ma chi el se crede de èser queł là che son mi quando me vien la inteligensa? Con qual dirito el ne fa la prèdica che po no go capìo gnanca cosa che'l ga da baucar tanto? No so se'l ga leto la so ùltima letaracia, che la se la ciapa co i filòsofi, che forse i xe l'ùltima brava gente che ghe xe, che no la ga mai robà gnente a nissun, fora de fato ai filòsofi del pasà, che però i xe morti cussì anca legalmente no i posède pì gnente e anca i sinquant'ani da la so morte i xe za pasà e come dise la SIAE i ga perso i diriti su le so idee e cussì i filòsofi che i dopara le so idee par filosofegiar e guadagnarse onestamente el pan istruendo le persone ignoranti no i ghe roba proprio gnente.
Scusè el sfogo, ma ghe tegno che lo savì che mi me disòsio da queło che digo quando me sucede queła cosa là de la inteligensa. Durante la inteligensa no son proprio mi, el xe come n'altra persona drento de mi che la vien fora, come la paràboła del dotor jechill e mister haidy, e no poso venir condanà par colpe che no le xe psicologicamente mie.
Mi i filòsofi li rispeto. I xe senpre asè calmi, i parla con vose rilasante che la me rilasa. Ogni tanto me indormenso, ma el xe colpa mia che no son abastansa intelisente (par fortuna). I filòsofi i xe persone calme, che le ga pasà la vita a pensar, e che giustamente le ga capìo tuto, anzi, le ga capìo che le gaveva capìo tuto za mijara de ani fa. Dopotuto la verità la xe una soła e la xe sénplise, altrimenti come gavaria fato a capirla za i greghi, che i pasava i tenpi a far le orge? Na volta po no'l xe che i filòsofi li incontravi par strada, opur sì ma no li reconosevi. No ghe gera de fato la television che la te li faseva véder e la te diseva: eco lu el xe un filòsofo. In sto senso i gera davero svantazà, penso mi. Ma i gera lo steso colti, basta pensar che i saveva anca el greco antico.
Mi son convinto che par esenpio la Gresia la xe ancora piena de filòsofi. Anca l'Italia no la scherza. I dise senpre a la television che l'Italia la xe el paese con pì cultura del mondo. Mi ghe credo, parché dopotuto son italian.
El pì groso filòsofo del mondo el xe Cristo. Ghe son rivà dopo tant'ani che ghe penso quando inte'l mio sarvèło no ghe xe queł là che ve go za dito con tuti pensieri conplicà che no i serve gnente, e che soratuto no i serve a capir. Cristo el gera un groso filòsofo, e de fato lo insegna ancora a scoła e i fa ben. Lu el diseva de fato un saco de cose saje, e anca filosòfiche. Beati i ùltimi. El xe fàsile par un camèło pasar par la cruna de un ago. E po quando el spacava el pan lo moltiplicava davero, de fato ghe ne gera senpre par tuti, e quando el divideva i pesi el cavava anca la lisca. El xe par questo che li divideva in do. Scusè, questo no'l ghe trase gnente, ma a mi me piaze asè i pesi, ma serco de no magnarne tropi parché i me ga dito che i contien el fòsforo che'l fa diventar intelisenti, e i inteligentoni in famija ghe ne basta e vansa uno, che po saria queł che ghe sta anca lu drento del mio sarvèło e che'l te scrive anca lu le létere che te prego de scusarle. No'l lo fa aposta. El xe che no'l riese a farne de manco.
Naturalmente de sòlito no le capiso le teorie filosòfiche. A parte Cristo, che'l dise cose che tuti pol capir, come Funari, i altri par che i lo fa aposta a conplicar le cose. Par questo no go pì provà a lézer i so libri. El xe mejo sentir in television i filòsofi che i parla de filosofia, el xe pì rilasante. Purtropo li fa véder poco parché i basa i indici de ascolto. Ma queło che i dise el ga un son asè piasévole, basta no star a sercar de far i inteligentoni par capir proprio tuto. Basta capir le cose prinsipali. Come el fato che inte la vita ghe vol filosofia, che ghe vol conportarse ben, che ghe vol gaver bon senso. El xe proprio queło che go senpre pensà, e son content che i filòsofi i xe d'acordo con mi. Soratuto Cristo, tuti i lo adora giustamente par el fato relizoso, ma la vera natura soa la gera de far el filòsofo, de spiegar a la gente come se se conporta. Ama el pròsimo tuo. La xe na frase cussì sénplise, epuro la xe tra le pì inportanti del mondo. Mi no lo so miga se Buddha o Maometto i ga dito qualcosa de cussì beło e profondo, e se i lo ga dito no i lo ga dito in Italian, che la xe la lengua che sona pì ben inte'l mondo, come tuti i italiani i sarà d'acordo con mi.
Un mio amigo contadin el gera un groso filòsofo. Quando vegneva la sera, el saveva senpre come vegneva el tenpo el giorno dopo. Vardando le formìgołe, el capiva anca el tenpo na setimana prima. El gera amà da tute le vache, che'l rispetava da vero cristian. El gera anca na persona istruìa, el faseva sentir Beethoven a le vache par farghe far el late pì bon, e cussì fasendo el istruiva anca le vache. Se qualcun el xe un bon filòsofo, se'l vol el riese a farse capir anca da le vache, penso mi. Se no'l riese a farse capir gnanca da le so vache, che rasa de filòsofo el xe?
El pì groso filòsofo italian el xe queł là De Crescenzo. Giustamente el ga guadagnà asè miliardi insegnando la filosofia a le persone sénplisi come mi.
Come vedì, no'l xe nesesàrio far i inteligentoni par méterse a parlar de filosofia. El mio visin de casa de sora (che'l sta inte'l apartamento de sora) el ga descoverto la mujer che la stava insenbre a un omo che no'l gera lu (el visin de casa), insenbre in senso anca sesual, ovaro soratuto, e alora el ghe ga dà na cortełada. Questa la xe mancansa de filosofia, digo mi. Se lu el gavese leto i libri de De Crescenzo, mi digo che no ghe dava na cortełada. Soratuto se el se meteva a lézerli invese de ndar a vardar cosa faseva la so mujer. E anca se el studiava un poco de parołe de Cristo, ma no par la relizon che ghe xe là drento, ma par la filosofia. El ghe ga dà la cortełada proprio par la mancansa de la so filosofia. E anca queł là che'l se ga fato becar con queła mujer a leto, se el gera un poco pì filòsofo no'l se ciapava queła cortełada. Se el gera pì filòsofo no'l se lasava tentar da la carne de eła, o almanco el stava un poco pì atento, insoma.
Eco, caro Maurizio Costanzo Show, queło che te voleva dir su la filosofia te lo go dito.

Roberto Quaglia