Car Maurizio Costanzo Show,

ogni tant in la vita ghe voeur imità la püblicità, o anca pussee spess, soratütt se se dà a trà a la püblicità istessa.
Alora hoo pensaa che l'era obbligatòri, per mì, fàt ona oferta special anca mì, come i püblicitari ne hann imparaa che el sia ben fà.
Al prezz de ona sola lettera, incoeu, te ne spedissi adiritüra cinch. Cinch letter al Maurizio Costanzo Show al prezz de vüna!
El sarà incoeu el Gigi Picetti che in mì se cela a avèi prodott. El disi minga tant a tì, quant el regordi a lü e a mì.

Car Maurizio Costanzo Show,
Gh'hoo 49 ann e mezz e me sont mai sposaa.
Me sont tegnüü lìber e arricchii de esperienza, de informazion.
Me retegni al pass coi temp e disen che sont poeu minga inscì mal estèticament.
Sont minga pelaa, gh'hoo minga la panscia, e gh'hoo quasi tütt i mè dent.
Cert, per strada me giri a vardà i tosann, e quaicedüna la me strappa anca on coment, per com'l'è e come la va vestida.
Ma quand seri fioeu l'era difìcil l'approcc (parlom minga poeu de la conclüsion) perché i fèmen èren tütt timoraa.
Adess che ghe n'è el liberalism e tütt l'è permess anzi a avègh püdor se fa brütta figüra, i gioven che se regàlen ai teppisitt coetani lor rifüggen de ona persòna sana e madüra come mì che saparía oltretütt sodisfàrei con competenza.
Domandi perché a sti gioven interèssen minga i òmen con la u maiüscola e se sbaciüccen e se strüscen a ogni canton basta che sìen di lor. Per mì quest l'è razzism. Se de no, tosann de adess, rispondii perché.

Car Maurizio Costanzo Show,
A mì me pias assee scriv. Certi voeult me scapa propri de scriv. Scrivi al ristorant, speci dopo mangiaa, sü i tovagioeu. Scrivi in di sal de aspett de stazion e dentista. Scrivi anca in del gabinett, sü la mia carta personal. Tütt i mè amis e parent anca malign apprèzzen i robb che scrivi quand i sottoponi, sont andaa in redazion de giornai e rivist e de quasi tütt i editor de Milan, ma me sont semper sentii respond: continua inscì che el va ben, ripassa pussee innanz, ecc. Perché alora i robb che scrivi vann ben al püblich e minga a chi el püblica?
L'è question de amicizi, de racomandazion, voeuri minga pensà de mafia?
Se volii poeudi vegnì a trovàvv con on poo de foeui, soo anca leng ben, e poeu credi che el sia semper mej che ona roba la leng chi l'ha scrivüda, perché mej de lü nissün la conoss. Gh'hoo pàgin sü quasi tütt i argoment, el dipend cossa ve interessa.
Speri che sta mia la incontra el voster favor e intant compliment per ona trasmission che propri ghe voreva.

Car Maurizio Costanzo Show,
Sont pover, domandi intorna i danee de vint'ann.
Però el foo con edücazion e voeuri minga vess insistent. Fina adess la gent l'è semper stada gentil con mì e la m'ha mai faa mancà nagott. Però se el füss minga che sont staa prevident in sti ann adess me trovaría in seri dificoltà. Parli minga inscì domà per interess personal, ma anca per alter come mì che stann pesg.
Tücc disen che ghe n'è la crisi del capital e nissün el s'è incorgiaa che ghe n'è anca quela di spìcioi. Tra i drogaa che se pòrten via i 100 lir con arroganza, i tosanitt che mèten i 200 in di machinett di gioeugh automàtich, i noeuv telèfon a monet de 100 e 200 e 500 senza rest, i parchìmeter che ne ingòien tütt el dì e, dulcis in fundo, o mej "in cauda venenum" i machinett di autobüs che in càmbi del bigliett se ciàppen i 50, i 100, i 200 e a Milan adess hoo savüü anca i 500, cossa el resta de dà a on poveritt? Minga cert i danee de carta o i assegn circolar (bej temp di mini-assegn!) specialment a Gènova.
Ma el sann quii che mèten sti màchin magnadanee a ogni crocicc che còmpien on att gravement antisocial?
Ne voeuren ridür a la fam, nün che pesom minga sü la economia del lavorà e se rangiom in propri?
Domandi a governant e aministrador püblich che mèditen sü el problema se voeuren anca el nòster vòt, e sìen ona voeulta tant lor che i problema ne i crèen a trovà la solüzion.

