ma chi se cred de vess quel là che sont mì quand me vègn l'inteligenza? Con qual diritt el ne fà la prèdica che poeu hoo nanca capii cossa el gh'ha de vosà tant? Soo minga se l'ha legiüü la soa ültima letteraccia, che se la ciapa con i filòsof, che forsi hinn l'ültima brava gent che ghe n'è, che l'ha mai robaa nagòtt a nissün, foeura defatti a i filòsof del passaa, che però hinn mòrt inscì anca legalment possèden pü nagòtt e anca i cinquant'ann de la lor mòrt hinn già passaa e come el dis la SIAE hann perdüü i diritt sora i lor idee e inscì i filòsof che dòperen i lor idee per filosofegià e guadagnàss onestament el pan istruend i persòn ignorant ghe ròben pròpi nagòtt.
Scüsee el sfogh, ma ghe tegni che el sappii che mì me dissòci de quell che disi quand me sücced quela ròba là de l'inteligenza. Durant l'inteligenza sont minga pròpi mì, l'è come on'altra persòna dent in mì che la vègn foeura, come la paràbola del dottor jechill e mister haidy, e pòdi minga vegnì condannaa per colp che hinn minga psicologicament mè.
Mì i filòsof i rispetti. Hinn semper assee calm, pàrlen con vos rilassanta che la me rilassa. Ògni tant me indòrmenti, ma l'è colpa mia che sont minga assee inteligent (per fortüna). I filòsof hinn persòn calm, che hann passaa la vita a pensà, e che giüstament hann capii tütt, anzi, hann capii che aveven capii tütt già miliara de ann fa. Dòpotütt la verità l'è vüna sola e l'è sempliz, altrimenti come avaríen faa a capìll già i grech, che passaven i temp a fà i òrgie? Ona vòlta poeu l'è minga che i filòsof i incontravet per strada, opür sì ma i riconossevet minga. Gh'era minga defatti la television che te i faseva vedè e la te diseva: ecco lü l'è on filòsof. In sto sens èren denver svantagiaa, pensi mì. Ma èren istess còlt, basta pensà che saveven anca el grech antìgh.
Mì sont convint che per esempi la Grecia l'è ancamò piena de filòsof. Anca l'Italia la schèrza minga. Dìsen semper a la television che l'Italia l'è el paes con pussee cültüra del mond. Mì ghe credi, perché dòpotütt sont italian.
El pü gròss filòsof del mond l'è Crist. Ghe sont rivaa dòpo tant'ann che ghe pensi quand dent in del mè cervell gh'è minga quel là che v'hoo già ditt con tütt penser complicaa che sèrven a nagòtt, e che soratütt sèrven minga a capì. Crist l'era on gròss filòsof, e defatti el insègnen ancamò a scòla e fann ben. Lü el diseva defatti on sacch de ròb sàvi, e anca filosòfich. Beaa i ültim. L'è fàcil per on camell passà per la crüna de on ago. E poeu quand el spezzava el pan el moltiplicava denver, defatti ghe n'era semper per tütt, e quand el divideva i pess el levava anca la lisca. L'è per questo che i divideva in düü. Scüsee, questo el ghe intra nagòtt, ma a mì me piasen assee i pess, ma cerchi de mangiàn minga tròpp perché m'hann ditt che conténen el fòsfor che fà deventà inteligent, e i inteligenton in famiglia ghe n'basta e avanza vün, che poeu sarìa quell che gh'è anca lü dent in del mè cervell e che el te scriv anca lü i letter che te preghi de scüsàj. El fà minga apòsta. L'è che el riess minga a fànn de men.
Natüralment de sòlit i capissi minga i teorìe filosòfich. A part Crist, che el dis ròb che tütt pòden capì, come Funari, i alter par che el fann apòsta a complicà i ròb. Per questo hoo pü proaa a lèng i lor liber. L'è mej sentì in television i filòsof che pàrlen de filosofìa, l'è pü rilassant. Pürtròpp i fann vedè pòcch perché abàssen i indis de ascolt. Ma quell che dìsen el gh'ha on son assee piasèvol, basta minga stà a cercà de fà i inteligenton per capì pròpi tütt. Basta capì i ròb principal. Come el fatt che in la vita ghe voeur filosofìa, che ghe voeur comportàss ben, che ghe voeur avè bon sens. L'è pròpi quell che hoo semper pensaa, e sont content che i filòsof hinn d'acòrd con mì. Soratütt Crist, tütt el adòren giüstament per el fatt religios, ma la soa vera natüra l'era de fà el filòsof, de spiegà a la gent come se se comporta. Ama el tò pròssim. L'è ona fras inscì sempliz, epür l'è tra i pü important del mond. Mì el soo mica se Buddha o Maometto hann ditt quaicòssa de inscì bell e profónd, e se ghe l'hann ditt ghe l'hann minga ditt in Italian, che l'è la lengua che la sona pü ben del mond, come tütt i italian sarann d'acòrd con mì.
On mè amis contadin l'era on gròss filòsof. Quand vegniva la sera, el saveva semper come vegniva el temp el dì dòpo. Vardand i formìghel, el capiva anca el temp ona setimana prima. L'era amaa de tütt i vacch, che el rispettava de ver cristian. L'era anca ona persòna istruida, el faseva sentì Beethoven a i vacch per fàgh fà el lacc pü bon, e inscì fasend el istruiva anca i vacch. Se quaidün l'è on bon filòsof, se el voeur el riess a fàss capì anca di vacch, pensi mì. Se el riess minga a fàss capì nanca di soo vacch, che razza filòsof l'è?
El pü gròss filòsof italian l'è quel là De Crescenzo. Giüstament l'ha guadagnaa assee miliard insegnand la filosofìa a i persòn sempliz come a mì.
Come vedii, l'è minga necessari fà i inteligenton per mettes a parlà de filosofìa. El mè visin de cà de sora (che el sta in del apartament de sora) l'ha descovert la miee che la stava insèma a on òmm che l'era minga lü (el visin de cà), insèma in sens anca sessüal, ovvèro soratütt, e alora el gh'ha daa ona cortelada. Questa l'è mancanza de filosofìa, disi mì. Se lü el aveva legiüü i liber de De Crescenzo, mì disi che el ghe dava minga ona cortelada. Soratütt se el se metteva a lèng inveci de andà a vardà cossa la faseva la soa miee. E anca se el stüdiava on poo i parol de Crist, ma minga per la religion che gh'è là dent, ma per la filosofìa. El gh'ha daa la cortelada pròpi per la soa mancanza de filosofìa. E anca quel là che el s'è faa becà con quela miee a lett, se el füss on poo pü filòsof el se ciapava minga quela cortelada. Se el füss pü filòsof el se lassava minga tentà de la carna de essa, o almen el stava on poo pü attent, insòmma.
Ecco, car Maurizio Costanzo Show, quell che te voeuri dì sora la filosofìa te l'hoo ditt.

Roberto Quaglia