis.
Cumò che al è il liberalisim e dut al è permetût anzit a vê pudôr si fâs brute figure, lis zovinis che si regalin ai lôr teppistei coetanis a scjampin di une persone sane e madure come me che e savarès in plui sodisfâlis cun competence.
O domandi parcè che a chestis zovinis no ur interessin i oms cu la o maiuscule e si businin e si strissin in ogni cjanton baste che a sedin dai lôr. Par me chest al è razisim. Se no, fantatis di cumò, rispuindêt parcè.

Cjâr Maurizio Costanzo Show,
A mi mi plâs une vore scrivi. Cualchi volte mi scjampe pròpit di scrivi. O scrîf tal ristorant, soredut dopo mangjât, sui tavaiuts. O scrîf tes salis di spiete di stazions e di dentiscj. O scrîf ancje te toilette, su la mê cjarte personâl. Ducj i miei amîs e parincj ancje triscj a preseen lis robis che o scrîf cuant che ur ju met denant, o soi lât in redazions di gjornâi e rivistis e di cuasi ducj i editôrs di Milan, ma mi soi simpri sintût rispuindi: ch'al continui cussì che al sta lant ben, ch'al torni a passâ plui indevant, ecc. Parcè alore lis robis che o scrîf i van ben al public e no a cui che al publiche?
Ise cuistion di amiciziis, di racomandazions, no vuei pensâ di mafie?
Se o volês o pues vignî a cjatâus cun cualchi sfuei, o sai ancje lei ben, e po o crôt che al sedi simpri miôr che une robe le lei cui che le à scrite, parcè che miôr di lui nissun le cognòs. O ai pagjinis su cuasi ducj i argoments, al dipent ce che us interesse.
O speri che cheste mê e cjati il vuestri favôr e intant compliments par une trasmission che e coventave pròpit.

Cjâr Maurizio Costanzo Show,
O soi puar, o domandi ator bêçs di vincj agns.
Però lu fâs cun educazion e no vuei jessi insistent. Fin cumò la int e je simpri stade gentile cun me e no mi à mai fat mancjâ nuie. Però se nol fos che o soi stât previdint in chescj agns cumò mi cjatarès in dificoltâts seriis. No fevel duncje dome par interès personâl, ma ancje par altris come me che a stan piês.
Ducj a disin che e je la crisi dal capitâl e nissun no si è inacuart che e je ancje chê dai spics. Tra i drogâts che si puartin vie lis 100 liris cun arogance, i fruts che a metin lis 200 tes machinutis dai zûcs automatics, i gnûfs telefons a monedis di 100 e 200 e 500 cence rest, i parchimetris che int glotin dute la dì e, dulcis in fundo, o miôr "in cauda venenum" lis machinutis des coriieris che in cambi dal biliet si cjolin lis 50, lis 100, lis 200 e a Milan cumò o ai savût ancje lis 500, ce restial di dâ a un puaret? No di sigûr i bêçs di cjarte o i assegns circolârs (biei timps dai mini-assegns!) soredut a Gjenue.
Ma lu savino chei che a metin chestis machinis mangjebêçs a ogni crosade che a fasin un at gravementri antisociâl?
Nus vuelino ridusi ae fan, nô che no pesìn su la economie dal lavôr e si rangjìn di bessôi?
O domandi ai governants e ai aministradôrs publics che a meditin sul probleme se a vuelin ancje il nestri vôt, e che a sedin une volte tant lôr che i problemis nus ju crein a cjatâ la soluzion.