Car Maurizio Costanzo Show,
l'è la prima voeulta che me decidi a scriv a ona trasmission, e domà perché hoo savüü che denver ghe n'è on spazi lìber ai opinion di telespettador, che inscì pöden colaborà a la civil discüssion tra la gent.
Vegni sübit al dunque per esponv el cas che me sta a coeur: mì hoo semper fümaa i sigarett Nazionali Semplici senza Filtro, o per economia, o per abitüdin. El prezz el s'è semper mantegnüü pussee che accettàbil perché l'è nòto che sti sigarett i tegnom in del paner, tocand el quala se sposta la scala mòbil o mej a dì la contingenza.
Tütt andaría ben se i sudett Nazionali se trovassen in consegna di vari tabachitt de Gènova. Ma gira gira l'è semper pussee difìcil avèi, sia perché disen che ne consègnen poch, sia perché forsi voraría minga pensà mal ma i tabachitt i rivèrven probabilment a amis e parent che se i prenòten e acapàrren.
Parland de sto problema Domènega 20 Novèmber in on Bar de Corso Sardegna con svariaa amis l'è saltaa foeura che se podaría obbligà el Monopòli a fà in mœud che on prodott faa per el consüm popolar el sia denver trovàbil in la quantità giüsta al bisogn che ne gh'hann i sò fümador. E come podè fà quest?
Tücc sann che se se va in on panifizi e se domanda del pan comün a l'acqua, quel men car, el panatee istess che l'è sprovedüü l'è tegnüü a consegnà a l'acquirent el pan de prezz che el gh'ha immediatament a quel de sora, ma (important) al STESS prezz de quel pussee econòmich che se troeuva minga in condizion de fornì.
Alora on mè amis fidaa el diseva che el sò legal (in ona Causa in Pretüra per rümor del visin de sora) el gh'aveva garantii che se pö fà istess anca per i Nazionali Semplici, se i dann minga avend al post lor i Super senza filter de 400 lir e se nanca quist ghe n'è, i Alfa de 700 lir e via salend fina al tipo che gh'hann, però semper a 230 lir al pachett come i Nazionali Semplici.
Se tütt quant adotassem sto sistema saríom pü ciapaa in gir de on Govern che el fa finta de pensà al sò pòpol e poeu el fa minga abastanza sigarett per el bisogn di fümador pussee popolar.
Inscì fasend saríen obbligaa per minga rimetteregh a fà pussee Nazionali e senza rìsigh per nün se de no quel de fümà semai ona sigaretta pussee cara al stess import.
Se tra i voster spettador ghe n'è on Avocat gradiría conferma in del senso de quell espost, che l'è giamò come disi parer de on legal.
Grazie de la ospitalità e on apell a tütt i fümador de Nazionali Semplici senza filter a vess ünii e compatt in di sacrosant nòster dirit.

Car Maurizio Costanzo Show,
Lavori in pòrt saltüariament e sont anca apassionaa de fotografia. Tütt i voeult che riva ona nav giaponesa me rangi col poo de inglés che mastighi a fàm spiegà del equipagg i novità fotogràfich che se pòrten dree. Mèrcol scors hinn sortii on grüpp de sti giaponés tütt con la Nikon e el teleobbiettiv.
Gh'hoo domandaa perché nagott normal e grandàngol e m'hann faa capì che per i gatt che gh'aveven de fotografà andaven minga ben.
On mancinant el m'ha volüü dì che lor in Giapon gh'hann ona grossa fàbrica indüstrial de on tambür ditt "sciamisen" che el vegn costrüii con pell de gatt o anca conili.
El dì dopo in Sottoripa i hoo becaa sparpaiaa per i vicoi che faseven denver i fòto ai gatt.
Adess, mì gh'hoo minga particolar simpatia per i felin, ma me sta minga ben che sti giaponés fann i sò tambür con i nòster gatt.
Me dilonghi pü, provveda chi de dover.

Car Maurizio Costanzo Show,
Sont on pensionaa de Piazza Terralba de setantases ann.
Con sti bej dì de sol che ne regala l'invern, l'altra matina sont andaa a ciapàm l'aria bona a la Villa Imperiale.
Come me sont setaa sü la prima panca me sont trovaa ona siringa piantada in del deretan.
L'è mai possìbil che on onest cittadin che el gh'ha lavoraa tütta la vita el rìsiga la tossicodipendenza involontaria perché làssen intorna sti siringh che poeu me se piànten in cül? Scüsee l'espression ma sont propri foeura de mì.

Gigi Picetti

Lassa on Coment. Leng i coment di alter. Me pias! Me pias! Me pias! Ìndes di letter. Copertina. Ma chi l'è Roberto Quaglia?