ghe xe delìrio e delìrio el fato che mi ogni tanto esibiso na serta conpetensa inte'l sprolòquio la xe opinàbile ancuo me xe suceso de seguir el corso dei seguenti pensieri che i coreva da lu par la mìnima bugerà la vagina soa e la cocincina soa le ga i schei e cussì le ga senpre ragion lore no lo sposaria gnanca se'l fuse l'ùltimo omo a'l mondo e po le ga qualcosa de curioso le tose lore senpre a odorar da tute le parti quełe sporcacione la me domandava se queło che faseva el gaveva cativo odor e che la voleva che fasese se no queł oro forse che rasa de domande se ghe la spalmava un poco dapartuto su queł viso vecio tuto rughe co i mii conplimenti gavaria capìo alora la pasa ben pasa cosa da come la ne parlava la pensava la parlase de la roca de Gibilterra a propòsito la xe na bela invension davero però dopo me piaze lassarme ndar zoso inte la tasa forsando el pì posìbile e po tirar la cadena par nafiarla ben ponture de spiło giace però l'altro sistema el ga i so vantaji la saveva senpre da come la faseva Milly la creatura se la gaveva i vermi o no però ghe dà schei lo steso quant'è dotor prego na ghinea e la me domandava se la gaveva omision de frequente ma indove le va a sercar quełe parołe quei parucconi omision con quei oci da mìope che la me gaveva incoło de traverso no me saria fidà a farme dar el cloroformio o Dio sa cos'altro però me piaseva quando el se ga messo a sédar a scrìver tuto cussì sèrio e aciglià naso cussì intelisente a'l diàvoło bruto busiardo Oh tuto queło che se vol manco che un idiota el gera abastansa svejo da incorzersene via dipendeva tuto da'l pensar a lu e a le so létere mate Steła mia tuto queło che riguarda el splèndido Corpo tuo tuto sotolineà che'l vien da là la xe na cosa de belesa e de gioia par l'eternità qualcosa che'l ga trovà in qualchedun dei so libri stùpidi mi senpre a le prese 4 o 5 volte a'l giorno e ghe diseva de no e sicura Oh sì la ga dito son sicurìsima in un serto senso ghe go tapà la boca la saveva queło che stava par venir debolesa natural e basta el xe stà lu che'l me ga esità no so come da la primìsima sera che se semo incontrà quando el stava a Rehoboth Terrace el xe restà in pie a vardarse par almanco 10 minuti come se se fusimo za incontrà da qualche parte credo par via che'l gera ebreo go ciapà da la mama me divertiva alora le cose che'l diseva con queł soriso indolente suo e tuti i Doyle i diseva che'l se saria portà deputà Oh sèma nà che no gero altro a crédar a tute quełe ciàcole soe su la autonomia irlandese e la union nasional el me ga mandà queła barba de romansa dei Ugonoti da cantar in franse parché la faseva pì fina O beau pays de la Touraine no la go mai cantà gnanca na volta un saco de spiegasion e filastroche su la relizon e la persecusion no te fa godér gnente naturalmente e po el podeva lu soło a la prima ocasion in via de favor che ghe capitava a Brighton square el ga coresto inte la mia càmera da leto fasendo finta de èserse macià le man co l'inchiostro par lavàrsele con queł savon a'l solfaro e late de Albion che alora el doparava el gera ancora drento a l'invòlucro trasparente Oh son s'ciopà da la risa queł giorno a pensarghe el xe mejo che no ghe fasa na seduta fin a la matina su sto afar i gavaria da far vasi de dimension natural in modo che na fémena la posa sédar incoło comodamente lu el se inzenocia par farla mi digo che no ghe xe in tuto el mondo un altro che'l ga le so abitùdini varda queł modo che'l ga de dormir a i pie del leto come fa'l sensa un cavesal duro manco mal che no'l tira càlsi senò me faria saltar tuti i denti el respira co la man su'l naso come queł dio indian che'l me ga portà a véder na doménega piovosa a'l museo de Kildare street tuto zało con un grembiulin steso su'l fianco apoià a na man co le dita dei pie fora che lu el diseva la gera na relizon pì granda de queła dei ebrei e del Nostro Signor messe insenbre in tuta l'Àsia lo imita com'el xe abitùdine soa de imitar a tuti credo che anca lu el dormise co la testa a i pie del leto con quełe piote squadrà in boca a la mujer che sudisiaria comunque indove go messo quełe pese ah sì lo so speremo che l'armàdio no'l scricioła ah lo saveva lu el dorme sodo el se deve èser divertìo el ghe deve gaver fato spénder ben i so schei naturalmente miga la ga gavùa gratis Oh che scociada spero che ghe sia riservà qualcosa de mejo inte l'altro mondo a ligarse tuti cussì Dio ne scanpe e lìbera par stanote va ben cussì e deso el vecio leto bosołoso e tintinante el me ricorda senpre el vecio Cohen el se ghe deve èser gratà speso drento e lu el crede che papà lo ga conprà da Lord Napier che mi amirava la creatura parché ghe lo gaveva dito pian pian Oh come se sta ben a leto Dio ridemo come el sòlito dopo sédese ani in quante case saremo stà Raymond terrace e Ontario terrace e Lombard street e Holles street e lu el se ne va atorno fisciando ogni volta che'l se deve slozar senpre quei ugonoti o la marcia de le rane fasendo finta de giutar i òmeni con quei 4 stechi de mòbili che gavemo e po l'albèrgo City Arms de pezo in pezo dise el provosto Daly queł postisin delisioso su'l pianerotoło senpre qualcun drento a pregar po tuti se lasava indrio tute le so spuse se sa senpre chi ghe xe stà par ùltimo e cosa ne disì de sti pensieri el cui corso ancuo me xe capità de seguir i fa schifo i xe bei el truco che go doparà par pensarli el xe un vecio truco go verto l'Ulisse de Joyce e ne go leto na pàgina intanto che i mii oci i coreva el testo me son retrovà sti parołe in mente e cussì sensa dubio le stava pensando za che ghe stava go par coinsidensa scrito in tenpo real queło che me pasava par la testa a'l ritmo fiso de la letura e eco alora vansar sta létera dopo la ciusura del libro e la scanparsa de quei pensieri da la mia testa cussì fora che par le prime vinti parołe sirca de sto toco e po deso a ripartir da qualche momento fa invese che delirar mi go lassà delirar Joyce e po disìme voaltri se lu a so tenpo e po anca dopo el so tenpo no'l ve ga ciapà par el culo a tuti.

Roberto Quaglia