Come i fiołi go la manìa dei parché, e me ne vanto. La manìa dei parché la xe el strumento che noaltri èseri umani gavemo par inparar, come el stòmego el xe el strumento che gavemo par diđerir el magnar. Intanto che'l stòmego el funsiona par tuta la vita, con le rare volte ecesion de le indigestion, la manìa dei parché la sfiorisse inti òmeni grandi lassando de sé soło qualche tracia vaga. Finìa l'età de la cresita, ogni zorno el xe bon par far el funeral de la manìa dei parché. L'atrofia no la xe mai davero conpleta. Qualche picolo parché el sopravive in tuti, ma inti òmeni grandi le xe altre le funsion che comanda l'arbìtrio: al prim'órdine de la mente, cavà i parché se senta le sertese ciapà e i dogmi personali. In età granda uno se domanda el manco che se pol e se difende con i denti le so convinsion. Ogni conossensa soa la diventa un dogma e se conbate o se teme chiunque el ne mete in discussion i fondamenti.
Dal zorno che la manìa dei parché ne lassa finimo de crèser, e se invecismo soltanto. El xe par questo che donca me godo a ogni parché che drento de mi rivo a far nàser. Inte'l rifiuto del dubio se cròla queli che i ga rinunsià a crèser e i vol soło invecir. De sòlito se sacrifica la propia manìa dei parché su l'altar de la pràtica de tuti i zorni. Se fa mal quando uno el xe rosegà dai dubi. Le sertese le sarà anca false, ma le torna còmode asè quando uno el se revolta col mondo. La xe asè afassinante interogarse su la vera natura de un groso würstel, quando uno el lo vol morsegar, e ghe saria asè da domandarse: "Xelo questo davero un würstel? Parché mi son convinto che questo el sia un würstel? Sarìeło questo un würstel se mi no lo considerasse cussì? Chi me dà la sicuresa che i budisti no i ga ragion e el würstel no'l sia ciapà da un porsel che'l gèra la reincarnasion de Hitler? Come posso magnar sto würstel se forsi el xe el corpo de Hitler, quando ancora geri go fato la comunion, ovaro go magnà del pan che forsi (ma come fasso a èserne sicuro?) el gèra el corpo de Cristo? E anca se sto würstel no'l fusse el corpo de Hitler reincarnà, el xe anca senpre ciapà dal corpo de un porsel... xelo justo che mi lo acoste, inte'l me stòmego e - ancora pezo - inte la me mente, al corpo de Cristo? Come posso sbàter inte'l me stòmego l'alusinante cocktail de Cristo e de un porsel che forsi el gèra anca Hitler? Xelo anca justo che mi me desméntega che sto par morsegar un morto? Ma son mi sicuro de gaver davero fame? E anca se gavesse davero fame, par quale motivo gavaria da magnar? No sarìeło pì dignitoso rifiutar la me animalità e lassarme morir de fame? Prima o dopo saria morto isteso... e forsi con manco dignità... Se mi fusse el würstel e el würstel fusse mi, me piaseria èser magnà da mi? E come posso deso magnar sto würstel che'l se ga rafredà intanto che me fasevo tute ste domande da gnente e se po' (par vendeta?) el me restasse su'l stòmego?" Gavendo da magnar un würstel, el xe mèjo magnarlo e basta, sensa star a farse trope domande. Cussì anca, speso, gavendo da vìver, el xe mèjo vìver e basta, sensa star a farse trope domande. Fasendo cussì, però, el rìscio el xe de magnarse el würstel co la testa altrove, sensa quasi incorzerse, e, al steso tenpo, vìver la propia vita co la testa altrove, sensa quasi incorzerse, e questo, parché se vive na volta soła, saria un fià un pecà, parché el diventaria alora lècito canbiar - come qualchedun davero el ga fato - el famoso dito in "NO SE VIVE GNANCA NA VOLTA.", fasendo anca che no se pol evitar la nàsita da sé de un dito colateral: "NO SE MAGNA GNANCA UN WÜRSTEL."
Intanto che da un lato el xe asè pràtico passar na serena vita granda sensa curiosità inpetuose e sensa dubi de fogo, (e chiunque sta a vìver cussì la so vita de sicuro el sarà d'acordo con sto discorso), el xe isteso vero che l'enblema de la vita el xe l'entusiasmo scadenà de la zoventù, e no la inposà inersia de la veciaia. Ogni fioło el xe un genio, se paragonà a un omo grando. E genio el resta fin a quando la manìa dei parché no la scomensa a lassarlo. No la xe un abandon de presa. La xe invese na morte lenta. Qualchedun el conserva grosi tochi de la curiosità de fioło par tuta la vita e el diventa un sienziato, o un gran sapiente. Altri i rinunsia a 18 ani a ogni altro saver e da queł momento soltanto i invecise. Ti li trovi a 40 ani e po' a 50 e a 60 co le stesse idee dei vint'ani, intanto vece, fora dai tenpi e ridìcole, che i se dize superbi de quełe, parché sora quełe e quełe soltanto la xe costruìa la sénplice imàgine che questi i ga de sé.
Ma l'incredìbile sviluppo cultural de l'umanità, che in poche mijara de generasion la xe passà da l'Omo-Simia-Casador a l'Astronauta, no'l xe suceso par l'asion dei inerti che i porta avanti le procedure inparà in zoventù, ovaro dei invecìi prima del tenpo, ovaro la major parte superbi de le so sertese. L'incredìbile sviluppo cultural de la nostra spesie el xe el fruto del pensar e del far inti sècoli de queła picola persentual de grandi con la manìa dei parché, vardà senpre con suspeto da tuti i altri par la diversità de le so idee e par la duresa de le so curiosità.
Una de le arme vincenti de la spesie umana a paragon dei altri mamìferi, inte'l corso de l'evolusion, la xe stà la strategia de far durar pì a longo quełe funsion del inparar che ciamemo "zogo" e "curiosità de fioło" e che le xe de tuti i mamìferi. Varda i gatìni intanto che i zoga, dàndose sgnaułade torno: i xe drio inparar a casar. O quando, curiosi, i fica el muséto da tute le parti: i xe drio esplorar el teritorio. Ma l'infansia dei gati la dura pochi mesi. Queła umana quasi vint'ani. Quando l'infansia la finisse, zogo e curiosità le finisse, lassando de sé soło vaghe trace, e queło che i indivìdui i xe, i resta, sensa inparar pì gnente de inportante.
Fora dei òmeni grandi un fià ancora fiołi, mossi da la manìa dei parché, pronti con entusiasmo ai novi zoghi, che come i fiołi no i se ciapa masa su'l serio, e come i fiołi i xe dai altri grandi no capìi. E quando un zogo da lori inventà el porta vantajo a l'umanità, dopo e soltanto dopo el so nome el diventa na etichéta positiva.
La "storia" la xe fata da pochi, che fora de la fadiga de far la storia i ga vù da cargarse el peso de strasinarse drio la zavora de queli che no i se move.

Roberto Quaglia