ma chi o se crédde de èse quéllo lì che mì són quànde me vêgne l'inteligénsa? Con quæ drîto o ne fâ a prêdica ch'dòppo no ò capîo manco cöse o gh'à da urlâ tànto? No sò s'o l'à lézûo a seu ùrtima letteràssa, ch'a se â pîggia co-i filòsofi, ch'fòrsci són l'ùrtima bràva génte ch'gh'é, ch'no l'à mâi rubòu ninte a nisciùn, feua defæti a-i filòsofi do passòu, ch'però són mòrti coscì ascì legalménte no possêdan ciù ninte e ascì i çinquant'ànni da seu mòrte són za passæ e cómme a dîxe a SIAE àn pèrso i drîti in sce-e seu idêe e coscì i filòsofi ch'adêuvian e seu idêe pe filosofezâ e goagnâse onestaménte o pàn instruéndo e persónne ignorànti no ghe rûban pròpio ninte.
Scuzæ o sfógo, ma ghe têgno ch'ô sapéi che mì me dissòçio da quéllo ch'dîggo quànde me sucede quélla cösa là de l'inteligénsa. During l'inteligénsa no són pròpio mì, o l'é cómme 'n'âtra persónna drénto de mì ch'a vêgne feua, cómme a paràbola do dotô jechill e mister haidy, e no pòsso vegnî condannòu pe de-e córpe ch'no són pscologicaménte mæ.
Mì i filòsofi ê rispétto. Són sénpre tànto càrmi, pàrlan con vôxe rilassànte ch'a me rilàssa. Ògni tànto me indòrmo, ma o l'é córpa mæ ch'no són abàsta inteligénte (pe fortùnn-a). I filòsofi són persónne càrme, ch'àn passòu a vìtta a pensâ, e ch'giustaménte àn capîo tûtto, ànsi, àn capîo ch'avéivan capîo tûtto za migiæa de ànni fâ. Dòppotùtto a veitæ a l'é ùnn-a sôla e a l'é sénplice, sednò cómme aviéivan fæto a capîlo za i grêghi, ch'passâvan i ténpi a fâ e órge? 'Na vòtta dòppo no l'é ch'i filòsofi ti ê incontrâvi pe-a stràdda, ò pûre sci ma no ê reconoscéivi. No gh'êa defæti a televixón ch'a te ê fâzéiva védde e a te dixéiva: ècco lê o l'é 'n filòsofo. In sto sénso êan pe davéi svantagiæ, pénso mì. Ma êan o mæximo còrti, abàsta pensâ ch'savéivan ascì o grêgo antîgo.
Mì són convìnto che pe ezénpio a Grêcia a l'é ancón pìnn-a de filòsofi. Ascì l'Itàlia a no schèrsa. Dîxan sénpre a-a televixón ch'l'Itàlia a l'é o paîze con ciù cultûa do móndo. Mì ghe créddo, perché dòppotùtto són italiàn.
O ciù grànde filòsofo do móndo o l'é Crìsto. Ghe són rivòu dòppo tànti ànni ch'ghe pénso quànde into mæ çervèllo no gh'é quéllo là ch've l'ò za dîto con tûtti pensci conplicæ ch'no sèrvan ninte, e ch'sorviatùtto no sèrvan a capî. Crìsto o l'êa 'n grànde filòsofo, e defæti ô insègnan ancón a scêua e fàn bén. Lê o dixéiva defæti 'na mûggia de cöse sàvie, e ascì filozòfiche. Beâti i ùrtimi. O l'é fàçile pe 'n cammèllo passâ pe-a crénn-a de 'n àgo. E dòppo quànde o spessâva o pàn ô moltiplicâva pe davéi, defæti ghe n'êa sénpre pe tûtti, e quànde o divîdeva i pésci o cavâva ascì a résca. O l'é pe questo ch'ê divîdeva in dôi. Scuzæ, questo no ghe intra ninte, ma a mì me piâxan tànto i pésci, ma çèrco de no mangiâne tròppi perché m'àn dîto ch'contêgnan o fòsforo ch'fâ deventâ inteligénti, e de inteligentoìn in famìggia ne bàsta e avànsa ùn, ch'dòppo o saiéiva quéllo ch'gh'é ascì lê into mæ çervèllo e ch'o te scrîve ascì lê e lettie ch'te prêgo de scuzâghe. No ô fâ apòsta. O l'é ch'o no reûsce a fâne de mêno.