Cjâr Maurizio Costanzo Show,
al è la prime volte che mi decît a scrivi a une trasmission, e dome parcè che o ai savût che pardabon al è un spazi libar pes opinions dai telespetadôrs, che cussì a puedin colaborâ ae discussion civîl tra la int.
O ven subit al dunque par esponius il câs che mi sta a cûr: jo o ai simpri fumât lis cigaretis Nazionali Semplici cence Filtri, un pôc par economie, un pôc par usance. Il presit si è simpri tignût plui che acetabil parcè che al è savût che chestis cigaretis lis vin te craçute, e tocjantle si sposte la scjale mobile o miôr la contingjence.
Dut al larès ben se lis Nazionali ditis si cjatassin in consegne dai tabachins di Gjenue. Ma zire zire al è simpri plui dificil vêlis, sedi parcè che a disin che int consegnin pocjis, sedi parcè che forsit no volarès pensâ mâl ma i tabachins lis tegnin probabilmentri par amîs e parincj che si lis prenotin e lis cjapin dutis.
Fevelant di chest probleme Domenie ai 20 di Novembar intun Bar di Corso Sardegna cun diviers amîs al è saltât fûr che si podarès obleâ il Monopoli a fâ in mût che un prodot fat pal consum popolâr al sedi pardabon cjatabil te cuantitât juste ae bisugne che int àn i siei fumadôrs. E cemût podê fâ chest?
Ducj a san che se si va intun pancôr e si domande dal pan comun a l'aghe, chel mancul cjâr, il pancôr stes che al è cence al è tignût a consegnâ al compradôr il pan di presit che al à subit parsore, ma (impuartant) al STES presit di chel plui economic che nol è in condizion di dâ.
Alore un gno amì fidât al diseve che il so avocat (intune Cause in Pretura pai rumôrs dal vicin di parsore) i veve garantît che si pues fâ compagn ancje pes Nazionali Semplici, se no lis dan vint al lôr puest lis Super cence filtri di 400 liris e se nancje chestis no son, lis Alfa di 700 liris e vie in sù fin al tip che a àn, però simpri a 230 liris al pachet come lis Nazionali Semplici.
Se ducj cuancj o adotassin chest sisteme no saressin plui cjolts vie di un Guvier che al fâs fente di pensâ al so popul e po nol fâs avonde cigaretis pe bisugne dai fumadôrs plui popolârs.
Cussì fasint a saressin obleâts par no rimetisi a fâ plui Nazionali e cence riscji par nô se no chel di fumâ semai une cigarete plui cjare ae stesse cifre.
Se tra i vuestris spetadôrs al è un Avocat o gradissarès conferme tal sens di ce che o ai esponût, che al è za come che o dîs il parê di un avocat.
Graciis de ospitalitât e un apel a ducj i fumadôrs di Nazionali Semplici cence filtri a jessi unîts e compats tai nestris dirits sacrosants.

Cjâr Maurizio Costanzo Show,
O lavori tal puart ogni tant e o soi ancje apassionât di fotografie. Ogni volte che e rive une nâf gjaponese mi rangji cul pôc di inglês che o mastii a fâmi spiegâ dal ecuipaç lis novitâts fotografichis che si puartin daûr. Miercus passât a son dismontâts un grup di chescj gjaponês ducj cu la Nikon e il teleobietîf.
Ur ai domandât parcè nuie normâi e grandangui e mi àn fat capî che pai gjats che a vevin di fotografâ no lavin ben.
Un mancinant al à volût dîmi che lôr in Gjapon a àn une grande fabriche industriâl di un tamburo clamât "sciamisen" che al ven fat cu la piel di gjat o ancje di cunin.
Il dì dopo in Sottoripa ju ai cjapâts sparniçâts pai vicui che a fasevin pardabon lis fotos ai gjats.
Cumò, jo no ai une simpatie particolâr pai felins, ma no mi va ben che chescj gjaponês a fasin i lôr tamburos cui nestris gjats.
No mi slungji plui, che al proviodi cui che al à il dovê.

Cjâr Maurizio Costanzo Show,
O soi un pensionât di Piazza Terralba di setantesîs agns.
Cun chescj biei dîs di soreli che nus regale l'Unviar, chê altre matine o soi lât a cjapâ la arie buine te Villa Imperiale.
Apene che mi soi sentât su la prime bancje mi soi cjatât une siringhe plantade tal daûr.
Isal mai pussibil che un onest citadin che al à lavorât dute la vite al riscji la tossicodipendence involontarie parcè che a lassin ator chestis siringhis che po mi si plantin tal cûl? Scusait la espression ma o soi pròpit fûr di me.

Gigi Picetti

Lasse un Coment. Lei i coments di chei altris. Mi plâs! Mi plâs! Mi plâs! Indiç des letaris. Cuviertine. Ma cui isal Roberto Quaglia?