ma chi se crede 'e essere chillu llà ca songo io quanno me vène 'a intelligenza? Cu quale diritto ce fa 'a prèdeca ca po' nun aggio capito manco che cosa tène 'a alluccà tanto? Nun saccio si ha liggiuto 'a ùrtema letteraccia soja, ca se 'a piglia cu 'e filòsofe, ca fórzo sò ll'ùrtema brava gente ca ce sta, ca nun ha maje arrubbato niente a nisciuno, fora defatte a 'e filòsofe d''o passato, ca però sò muorte accussì pure legalmente nun possèdono cchiù niente e pure 'e cinquant'anne dâ morte lloro sò già passate e comme dice 'a SIAE hanno perzo 'e diritte ncopp'a 'e idee lloro e accussì 'e filòsofe ca adopèrano 'e idee lloro pe filosofeggià e se guadagnà onestamente 'o ppane istruenno 'e perzone ignorante nun lle arròbbano proprio niente.
Scusate 'o sfogo, ma ce tengo ca 'o sapite ca io me dissocio 'a chello ca dico quanno me succede chella cosa llà d''a intelligenza. Durante 'a intelligenza nun songo proprio io, è comme 'n ata perzona dint'a me ca vène fora, comme 'a paràbbola d''o dottor jechill e mister haidy, e nun pòzzo venì condannato pe corpe ca nun sò psicologgecamente mije.
Io 'e filòsofe 'e rispetto. Sò sempe assaje carme, pàrlano cu voce rilassante ca me rilassa. Ogne tanto m'addormo, ma è corpa mia ca nun songo abbastanza 'ntelligente (pe furtuna). 'E filòsofe sò perzone carme, ca hanno passato 'a vita a penzà, e ca giustamente hanno capito tutto, anze, hanno capito ca avèvano capito tutto già migliara 'e anne fa. Doppotutto 'a verità è una sola e è semplice, altrimenti comme avarrìano fatto a 'o capì già 'e greche, ca passàvano 'e tiempe a fa 'e orge? 'Na vota po' nun è ca 'e filòsofe 'e 'ncuntrave pe via, oppure sì ma nun 'e ricanuscive. Nun ce steva defatte 'a televisione ca te 'e faceva vedé e te diceva: ecco isso è 'nu filòsofo. 'N stu senzo èrano overamente svantaggiate, penzo io. Ma èrano 'o stesso colte, abbasta penzà ca sapèvano pure 'o greco antico.
Io songo cunvinto ca pe esempio 'a Grecia è ancora china 'e filòsofe. Pure ll'Italia nun scherza. Dìcono sempe â televisione ca ll'Italia è 'o paese cu cchiù cultura d''o munno. Io ce credo, pecché doppotutto songo italiano.
'O cchiù gruosso filòsofo d''o munno è Cristo. Ce songo arrivato doppo tant'anne ca ce penzo quanno dint'ô cerviello mio nun ce sta chillu llà ca v'aggio già ditto cu tutte penziere cumplicate ca nun sèrvono niente, e ca suprattutto nun sèrvono a capì. Cristo era 'nu gruosso filòsofo, e defatte ll'insègnano ancora a scola e fanno bene. Isso diceva defatte 'nu sacco 'e cose sagge, e pure filosòfeche. Beate ll'ùrteme. È facile pe 'nu cammello passà p''a cruna 'e 'n ago. E po' quanno spezzava 'o ppane 'o moltiplicava overamente, defatte ce ne steva sempe pe tutte, e quanno divideva 'e pisce luvava pure 'a lisca. È pe chesto ca 'e divideva 'n dduje. Scusate, chesto nun ce trase niente, ma a me me piàcciono assaje 'e pisce, ma cerco 'e nun ne magnà troppe pecché m'hanno ditto ca contènono 'o fòsforo ca fa addiventà 'ntelligente, e 'e intelligentune 'n famiglia ne abbasta e avanza uno, ca po' sarrìa chillo ca ce sta pure isso dint'ô cerviello mio e ca te scrive pure isso 'e llettere ca te prego 'e lle scusà. Nun 'o fa apposta. È ca nun riesce a ne fa a meno.
