ancuo no soporto i filòsofi. I filòsofi de ancuo. Go scominsià a mal soportarli in zóvane età, par la aparente inutilità dei argomenti con i quali i tentava de rénder el mio sarvèło pì sìmile a'l loro. Ma a queł tenpo no savevo, come so deso, in modo ciaro, preciso e enorme qual gera esatamente el mostruoso eror inte'l quale lori i xe fieri de condur la so vita.
Ghe gera na volta i filòsofi. Lori i gera la cùspide de la conosensa inte la società de cui i gera parte. I filòsofi i contegneva drento de sé tuto el scìbile noto, i saveva queło che ogni filòsofo del pasà el gaveva presedentemente savù, e su sta base lori i portava avanti la intiera conprension umana de un altro poco. Lori i saveva de fìsica come de ètica, de biologia come de moral e de astrofìsica. Lori i saveva tuto queło che ghe gera da saver parché queło che ghe gera da saver el podeva venir apreso in un arco de tenpo inferior a queło de la durà de na vita umana. Inte'l scuro de le scarne conosense che l'umanità faticosamente la sotraeva a l'Ignoransa, lori i brilava inte'l eroico gesto de diventar la espresion de la màsima sìntesi de le conosense posedùe da la spece umana del so tenpo.
Tuto questo el xe stà, e pì no'l xe. I ùltimi sento ani de storia umana i ga obnubilà i fulgori de sentenara de milioni de ani de evolusion de la vita su la tera. Sentenara de milioni de ani de evolusion prima che la vita marina la riusise a conquistar le tere emerse, altre sentenara de milioni par conquistar queła forma de cui ndemo tanto fieri, e deso, a manco de sento ani da la invension de la eletrisità eco la vita conquistar el spasio, rivar a la luna e con le artifisiali so propàgini ciamà sonde el sistema solar tuto. Eco la vita difóndarse a'l silìsio inte'l fenòmeno che inpropiamente ciamemo ancora "informàtica", eco el universo dei fenòmeni e de le idee farse rico come in tuta la storia de la vita no'l gera stà mai. Eco la storia de la vita stesa emèrzer da'l linbo de la ignoransa, eco na umanità geosèntrica, antroposèntrica, egosèntrica iluminarse de insospetàbili cosiense su le maravełe de queło che ciamemo evolusion, pèrdarse inte i abisi de tenpo ricavà da'l interogarse su'l significato del pasà, e spànder la pròpria idea de spasio verso confini siti a distanse vertizinose ma no asurde.
In sta fùlzida esplosion de evolusion, eco anca detriti fòsili a la deriva, tratà con na riverensa fòsile anca eła, quanto redìcoła. Eco par esenpio i filòsofi, tra le pì grotesche manifestasion de sto fòsile patetichesa, parché idealmente preposti a la conprension de queło che invese manifestamente i se dimostra del tuto incapasi de capir. Inte la vetusta so deriva, i fa anca inconsapévole siagurà esibision de la misera e oscena so orbité inteletual.
Queli che la società siocamente la se dileta a ciamar filòsofi, no i xe filòsofi. I ga desinparà la filosofia seguendo un corso de laurea in filosofia scadù mileni fa, i ga incancrenìo la so stolidità insegnando ai altri queło che'l ga gavù senso quando le conosense umane le gera cussì poche da poderse stivar in qualunque mente acetabilmente dotà. I ga conquistà el vèrtise de la ridicolagine convinséndose de èser "filòsofi", ovaro de saver acetabilmente simiotar i concèti che in bùie època de ignoransa autèntici geni i ga gavù la grandiosità - lori, sì! i la ga gavù! - de consepir. Queli che la società ancuo la ciama filòsofi i xe in genere gnente altro che stòrici de la filosofia - e la diferensa la xe imane! Lori gnente altro i capise oltre a l'onbra de queło che sècoli fa geni ignoranti i ga capìo. Lori gnente i sa de queło che de saliente in sti ùltimi deceni l'umanità la ga scominsià a pensar.
