serto che "caro Maurizio Costanzo Show" el xe propio un beło tìtolo... Un tìtolo che'l buta interese sora qualunque cosa ghe xe scrito soto. Alora vol dir che qualunque putanada la diventa interesante se la xe ben intitolà? O anca... tuto el xe interesante, basta vardarlo con interese? (Forsi par questo na dona incinta la xe in stato interesante? Parché tuti la varda con interese par via de la so pansa strana?) Qualunque cosa forsi la xe degna de interese, basta el saver ghe lo dar. Sì, sì. Fora che'l saver véder, ghe vol el saver pensar. Chi varda sensa pensar, no'l vede, el filma. El xe na telecàmera, un strumento de persesion visiva sensa cosiensa. Dize Gigi Picetti, che'l varda el monitor del computer intanto che te scrivo: "...però drio a la telecàmera ghe xe na persona che pensa e fa, sielzendo con cura i movimenti de màchina par registrar queło che ghe va."
Ma no perdémose, caro Maurizio Costanzo Show. Ancuo ben altro te vojo dir. Te go visto geri sera in un bar, e tuti te vardava. Son un fià geloso. Ti entravi tute le sere inte la me casa, iluminando col cinescopio la me solitùdine, e te credevo tuto par mi. La ragion me disea che ti ndavi con tuti, a casa, ma el cuor, vecio idealista, el voleva pì presto ingananarse. Ma védarte là, in queł bar, tornià da maleducà inbriaghi che i rutava e i disea parolase, el me ga fato propio mal. E inte la me mente se ga scadenà pensieri persecutorio-paranoici: te go visto fàcia a fàcia con figure sporche, con maniaci, psicopàtici, cocainòmani, torturatori, andreoti, ultras e naziskin. Insoma, ti geri de tuti. No ti sielzevi, te fasevi sièlzer. Da chiunque te voleva. Mi gèro soło uno dei tanti. Un infinitèsimo sotomùltiplo inte l'amuciada nasional del share. In queł bar me son inbriagà de frizantin e vermouth, inbrodolàndome tuto. Po' son sortìo zigzagando, fumando e piànzendo. Go insultà no so chi, però el menava forte. Strasà e sanguinando, son stà rancurà su'l marciapiè da un misionario tossicòmane, inte'l leto de chi me son svejà a la matina, che spusavo de sìpria e vòmito.
Inte la casa no ghe gèra pì nissun, son sortìo e go visto là visin serti giardinéti. Sentà su na banca del parco vardavo i oleandri e pensavo: "No xe tuto bruto, ghe xe de mèjo." Stufo de èser inconprensìbile anca a mi steso, sercavo de capir le ragion sconte del me otimismo rozo, dando al steso tenpo da magnar a passaréti che no i savea gnente con i mìnimi tochéti de le patatine intascà inte'l bar, tra un bicer e l'altro, la sera prima, e fati mile tochi intanto che i me gaveva menà.
E eco che me asale imàgini idìliache: ti, Maurizio Costanzo Show, ti entravi a tarda sera inte saloti rococò, in mezo a ninabo, ciocolatine e pìndoli, acolto da le gentili rampoje de l'alto proletariato. Sentivo susuri e strìdi de gradimento, che i se spandeva da le zóvani in fior a le none sfiorìe, e da tute le parti risadełe e oci lustri, in mezo a twinning e chivas e caffarel gropi ingiotìi pian pian.
Passa inte'l giardinéto un barbon che'l roba le molighe de patatine a le passare, grufolando goloso a quatro pie, e el pensier el vola a altri posti, canbià da la to presensa che tuto trapasa e no la fa classe, e te vedo inte la spojà catapecia de na famèja prolìfica che la ga bisogno. I infisi che casca e le face sfrusìe... da chi xełe iluminà? Da chi, se no da ti, Maurizio Costanzo Show? A chi altro xelo permesso el miràcolo? Ti soło ti unifichi, ti soło a tuti te dài de la stessa mesura!
E alora l'angossa del me spìrito la se ga girà in serenità, la pena de l'ànimo la se ga fato consolasion e la tenaja de la gelosia la ga mołà el me cuor dolente. Go capìo che la to presensa menà con tuti inte le note de tuti quanti la xe mesajo de un sentir comun, de generoso olocausto, de amor universal.
Deso sto mèjo, tant'è vero che go apena finìo de esprìmerme cussì. I efeti de sto me riequilibrio i continuarà par el resto de la létera, te ne stè incorzendo, spero. Te parlavo, prima del me delìrio de gelosia (quietà), del valor de ogni cosa, se vardà co la justa dose de atension, interese e cosiensa. Femo l'esenpio de un fior. Ti passi e gnanca lo vardi. Forsi lo pesti parché ghe ne xe tanti. O anca ti ne conpri dal fioraro dei morti tajà, che ancora i gòsola linfa e tacà in mazo, par tegnerte bona la dona.
N'altra volta invese te trovi a far gnente destirà su un prà, e l'ocio te casca sora na margherita. Sta volta ti la vardi da visin e ti scopri un microcosmo. Ghe xe i stami, i pistili, le fojéte e tuti quei cristi e madone che i te ga spiegà a scola che i fa parte del fior e che no ti sa pì come che i se ciama, ma i ghe xe, ti li vedi e te interesa, ti capisi che i xe i òrgani de un èser vivente e te emosiona (se no ti sì del tuto rincojonìo, naturalmente). Te emosiona e ti pensi che queło che ti ciami sensa che eła lo sapia margherita, la mena na vita orgànica conplesa e sesualmente stravagante, acopiàndose con le so pari par mezo de un animal, scadenando tuti i zorni orge par aria fate de inseti che ghe xe, fora de la moral umana e umano-divina.
E alora te vien da pensar: parché na margherita no la pol ndar al Maurizio Costanzo Show, e na pornostar sì?

Roberto Quaglia
Gigi Picetti