Câo Maurizio Costanzo Show,

ògni tànto inta vìtta bézeugna imitâ a publiçitæ, ò ascì ciù despésso, sorviatùtto se se dâ a mente a-a publiçitæ mæxima.
Alôa ò pensòu ch'o l'êa oblïgatöio, pe mì, fâte 'na ofèrta speciâle ascì mì, cómme i publiçitâri ne l'àn insegnòu ch'o segge bén fâ.
A-o prêxo de 'na sôla lettia, ancheu, te ne màndo adiritûa çìnque. Çìnque lettie a-o Maurizio Costanzo Show a-o prêxo de ùnn-a!
O saiâ ancheu o Gigi Picetti ch'in mì o se çéla a avéile prodûte. No ô dîggo tànto a tì, quànto ô regòrdo a lê e a mì.

Câo Maurizio Costanzo Show,
Ò 49 ànni e mëzo e no me són mâi sposòu.
Me són tegnûo lìbero e arichîo de esperiénsa, de informaçioìn.
Me retêgno a-o pàsso co-i ténpi e dîxan che no són dòppo coscì mâ esteticaménte.
No són pelòu, no ò a pànsa, e ò quæxi tûtti i dénti mæ.
Çèrto, pe-a stràdda me zîro a goardâ e figgie, e quàrchedùnn-a a me stràppa ascì 'n conménto, pe cómm'a l'é e cómme a va vestîa.
Ma quànde êa figeu o l'êa defìçile l'aproccio (no parlémmo dòppo da concluxón) perché e dònne êan tûtte timoæ.
Òua ch'gh'é o liberalìsmo e tûtto o l'é permìsso ànsi a avéi pudô se fâ brùtta figûa, e zóvie che se regàllan a-i seu teppistélli coetànei refûan da 'na persónna sànn-a e madûa cómme mì ch'o sàviéiva ôtretùtto sodisfâle con conpeténsa.
Dimàndo perché a ste zóvie no ghe interèssan i òmmi co-a u maiùscola e se sbaxuccan e se strùsccian a ògni cantón abàsta ch'e segian di lô. Pe mì questo o l'é razìsmo. Sednò, figgie de òua, rispondéi perché.

Câo Maurizio Costanzo Show,
A mì me piâxe tànto scrîve. De-e vòtte me scàppa pròpio da scrîve. Scrîvo a-o ristorànte, speçialménte dòppo mangiòu, in scî tovagliolìn. Scrîvo inte sâle d'aspêto de staçioìn e dentìsti. Scrîvo ascì inta toilette, in sce-a mæ càrta personâle. Tûtti i mæ amîxi e parénti ascì malìgni aprézzan e cöse che scrîvo quànde ê sottopóngo, són andæto in redaçioìn de giornâli e rivìste e da quæxi tûtti i editôri de Milàn, ma me són sénpre sentîo rispónde: o continoa coscì ch'o stâ andàndo bén, o repàsse ciù avànti, ecc. Perché alôa e cöse che scrîvo vàn bén a-o pùblico e no a chi o pùblica?
O l'é question de amixìçie, de racomandaçioìn, no vêuggio pensâ de mâfia?
Se voéi pòsso vegnî a trovâve con 'n pö de fêuggi, sò ascì léze bén, e dòppo créddo ch'o segge sénpre mêgio che 'na cösa a â lêze chi a l'à scrîta, perché mêgio de lê nisciùn a â conósce. Ò pàgine in sce quæxi tûtti i argoménti, o depénde cöse ve interèssa.
Spêro che sta mæ a incóntre o vòstro favô e intànto conpliménti pe 'na trasmiscion ch'a pròpio ghe voéiva.

Câo Maurizio Costanzo Show,
Són pôvero, dimàndo in gîro i dinæ da vint'ànni.
Però ô fàsso con educaçión e no vêuggio èse inscisténte. Finn'òua a génte a l'é sénpre stæta gentîle con mì e no m'à mâi fæto mancâ ninte. Però se no fîse che són stæto previdénte in sti ànni òua me atroviéiva in sêrie defìçili. No pàrlo coscì sôlo pe interèsse personâle, ma ascì pe âtri cómme mì ch'e stàn pézo.
Tûtti dîxan ch'gh'é a crîxi do capitâle e nisciùn o s'é acòrto ch'gh'é ascì quélla di spìccioli. Tra i drogæ ch'e se pòrtan vîa e 100 lîre con arogànsa, i figeu ch'e méttan e 200 inte machinétte di zêughi automàtichi, i nêuvi telêfoni a monæe da 100 e 200 e 500 sénsa rèsto, i parchìmetri ch'e ne ingòggian tûtto o giórno e, dulcis in fundo, ò mêgio "in cauda venenum" e machinétte di àutobus ch'in scàngio do bigétto se pìggian e 50, e 100, e 200 e a Milàn òua ò savûo ascì e 500, cöse o rèsta da dâ a 'n poverétto? No çèrto i dinæ de càrta ò i asségni circolâri (bèi ténpi di mini-asségni!) speçialménte a Zêna.
Ma ô sàn quélli ch'e méttan ste màchine mangiadinæ a ògni crozêu ch'e conpìscian 'n àtto graveménte antisociâle?
Ne vêuan ridûe a-a fàmme, niâtri che no pezémmo in sce l'economîa do travàggio e se arrangémmo in pròpio?
Dimàndo a governànti e aministratôri pùblici ch'e meditésan in sciô problêma se vêuan ascì o nòstro vôto, e ch'e segian 'na vòtta tànto lô ch'i problêmi ne ê crêan a atrovâ a soluçión.