Ancuo, el vero filòsofo no'l perde tenpo a procurarse el tìtolo de filòsofo. No'l xe pì come inte i sècoli trascorsi, ancuo ghe xe tropo da inparar! E ghe xe tropo da NO inparar. Eco la granda diferensa, che nissun la mete in evidensa. La ramificasion de le siense e de le dissipline la xe tal, la mole de le informasion la xe tal, che la vita umana la xe tropo breve par aprénder tuto - ma no soło! La vita umana la xe anca tropo "lenta" rispeto a l'incalsar de le nove conosense! Anca vivendo in eterno, ancuo, un indivìduo no'l podaria MAI tegnir el paso co'l virulento proliferar de le nove conosense, e ano dopo ano el divàrio tra queło che lu el sa e queło che'l podaria saver el aumentaria con progresion esponensial.
La xe na època esaltante, la nostra, consideràndola inte i giusti tèrmini. A la stupidità de selebrar chi el se prègia de èserse incancrenìo su nosion che le ga gavù senso sècoli fa, se unise la orbité stratègica de chi in qualche modo inte la organizasion del progreso del saver el ga un roło inportante. Vivemo inte la resente època de la esaltasion de la spesializasion, de la ricerca sientìfica aplicativa, de la ricerca del saver finalizà a la produsion de danaro. Eco parché no trovè pì veri filòsofi da nissuna parte, care mie, e se li trovè no li reconosì! Parché el VERO filòsofo contenporàneo no'l ga perso tropo tenpo in università omogeneizante, in spesializasion aplicative che le lo renda el màsimo esperto mondial de na subfunsion de qualche sub-sub-subprocedura produtiva. El VERO filòsofo no'l ga perso na sostansiosa parte de la pròpria vita a masturbarse la corteca su le morte problemàtiche de queł'amaso de defunti e interà geni ignoranti da la eticheta DOC: "Platone". "Hegel". "Kant". El VERO filòsofo el ga bisogno de la so vita par asorbir tute le sconvolzenti implicasion de la teoria de la Relatività, de la Fìsica Quantìstica... ma no soło! De la teoria del Caos! De la teoria de le Catàstrofi! Del Olismo! Dei misteri de la geometria Fratal! De le stupefasenti conprension de la Neurologia e de la Psicologia! De la teoria de la Mente Bicameral! ...ma no soło! De le miràbili invension de chi la pròpria mente el inpiega a capir el presente imaginando el futuro, de i scritori de fantasiensa! De le profonde relasion tra siensa e arte, tra geometria, matemàtica e mùsica! El VERO filòsofo ancuo el ga da inparar a evitar de ostinarse su'l aprendimento de conosense funsionalmente ùtili, ma idealmente irilevanti. El VERO filòsofo el ga da inparar a distìnguer tra queło che'l xe da inparar e queło par cui no'l ga senso che lu el perda tenpo. El VERO filòsofo el ga da spasiar in tuti i canpi del odierno scìbile, e sicome l'amaso de informasion el xe mastodòntico e el crese senpre de pì senpre pì in presa, lu el ga da inparar a trascurar i detaji, tuti i detaji irilevanti, e dar forma inte'l spasio mental che'l cortiva in sé a na organizà costelasion de sìntesi. La sìntesi de ogni canpo de riflesion la ga da èser plàstica e mai dogmàtica, susetìbile de èser stravolta da un momento a l'altro, parché questi i xe i atuali tenpi de la evolusion del progreso uman. La suprema sìntesi de na Weltanschauung superior la venirà cussì da sé, spontaneamente, come spontàneo el xe tuto queło che in ogni dove da senpre el sorze e el sucede, par quanto questo el significa qualcosa, par quanto a serti ghe piaze crédar diferentemente. Caro Maurizio Costanzo Show, me dispiaze par ti, come me dispiaze par mi e par l'Italia, ma inte la trasmision che ti sì no go mai visto e scoltà un VERO filòsofo. Epuro ghe ne esiste. Ghe ne go conosùo diversi. Ma me li go gavù da ndar a sercar, parché contrariamente a le superstision, lori no i ghe l'ha scrito in fronte, né su qualche certificà prestanpà.
E par terminar con adeguà faseta, eco modesta riseta che la mimetiza sìntomi a caso: Cassè le cassère e no inalberè i alberoni!

Roberto Quaglia