Naturalmente 'e sòleto nun 'e capisco 'e teurìe filosòfeche. A parte Cristo, ca dice cose ca tutte pòzzono capì, comme Funari, ll'ate pare ca 'o fanno apposta a complicà 'e cose. Pe chesto nun aggio cchiù pruvato a lèggere 'e libbre lloro. È meglio sentì 'n televisione 'e filòsofe ca pàrlano 'e filosofia, è cchiù rilassante. Purtroppo 'e fanno vedé poco pecché abbàssano 'e indice 'e ascolto. Ma chello ca dìcono tène 'nu suono assaje piacèvole, abbasta nun stà a cercà 'e fa 'e intelligentune pe capì proprio tutto. Abbasta capì 'e cose principale. Comme 'o fatto ca dint'â vita ce vo' filosofia, ca ce vo' se cumpurtà bene, ca ce vo' tené bbuono senzo. È proprio chello ca aggio sempe penzato, e songo cuntiento ca 'e filòsofe sò d'accordo cu me. Suprattutto Cristo, tutte ll'adòrano giustamente p''o fatto religgioso, ma 'a vera natura soja era 'e fa 'o filòsofo, 'e spiegà â gente comme ce se cumporta. Ama 'o pròssemo tuo. È 'na frase accussì semplice, eppure è tra 'e cchiù 'mpurtante d''o munno. Io nun 'o saccio mica si Buddha o Maometto hanno ditto quaccosa 'e accussì bbello e prufonno, e si ll'hanno ditto nun ll'hanno ditto 'n Italiano, ca è 'a lengua ca sona cchiù bbene dint'ô munno, comme tutte 'e italiane sarranno d'accordo cu me.
'N amico contadino mio era 'nu gruosso filòsofo. Quanno veneva 'a sera, sapeva sempe comme veneva 'o tiempo 'o juorno doppo. Guardanno 'e fummìcole, capeva pure 'o tiempo 'na semmana primma. Era amato 'a tutte 'e vacche, ca rispettava 'a vero cristiano. Era pure 'na perzona istruita, faceva sentì Beethoven a 'e vacche pe lle fa fa 'o llatte cchiù bbuono, e accussì facenno istrueva pure 'e vacche. Si quaccheduno è 'nu bbuono filòsofo, si vo' riesce a se fa capì pure d''e vacche, penzo io. Si nun riesce a se fa capì manco d''e vacche soje, che razza filòsofo è?
'O cchiù gruosso filòsofo italiano è chillu llà De Crescenzo. Giustamente ha guadagnato assaje miliarde 'nzignanno 'a filosofia a 'e perzone semplice comme a me.
Comme vedite, nun è necessario fa 'e intelligentune pe se mèttere a parlà 'e filosofia. 'O vicino 'e casa mio 'e ncoppa (ca sta dint'ô appartamento 'e ncoppa) ha scuperto 'a mugliera ca steva 'nzieme a 'n ommo ca nun era isso ('o vicino 'e casa), 'nzieme 'n senzo pure sessuale, ovèro suprattutto, e allora ll'ha dato 'na cortellata. Chesta è mancanza 'e filosofia, dico io. Si isso avesse liggiuto 'e libbre 'e De Crescenzo, io dico ca nun lle dava 'na cortellata. Suprattutto si se metteva a 'e lèggere 'mméce 'e ì a guardà che faceva 'a mugliera soja. E pure si studiava 'nu poco 'e parole 'e Cristo, ma nun p''a religgione ca ce sta llà dinto, ma p''a filosofia. Ll'ha dato 'a cortellata proprio p''a mancanza 'e filosofia soja. E pure chillu llà ca s'è fatto beccà cu chella mugliera a lietto, si era 'nu poco cchiù filòsofo nun se pigliava chella cortellata. Si era cchiù filòsofo nun se lassava tentà dâ carne 'e essa, o almeno steva 'nu poco cchiù attiento, 'nzomma.
Ecco, caro Maurizio Costanzo Show, chello ca te vuleva dìcere ncopp'â filosofia te ll'aggio ditto.

Roberto Quaglia