Câo Maurizio Costanzo Show,
a l'é a primma vòtta che me decîddo a scrîve a 'na trasmiscion, e sôlo perché ò savûo che veramente gh'é 'n spàçio lìbero a-e opinioìn di telespetatôri, ch'e coscì pêuan collaborâ a-a çivîle discusción tra a génte.
Vêgno sùbito a-o dónca pe espónve o câxo ch'o me stâ a cheu: mì ò sénpre fumòu e sigarétte Nazionâli Sénplici sénsa Fìltro, segge pe economîa, segge pe abitùdine. O prêxo o s'é sénpre mantegnûo ciù che acetàbile perché o l'é nòto che ste sigarétte ê émmo into panê, toccàndo o quæ se spòsta a scâla mòbile ò mêgio a dî a contingénsa.
Tûtto o l'andiéiva bén se e suçitæ Nazionâli se atrovésan in conségna da-i vâri tabacchìn de Zêna. Ma zîra zîra o l'é sénpre ciù defìçile avéile, segge perché dîxan ch'e ne conségnan pöche, segge perché fòrsci no voriéiva pensâ mâ ma i tabacchìn ê resèrvan probabilménte a amîxi e parénti ch'e se ê prenòtan e acapàran.
Parlàndo de sto problêma Domênega 20 Novénbre inte 'n Bar de Corso Sardegna con divèrsci amîxi o l'é saltòu feua che se poriéiva oblïgâ o Monopòlio a fâ in mòddo che 'n produto fæto pe-o consùmmo popolâre o segge veramente atrovàbile inta quantitæ giùsta a-o bezéugno ch'e ne l'àn i seu fumatôri. E cómme podéi fâ questo?
Tûtti sàn che se se va inte 'n panifìçio e se dimànda do pàn comùn a l'ægoa, quéllo mêno câo, o panatê mæximo ch'o l'é sprovvedûo o l'é tegnûo a consegnâ a-o acatatô o pàn de prêxo ch'o l'à immediataménte a-o de sorva, ma (inpurtànte) a-o MÆXIMO prêxo de quéllo ciù econòmico ch'o no se atrêuva in condiçión de fornî.
Alôa 'n mæ amîgo fidòu o dixéiva che o seu legâle (inte 'na Càuza in Pretûa pe rumôri do vexìn de sorva) o gh'avéiva garantîo che se pêu fâ ugoâle ascì pe-e Nazionâli Sénplici, se no ê dàn avéndo a-o seu pòsto e Super sénsa fìltro da 400 lîre e se manco ste chì ghe són, e Alfa da 700 lîre e vîa montàndo fìnn-a a-o tîpo ch'e l'àn, però sénpre a 230 lîre a-o pacchétto cómme e Nazionâli Sénplici.
Se tûtti quànti adotàssimo sto sistêma no saiéiscimo ciù piggæ in gîro da 'n Govèrno ch'o fâ fìnta de pensâ a-o seu pòpolo e dòppo o no fâ abàsta sigarétte pe-o bezéugno di fumatôri ciù popolâri.
Coscì fâzéndo saiéivan oblïgæ pe no remettighe a fâ ciù Nazionâli e sénsa rîxego pe niâtri se no quéllo de fumâ semmâi 'na sigarétta ciù câa a-o mæximo impòrto.
Se tra i vòstri spetatôri gh'é 'n Avocâto gradiéiva confèrma into sénso de quéllo espòsto, ch'o l'é za cómme dîggo parê de 'n legâle.
Gràçie de l'ospitalitæ e 'n apèllo a tûtti i fumatôri de Nazionâli Sénplici sénsa fìltro a èse unîi e conpàtti inti nòstri sacrosànti drîti.

Câo Maurizio Costanzo Show,
Travàglio in pòrto saltuariaménte e són ascì apascionòu de fotografîa. Tûtte e vòtte ch'o rîva 'na nâve giaponéize me arràngio co-o pöco ingléize che màstego a fâme spiegâ da l'equipàggio e novitæ fotogràfiche ch'e se pòrtan derê. Mercoledì passòu són dexéixi 'n grùppo de sti giaponéixi tûtti co-a Nikon e o teleobietîvo.
Gh'ò dimandòu perché ninte normâli e grandàngoli e m'àn fæto capî che pe-i gàtti ch'e dovéivan fotografâ no andâvan bén.
'N mancinànte o m'à vorsûo dî ch'lô in Giapón àn 'na gròssa fàbrica industriâle de 'n tànbano dîto "sciamisen" ch'o vêgne costruîo con pélle de gàtto ò ascì conìglio.
O giórno dòppo in Sottoripa ê ò beccæ spàrsci pe-i carûggi ch'e fâzéivan pe davéi e fòto a-i gàtti.
Òua, mì no ò particolâre sinpatîa pe-i felìn, ma no me stâ bén ch'sti giaponéixi fàssan i seu tànbani co-i nòstri gàtti.
No me dilóngo ôtre, ch'o provvéde chi de dovéi.

Câo Maurizio Costanzo Show,
Són 'n penscionòu de Piazza Terralba de setantasêi ànni.
Con sti bèi giórni de sô che ne regàlla l'invèrno, l'âtra matìn són andæto a piggiâme l'âia bónn-a a-a Villa Imperiale.
Cómme me són assêtòu in sce-a primma cadrêga m'è atrovòu 'na sirìnga piantâ into deré.
O l'é mâi poscìbile ch'un onèsto çitadìn ch'o l'à travagiòu tûtta a vìtta o rîxegue a toscicodipendénsa involontâria perché làscian in gîro ste sirìnghe ch'e dòppo me se piàntan into cûo? Scuzæ l'espresción ma són pròpio feua de sénn-e.

Gigi Picetti

Làscia 'n Conménto. Lézi i comménti di âtri. O me piâxe! O me piâxe! O me piâxe! Ìndice de lettie. Copertìnn-a. Ma chi l'é Roberto Quaglia?