ma cui si crodial di jessi chel li che o soi jo cuant che mi ven la inteligjence? Cun ce dirit nus fasial la predicje che po no ai capît nancje ce che al à di berlâ tant? No sai se al à let la sô ultime letaraçe, che si le cjol cui filosofs, che forsit a son l'ultime brave int che e je, che no à mai robât nuie a nissun, fûr che di fat ai filosofs dal passât, che però a son muarts duncje ancje legalmentri no àn plui nuie e ancje i cincuante agns de lôr muart a son za passâts e come che e dîs la SIAE a àn pierdût i dirits su lis lôr ideis e duncje i filosofs che a doprin lis lôr ideis par filosofâ e vuadagnâsi in mût onest il pan istruint lis personis ignorantis no ur robin pròpit nuie.
Scusait il sfogo, ma o ten che lu savês che jo mi dissocii di ce che o dîs cuant che mi sucêt chê robe là de inteligjence. Dilunc de inteligjence no soi pròpit jo, al è come une altre persone dentri di me che e ven fûr, come la parabule dal dotôr jechill e mister haidy, e no pues jessi condanât par colpis che no son psicologjichementri mês.
Jo i filosofs ju rispieti. A son simpri une vore calms, a fevelin cuntune vôs rilassante che mi rilasse. Ogni tant mi indurmidis, ma e je colpe mê che no soi avonde inteligjent (par furtune). I filosofs a son personis calmis, che a àn passât la vite a pensâ, e che cun reson a àn capît dut, anzit, a àn capît che a vevin capît dut za miârs di agns indaûr. Dopo dut la veritât e je une sole e e je semplice, se no cemût varessino fat a capîle za i grecs, che a passavin il timp a fâ lis orgjis? Une volte po no je che i filosofs tu ju intopavis pe strade, o ben sì ma no tu ju ricognossevis. No jere difat la television che ti ju faseve viodi e ti diseve: ve lui al è un filosof. In chest sens a jerin pardabon svantazâts, o pensi jo. Ma a jerin compagn colts, al baste pensâ che a savevin ancje il grêc antîc.
Jo o soi convint che par esempli la Grecie e je ancjemò plene di filosofs. Ancje la Italie no sta mâl. A disin simpri te television che la Italie e je il paîs cun plui culture dal mont. Jo i crôt, parcè che dopo dut o soi talian.
Il plui grant filosof dal mont al è Crist. O soi rivât dopo tancj agns che o pensi cuant che tal gno cerviel nol è chel là che us ai za dit cun ducj i pinsîrs complicâts che no coventin a nuie, e che soredut no coventin a capî. Crist al jere un grant filosof, e difat lu insegnin ancjemò a scuele e a fasin ben. Lui al diseve difat un grum di robis sapientis, e ancje filosofichis. Beâts i ultins. Al è facil par un camêl passâ pe crune di une gusiele. E po cuant che al rompeve il pan lu moltiplicave pardabon, difat al 'nd jere simpri par ducj, e cuant che al divideve i pes al gjavave ancje la spine. Al è par chest che ju divideve in doi. Scusait, chest nol c'entre nuie, ma a mi mi plasin une vore i pes, ma o cîr di no mangjânt masse parcè che mi àn dit che a àn dentri il fosfar che al fâs deventâ inteligjents, e di inteligjentons in famee int baste e al vanze un, che po al sarès chel che al è ancje lui tal gno cerviel e che ti scrîf ancje lui lis letaris che ti prei di scusâi. Nol fâs a pueste. Al è che nol rive a fâ di mancul.
Naturalmentri di solit no lis capìs lis teoriis filosofichis. Fûr di Crist, che al dîs robis che ducj a puedin capî, come Funari, chei altris al semee che lu fasin a pueste a complicâ lis robis. Par chest no ai plui provât a lei i lôr libris. Al è miôr sintî te television i filosofs che a fevelin di filosofie, al è plui rilassant. Par disgracie ju fasin viodi pôc parcè che a sbassin i indiçs di scolt. Ma ce che a disin al à un sun une vore plasevul, baste no stâ a cirî di fâ i inteligjentons par capî pròpit dut. Al baste capî lis robis principâls. Come il fat che te vite e covente filosofie, che bisugne compuartâsi ben, che bisugne vê bon sens. Al è pròpit ce che o ai simpri pensât, e o soi content che i filosofs a son dacuardi cun me. Soredut Crist, ducj lu adorin cun reson pal fat religjôs, ma la sô vere nature e jere di fâ il filosof, di spiegâ ae int cemût che si compuarte. Ame il to prossim. E je une frase cussì semplice, epûr e je tra lis plui impuartantis dal mont. Jo no lu sai mighe se Budda o Maomet a àn dit alc di cussì biel e profont, e se lu àn dit no lu àn dit par talian, che e je la lenghe che e sune miôr tal mont, come che ducj i talians a saran dacuardi cun me.
Un gno amì contadin al jere un grant filosof. Cuant che e vignive la sere, al saveve simpri cemût che al vignive il timp il dì dopo. Cjalant lis furmiis, al capive ancje il timp une setemane prime. Al jere amât di dutis lis vacjis, che al rispietave di vêr cristian. Al jere ancje une persone istruide, ur faseve sintî Beethoven aes vacjis par fâur fâ il lat plui bon, e cussì fasint al istruive ancje lis vacjis. Se cualchidun al è un bon filosof, se al vûl al rive a fâsi capî ancje des vacjis, o pensi jo. Se nol rive a fâsi capî nancje des sôs vacjis, ce raze di filosof isal?
Il plui grant filosof talian al è chel là De Crescenzo. Cun reson al à vuadagnât tancj miliarts insegnant la filosofie aes personis semplicis come me.
Come che o viodês, nol è necessari fâ i inteligjentons par metisi a fevelâ di filosofie. Il gno vicin di cjase di parsore (che al sta tal apartament di parsore) al à scuviert la femine che e jere dutun cuntun om che nol jere lui (il vicin di cjase), dutun in sens ancje sessuâl, cioè soredut, e alore i à dât une curtisade. Cheste e je mancjance di filosofie, o dîs jo. Se lui al ves let i libris di De Crescenzo, jo o dîs che no i dave une curtisade. Soredut se si meteve a leiju invezit di lâ a cjalâ ce che e faseve sô femine. E ancje se al studiave un pôc lis peraulis di Crist, ma no pe religjon che e je li dentri, ma pe filosofie. I à dât la curtisade pròpit pe sô mancjance di filosofie. E ancje chel li che si è fat cjapâ cun chê femine tal jet, se al jere un pôc plui filosof no si cjapave chê curtisade. Se al jere plui filosof no si lassave tentâ de cjar di jê, o almancul al stave un pôc plui atent, insome.
Ve, caro Maurizio Costanzo Show, ce che ti volevi dî su la filosofie tal ai dit.

Roberto Quaglia