chi o cosa mi sia el xe un mistero par mi come par chiunque no'l ga le travegołe. Esaurìa sta premesa podemo divertirse a far finta de vere congeture parsiali, inferiori e distorte.
Rimescolando i nostri paràmetri podemo cussì dir sensa tema de èser smentìi da chi el àbia aconsentìo a no smentirne che mi son atualmente soratuto el proprietàrio de un muro. Ma no de un muro qualunque, come ghe ne xe tanti un poco dapartuto. Un muro in qualche modo inportante, parché el xe stà adiritura mensionà inte la trasmision televisiva che ti sì. No'l xe el Muro di Berlino, vendù a scaje a chi el gaveva schei da spénder. No'l xe el Muro del Pianto e gnanca queło dei Pink Floyd. El xe el muro de Baccini.
Inte la trasmision che ti sì sto muro el xe stà nominà, forse anca ripetutamente, parché el xe a l'indiriso de lu che'l cantautor Baccini el ga gavù da vòlzer el so sguardo par asè ore a'l giorno par ani e ani intanto che'l inparava a cantar. Lo ciamaremo alora el Muro del Canto de Baccini. I berlinesi i gaveva el Muro di Berlino, a véder el qual i ndava quando i voleva véder fin a indove i podeva ndar. I Ebrei i ga el Muro del Pianto, indove i se mete quando ghe vien da pianzer. Baccini el gaveva el Muro del Canto. Quando ghe vegneva da cantar lu el se poneva davanti a'l so Muro indove ghe gera acostà un pianoforte e el cantava, asè pì a longo de quanto i ebrei i ghe la fa a pianzer davanti a'l loro, o i berlinesi a pasegiar a ridoso del loro. El famoso Muro del Canto de Baccini.
Sto Muro el rege presumibilmente el teto de un locale zenovese ciamà "Panteca", che mi, za proprietàrio del Muro, go gavù la fatalità de gestir a longo. Francesco Baccini el xe entrà in Panteca inte'l 1981, apena dimagrìo da la so ipertrofia lipìdica, sguardo spirità e presoché muto, la so mente confusa ormai regno de psicofàrmachi. El stava senpre da soło in un àngoło, sensa gnanca cavarse el capoto, mai parlando con nissun, vardando el pianoforte indove qualcun senpre el sonava. Apena el qualcun de turno el se alsava par un bisogno o un desidèrio libatòrio (vedi "voja de bira"), Baccini el se aventava su'l pianoforte sguarnìo sonando qualche minuto de mùsica clàsica. Po el scanpariva. Ma el scanpariva davero. Questo el xe avenù parece volte. Su'l pianoforte i pianisti generalmente i rotava come i mandrili in un bordeło. Che un pianista speso el scanparise, el gera normal. Ma no che'l scanparise senpre, anca quando se sercava de identificarlo par conóserlo e ofrirghe da bévar. Cussì un giorno, a le prime note de mùsica clàsica, qualcun el se ga apostà visin a'l piano par svelar el mistero del pianista scanparente. Baccini el ga sonà qualche minuto come el sòlito, po de boto el se ga alsà bruscamente, e a grandi falcà el ga ciapà de mira la porta, da la quale el saria de sicuro usìo come un fantasma dopo pochi secondi come so sòlito. Ma l'apostà el lo ga intercetà fìsicamente, costrenzéndolo a fermarse qualche istante par acetar qualcosa da bévar. Baccini el ga sercà de oponerse, po el se ga arendù e el ga domandà qualcosa de forte, na camamiła.
Co'l pasar dei mesi e po dei ani, Baccini el xe diventà un frequentator senpre pì asiduo de la Panteca. El ga scominsià a inframezar a la clàsica brani de mùsica leziera, predilizendo i Blues Brothers e el baleto de Erode de Jesus Christ Superstar. El ga provà a cantar, e l'efeto no'l xe stà malacio. El ga abandonà la clàsica e el cantava senpre de pì. Inte'l 1985 la intensità de la so frequentasion de la Panteca la ga rivà el cùlmine. El se presentava a la porta a le oto de sera, quando la Panteca la verzeva, e el ne usiva a le do o a le tre, quando eła la sarava. El scominsiava a sonar e cantar sinque secondi dopo l'ingreso de la prima tosa carina, e po no la finiva pì. Anca a feragosto, quando la sità la gera èsule in un altro canton, Baccini el stava là, da soło insenbre a mi e pochi altri e nissun alegro, e el xe stà proprio inte'l desolà agosto del '85 che a'l tèrmine de na serata scarna sete toseti finlandesi le xe conparse par miràcolo inte la Panteca oscura portàndoselo via e fasendo piasa pulita de tute le so prinsipali verzinità, episòdio za mensionà su'l palcoscènico de la trasmision che ti sì.
Ma la Panteca no la xe soło Baccini. De la era Baccini vansa i ricordi, le fotografie, e le ore de videoregistrasion che ancora detegno de un Baccini spaurìo e con tuti i cavełi che inascoltà no'l finise mai de sonar come un trator.
Inte'l arco de la so esistensa la Panteca la ga contegnù a fugasi trati na moltitùdine de persone cussì dite famose, da Gian Maria Volonté a Dario Fo, da Angelo Branduardi a Enrico Rava, da Bruno Hendel a Enzo Tortora, da Pinco a Palino e no trascuremo Chicchessia. Ma la ga contegnù soratuto moltitùdini umane de prègio minormente noto ma no par questo del steso prive o indegne. Eco a voaltri le etichete de Rino Riccio, Alessandro Testa, Gigi Picetti, Max Morando, Bruno Medicina, Guido De Vecchi, Alessandro Buricchi, Beppe Mistretta, Chicco Sirianni, Max Manfredi, Enrico Tetris... ometo le fémene parché ghe ne gavaria da sitarne trope e la pigrisia la me frena. Queło che ste etichete de umani le seła e qualche volta le esibise no lo descovrirì con fasilità, soratuto se sì distrati da'l Nula che'l inpera.
La Panteca la xe mile altre storie, de là de la gènesi de Baccini. La xe el primo locale "alternativo" mai sorto a Zènova. Fusina de menti e de talenti. Archetipo de la moltitùdine de locali e localeti che ancuo i rende vivaci le serate de na sità morente. La xe el luogo indove inte i ani i xe ineluttabilmente restà inpiją le menti pì moderne e pì fèrtili de Zènova. Covo de sinerzie. Mìtico resipiente che de tuto el contien. I rifletori i se inpisarà su la Panteca quando eła no la ghe sarà pì, par enfatizarne e mitizarne qualità che in pochi i ga savù còjer quando i gavaria podùo, inte'l arco de la so esistensa real, ovaro par esenpio deso. (erata corize de la ùltima ora: l'esenpio no'l calsa: el xe de fato forse za tropo tardi!)

Roberto Quaglia