Naturalménte de sòlito no ê capìsço e teorîe filozòfiche. A pàrte Crìsto, ch'o dîxe de-e cöse ch'tûtti pêuan capî, cómme Funari, i âtri o pâ ch'ô fàn apòsta a conplicâ e cöse. Pe questo no ò ciù provòu a léze i seu lìbbri. O l'é mêgio sentî in televixón i filòsofi ch'pàrlan de filozofîa, o l'é ciù rilassànte. Pûrtròppo ê fàn védde pöco perché abàssan i ìndichi de ascólto. Ma quéllo ch'dîxan o l'à 'n seunno tànto piaxévole, abàsta no stâ a çercâ de fâ i inteligentoìn pe capî pròpio tûtto. Abàsta capî e cöse prinçipâli. Cómme o fæto che inta vìtta ghe vêu filozofîa, ch'bézeugna conportâse bén, ch'bézeugna avéi bón sénso. O l'é pròpio quéllo ch'ò sénpre pensòu, e són cónténto ch'i filòsofi són d'acòrdo con mì. Sorviatùtto Crìsto, tûtti ô adôran giustaménte pe-o fæto religiôzo, ma a seu vêa natûa a l'êa de fâ o filòsofo, de spiegâ a-a génte cómme se se conpòrta. Àmma o teu pròscimo. A l'é 'na fràze coscì sénplice, epûre a l'é tra e ciù inpurtànti do móndo. Mì no ô sò mìga se Buddha ò Maometto àn dîto quarcösa de coscì bèllo e profóndo, e se ô l'àn dîto no ô l'àn dîto in Italiàn, ch'o l'é a léngoa ch'a sêunna ciù bén into móndo, cómme tûtti i italièn saiàn d'acòrdo con mì.
'N mæ amîgo paizàn o l'êa 'n grànde filòsofo. Quànde vegnîva a sêia, o savéiva sénpre cómme vegnîva o ténpo o giórno dòppo. Goardàndo e formîghe, o capîva ascì o ténpo 'na setemànn-a prìmma. O l'êa amòu da tûtte e vàcche, ch'o rispetâva da vêo cristiàn. O l'êa ascì 'na persónna instruîa, o fâzéiva sentî Beethoven a-e vàcche pe fâghe fâ o làte ciù bón, e coscì fâzéndo o instruîva ascì e vàcche. Se quarchedùn o l'é 'n bón filòsofo, s'o vêu o reûsce a fâse capî ascì da-e vàcche, pénso mì. S'o no reûsce a fâse capî manco da-e seu vàcche, ch'ràssa filòsofo o l'é?
O ciù grànde filòsofo italiàn o l'é quéllo là De Crescenzo. Giustaménte o l'à goagnòu tànti miliàrdi insegnàndo a filozofîa a-e persónne sénplici cómme mì.
Cómme vedéi, no l'é necessârio fâ i inteligentoìn pe méttise a parlâ de filozofîa. O mæ vexìn de câza de sorva (ch'o stâ inte l'apartaménto de sorva) o l'à descovèrto a moggê ch'a l'êa insémme a 'n òmmo ch'no l'êa lê (o vexìn de câza), insémme in sénso ascì sessoâle, vêuo dî sorviatùtto, e alôa o gh'à dæto 'na cotelâ. Questa a l'é mancànsa de filozofîa, dîggo mì. Se lê o l'avésse lézûo i lìbbri de De Crescenzo, mì dîggo ch'no ghe dâva 'na cotelâ. Sorviatùtto s'o se mettéiva a lézili inveçe de anâ a goardâ cöse a fâzéiva seu moggê. E ascì s'o studiâva 'n pö e paròlle de Crìsto, ma no pe-a religión ch'gh'é lì drénto, ma pe-a filozofîa. O gh'à dæto a cotelâ pròpio pe-a seu mancànsa de filozofîa. E ascì quéllo lì ch'o s'é fæto beccâ con quélla moggê into léto, s'o l'êa 'n pö ciù filòsofo o no se piggiâva quélla cotelâ. S'o l'êa ciù filòsofo o no se lasciâva tentâ da-a càrne de lê, ò a-o mànco o stâva 'n pö ciù aténto, insómma.
Ècco, câo Maurizio Costanzo Show, quéllo ch'te voéiva dî in sce-a filozofîa te l'ò dîto.

Roberto Quaglia