uno dei miti moderni che la Television ne porta el xe l'umorismo. Un altro dei miti che incalsa el xe el lenguajo volgar. Mito de deso che sta montando el xe anca la farneticasion, ciaro sìnbolo positivo (e in parte, se capisse, contrastà) de la no-conformità. Sicome me revolzo a ti, Maurizio Costanzo Show, sìnbolo ideal de la Società Televisiva Italiana, e revolzéndome a ti e par mezo de ti mi deso virtualmente parlo a l'Italia intiera, el xe ùtile a mi e al letor-utente che mi no lassa da parte sti tre miti che sponta, e cussì con coerensa méta, de quando in quando, inte sta o inte le létere che vien o che xe passà, la me prosa de semantemi moderni e alegri, magari sproloquiando. Insoma, che mi fica in mezo a le righe qualche elemento de turpilòquio, intarsi de deliri a tema, qualche beła fredura e, pì raro, qualche fina batuda. Cussì, tanto par scomensar, el xe ora che la finisso de parlar a modo intorcolà, e che le me frasi le diventa pì sénplici e ciare, e anca i conseti pì ciari, pì banali, pì democràtici, pì visin a la gente. Parché ste me létere che mi te mando, a la fine, le diventa forsi un libro che qualchedun, lezendo ste righe, forsi za el sta lezendo dopo che'l se lo ga conprà o fato inprestar da un amigo o vù in regalo par Nadal da la nona tirà dal tìtolo che fa gola, no vorìa mai che po' i pensasse che vojo far l'inteletual come tanti alberoni e che'l libro el xe na menada de mati e che in pràtica ghe go fregà i schei del preso del libro, parché de fato el libro el costava na sifra come oramai tuti i libri, e po' inte'l libro, ovaro qua drento (quando sta létera la sarà parte de un libro), no se ghe capisse na fava de queło che digo e el gèra mèjo no conprarlo, cussì no vorìa mai che a la fine i se passa la parola e el libro no se lo conpra nissun. Eco, el gèra mèjo se fasevo na frase pì curta, el xe che quando scomenso a parlar me lasso portar dal entusiasmo e soratuto da le parołe, inte'l senso che ghe ne scrivo na sifra tute de fila e a la fine me trovo con serte frasi cussì longhe come queła de prima e comunque anca questa qua no la schersa.
Disevo che sta létera la xe na létera, parché davero mi sto deso scrivendo na létera e go za pronta anca la busta, epuro la xe anca un toco de un libro, parché te zuro che ghe ne fasso un libro, e chi lo ga za in man el lo sa. Qualche volta digo robe serie, parché un altro dei miti de mati che ne ga inparà la Television el xe che'l xe inportante dir robe serie. Sto mito a noaltri ne lo ga inparà la Television, ma se trata de un mito antichìssimo. Quando la Ciesa la gaveva l'hobby de l'Inquisision, la gaveva portà a l'estremo l'arte de ciapar tuto su'l serio, e de fato no se spassava nissun. Deso par fortuna, con l'aiuto de la Television, ghe xe un mito par tute le fadighe umane che ti pol imaginar, come par esenpio johnholmes, el morto porno ator che'l lo gaveva longo 35 cm, a cui elioelestorietese el ga dedicà na canson. johnholmes el xe un mito moderno, intanto che la serietà la xe un mito antico col saor vero, come la vecchiaromagna (no, el gèra el montenegro). Cussì, par no èser acusà de discriminasion mitològica, sarò speso serio, inte ste létere, e speso no lo sarò. Sarò speso grosso (che'l xe el contrario de sotìl, come el dott. Amato), ovaro grosso inti contenuti, e sarò speso sotìl (ma no come el dott. Amato), sotìl inti contenuti, qualunque cosa sta sconsolà agetivasion la voja dir, inte la mente de chi sta lezendo.
Chi el gavesse esaminà, prima de questa, le do létere scrite prima da mi - che l'esaminator el sia un funsionario del Maurizio Costanzo Show, che'l sia invese el letor del libro de cui sta létera la fusse parte - el gavarà de sicuro notà grose diferense de stile e de tema tra le létere de prima e questa. El podaria èser parso, lezendo le prime do, che mi gavevo in ànimo de far qualche sorta de saggio su i fantasiosi ruoli sinbòlici che la Television la tegnaria inte'l cuor de la nostra società. Sbaglià. No son abastansa saggio par scrìver un saggio vero, e al steso tenpo son abastansa saggio par no méterme a scrìver un saggio. I me studi i xe stà masa scarsi par darme i tìtoli che'l saria ben che'l se meta un aspirante saggista, e questo mi lo so benìssimo, e cussì no caso inte la trapoła de voler confesionar un saggio. Da un altro canto, e anca cussì, mi davero esisto, no soło parché cogitoergosum, ma anca parché l'anàgrafe el certìfica con gran convinsion, e chiunque, fin a quando mi sostegno de èser vivo, el pol farse na beła fila a l'anàgrafe par controlar, trovàndone conferma. E anca, ogni volta che me vardo a la spéciera me revedo, e oramai ghe credo propio che queło là son mi, ovaro qualchedun che davero esiste vero vero. Esistendo, me xe capità anca de pensar, e l'invension dei strumenti mecànici de scritura (come el computer) no i me aiuta a evitar de méter nero su'l bianco el fruto del camin del me pensar. Eco cussì ste létere e - a un altro livel - sto libro. Ste sequense de létere, parołe, frasi, pàgine sénplicemente le scaturisse da queł gran casin de protoni, neutroni e eletroni che messi in ordine a un serto modo i fa el cosidito "me", el cosidito Roberto Quaglia. Le scaturisse da Roberto Quaglia drito in mezo a ti, el totem, el Maurizio Costanzo Show, el perno e cuor de queła che mi ciamo la Società Televisiva Italiana. Ti omo italian che ti lezi ste righe e inte la mente de chi quełe le sona, lassando l'eco del so significà, sapi che no a ti le xe stà da mi indirisà prima de tuto, ma al nostro punto de riferimento comun che no se pol far de manco: el Maurizio Costanzo Show. Quando a far la mediasion de la comunicasion tra i òmeni la gèra la religion, i conseti i entrava mèjo inte l'interlocutor se metìi con rinforsi sacri come l'espresion "sediovuole", Ancuo el rinforso pì sacro e cussì pì efisiente el xe el nominar el Maurizio Costanzo Show. Se domandasse, chiunque sta lezendo ste righe: le staria elo (o eła) lezendo se mi no le gavesse prima dito davanti e a gran voze la parołeta màgica "Maurizio Costanzo Show"?

Roberto Quaglia