cui o ce che o soi al è un misteri par me come par cualsisei che nol à i stravedês. Finide cheste premesse o podìn divertîsi a fâ fente congeturis vêris parziâls, inferiôrs e distortis.
Tornant a messedâ i nestris parametris o podìn duncje dî cence pôre di jessi smentîts di cui che al à consintût di no smentînus che jo o soi cumò soredut il proprietari di un mûr. Ma no di un mûr cualsisei, come che int son tancj un pôc dapardut. Un mûr in cualchi maniere impuartant, parcè che al è stât adiriture nomenât te trasmission televisive che tu sês. Nol è il Mûr di Berlin, vendût a scais a cui che al veve bêçs di spindi. Nol è il Mûr dal Vaî e nancje chel dai Pink Floyd. Al è il mûr di Baccini.
Te trasmission che tu sês chest mûr al vignì nomenât, forsit ancje plui voltis, parcè che al è viers di lui che il cjantautôr Baccini al voltà il so voli par tantis oris al dì par agns e agns intant che al imparave a cjantâ. Lu clamarìn alore il Mûr dal Cjant di Baccini. I berlinês a vevin il Mûr di Berlin, che a lavin a viodilu cuant che a volevin viodi fin dulà che a podevin lâ. I Ebreus a àn il Mûr dal Vaî, dulà che si metin cuant che ur ven di vaî. Baccini al veve il Mûr dal Cjant. Cuant che i vignive di cjantâ al si meteve denant dal so Mûr dulà che al jere un pianoforte dongje e al cjantave, une vore plui a dilunc di trop che i ebreus a rivin a vaî denant dal lôr, o i berlinês a cjaminâ dongje dal lôr. Il famôs Mûr dal Cjant di Baccini.
Chel Mûr al ten sù, si pues pensâ, il tet di un locâl gjenovês clamât "Panteca", che jo, za proprietari dal Mûr, o ai vût la fatalitât di gjestî a dilunc. Francesco Baccini al jentrà in Panteca tal 1981, apene dimagrît de sô ipertrofie lipidiche, voli spiritât e cuasi mut, la sô ment confusionade oramai ream di psicofarmacs. Al stave simpri di bessôl intun cjanton, cence nancje gjavâsi il gaban, mai fevelant cun nissun, cjalant il pianoforte dulà che cualchidun al sunave simpri. Apene che il cualchidun di turni si jevave par une bisugne o un desideri libatori (viôt "voie di bire"), Baccini si butave sul pianoforte disfurnît sunant cualchi minût di musiche classiche. Po al sparive. Ma al sparive pardabon. Chest al sucedè tantis voltis. Sul pianoforte i pianiscj in gjenerâl a ziravin come i mandrii intun bordel. Che un pianist dispès al sparìs, al jere normâl. Ma no che al sparìs simpri, ancje cuant che si cirive di identificâlu par cognossilu e ufrîi di bevi. Duncje une dì, aes primis notis di musiche classiche, cualchidun si metè in vuaite dongje dal pian par disvelâ il misteri dal pianist che al sparìs. Baccini al sunà cualchi minût come simpri, po di colp si jevà di bot, e a grancj pas al cjapà di mire la puarte, che di li al sarès di sigûr jessût come un fantasime dopo pôcs seconts come simpri. Ma chel in vuaite lu fermà fisicamentri, obleantlu a fermâsi cualchi moment par acetâ alc di bevi. Baccini al cirì di oponisi, po si rindè e al domandà alc di fuart, une camomile.
Cul passâ dai mês e po dai agns, Baccini al deventà un frecuentadôr simpri plui assidui de Panteca. Al scomençà a meti framieç de classiche tocs di musiche lizere, preferint i Blues Brothers e il balet di Erode di Jesus Christ Superstar. Al provà a cjantâ, e l'efiet nol fo mâl. Al bandonà la classiche e al cjantà simpri di plui. Tal 1985 la intensitât de sô frecuentazion de Panteca e rivà al colm. Si presentave ae puarte aes vot di sere, cuant che la Panteca e vierzeve, e al jessive aes dôs o aes trê, cuant che e sierave. Al scomençave a sunâ e cjantâ cinc seconts dopo de jentrade de prime fantate biele, e po no la finive plui. Ancje a Feragost, cuant che la citât e jere esule in altre bande, Baccini al jere li, di bessôl dutun cun me e pôcs altris e nissun legri, e al fo pròpit tal Avost dal '85 desolât che ae fin di une serade magre siet fantatutis finlandesis a comparirin par miracul te Panteca scure puartantlu vie e fasint place nete di dutis lis sôs vergjinitâts principâls, episodi za nomenât sul palc de trasmission che tu sês.
Ma la Panteca no je dome Baccini. De ere Baccini a vanzin i ricuarts, lis fotografiis, e lis oris di videoregjistrazions che o ten ancjemò di un Baccini spaurît e cun ducj i cjavei che cence jessi scoltât no la finìs mai di sunâ come un tratôr.
Tal arc de sô esistence la Panteca e contignì a moments fuiadis une multitudin di personis cussì clamadis famosis, di Gian Maria Volonté a Dario Fo, di Angelo Branduardi a Enrico Rava, di Bruno Hendel a Enzo Tortora, di Pinco a Pallino e no stin a dismenteâ Cuissàcui. Ma e contignì soredut multitudins umanis di valôr mancul cognossût ma no par chest cence o indegnis. Ve par vualtris lis etichetis di Rino Riccio, Alessandro Testa, Gigi Picetti, Max Morando, Bruno Medicina, Guido De Vecchi, Alessandro Buricchi, Beppe Mistretta, Chicco Sirianni, Max Manfredi, Enrico Tetris... o lassi fûr lis feminis parcè che int varès di citâ masse e la pegrece mi frene. Ce che chestis etichetis di umans a platin e cualchi volte a mostrin no lu scuvierzarês cun facilitât, soredut se o sês distrats dal Nuie che al regne.
La Panteca e je mil altris storiis, di là de gjenesi di Baccini. E je il prin locâl "alternatîf" mai nassût a Gjenue. Fusine di ments e di talents. Archetip de multitudin di locâi e localuts che vuê a rindin vivis lis seradis di une citât che e mûr. E je il lûc dulà che tai agns a son restadis par fuarce impeadis lis ments plui modernis e plui fertilis di Gjenue. Côf di sinergjie. Recipient mitic che al ten dentri di dut. I rifletôrs si impiaran su la Panteca cuant che no sarà plui, par enfatizâ e mitizâ cualitâts che in pôcs a àn savût cjapâ cuant che a varessin podût, tal arc de sô esistence reâl, cioè par esempli cumò. (errata corrige de ultime ore: l'esempli nol cole ben: al è difat forsit za masse tart!)

Roberto Quaglia