Comme 'e criature tengo 'a manìa d''e pecché, e me ne vanto. 'A manìa d''e pecché è 'o strumento ca nuje essere umane tenimmo pe 'mparà, comme 'o stòmmaco è 'o strumento ca tenimmo pe addigerì 'o magnà. Mèntre 'o stòmmaco funziona pe tutta 'a vita, cu 'e rare vote ecceziune d''e 'ndigestione, 'a manìa d''e pecché appassisce dint'a ll'uómmene gruosse lassanno 'e sé sulo quacche traccia vaga. Fernuta ll'età d''a crescita, ogne juorno è bbuono pe fa 'o funerale d''a manìa d''e pecché. 'A atrofìa nun è maje overamente cumpleta. Quacche piccolo pecché sobbravvive dint'a tutte, ma dint'a ll'uómmene gruosse sò ate 'e funzione ca cumànnano ll'arbitrio: ô prim'urdene d''a mente, livate 'e pecché s'assèttano 'e certezze pigliate e 'e dogme persunale. 'N età gruossa uno se dimanna 'o meno ca se po' e se dìfennono cu 'e diente 'e cunvinziune soje. Ogne canuscenza soja addiventa 'nu dogma e se cumbatte o se tème chiunque ne mette 'n discussione 'e fundamiente.
Dô juorno ca 'a manìa d''e pecché ce lassa fernimmo 'e créscere, e nce 'mmicchiammo sulamente. È pe chesto ca dunque me gòdo a ogne pecché ca dint'a me arrivo a fa nàscere. Dint'ô rifiuto d''o dubbio se cròllano chille ca hanno rinunciato a créscere e vònno sulo 'mmicchià. 'E sòleto se sacrìfeca 'a propia manìa d''e pecché ncopp'a ll'altare d''a pràteca 'e tutt'e juorne. Se fa male quanno uno sta rusecato d''e dubbie. 'E certezze sarranno pure false, ma tórnano còmmode assaje quanno uno s'arrevòta cu 'o munno. È assaje affascinante a se 'nterrugà ncopp'â vera natura 'e 'nu gruosso würstel, quanno uno 'o vo' muzzecà, e ce sarrìa assaje 'a se dimannà: "È chisto overamente 'nu würstel? Pecché io songo cunvinto ca chisto sia 'nu würstel? Sarrìa chisto 'nu würstel si io nun 'o cunziderasse accussì? Chi me dà 'a sicurezza ca 'e buddiste nun tènono ragione e 'o würstel nun sia pigliato 'a 'nu puorco ca era 'a reincarnazione 'e Hitler? Comme pòzzo magnà stu würstel si fórzo è 'o cuorpo 'e Hitler, quanno ancora ajere aggio fatto 'a comunione, ovèro aggio magnato d''o ppane ca fórzo (ma comme faccio a ne essere sicuro?) era 'o cuorpo 'e Cristo? E pure si stu würstel nun fosse 'o cuorpo 'e Hitler reincarnato, è pure sempe pigliato d''o cuorpo 'e 'nu puorco... è giusto ca io 'o accoste, dint'ô stòmmaco mio e - ancora peggio - dint'â mente mia, ô cuorpo 'e Cristo? Comme pòzzo sbàttere dint'ô stòmmaco mio ll'allucinante cocktail 'e Cristo e 'e 'nu puorco ca fórzo era pure Hitler? È pure giusto ca io me scordo ca sto pe muzzecà 'nu muorto? Ma songo io sicuro 'e tené overamente famme? E pure si tenesse overamente famme, pe quale mutivo avarrìa 'a magnà? Nun sarrìa cchiù dignitoso a rifiutà ll'animalità mia e lassàrme murì 'e famme? Primma o doppo sarrìa muorto 'o stesso... e fórzo cu meno dignità... Si io fosse 'o würstel e 'o würstel fosse me, me piacesse a essere magnato 'a me? E comme pòzzo mò magnà stu würstel ca s'è arrefreddato mèntre me facevo tutte sti dimande 'a niente e si po' (pe vendetta?) me restasse ncopp'ô stòmmaco?" Avenno 'a magnà 'nu würstel, è meglio 'o magnà e bbasta, senza stà a se fa troppe dimande. Accussì pure, spisso, avenno 'a vìvere, è meglio vìvere e bbasta, senza stà a se fa troppe dimande. Facenno accussì, però, 'o riseco è 'e se magnà 'o würstel cu 'a capa altrove, senza quase s'addunà, e, a paro, vìvere 'a vita propia cu 'a capa altrove, senza quase s'addunà, e chesto, pecché se vive 'na vota sola, sarrìa 'nu poco 'nu peccato, pecché addiventarrìa allora lècito a cagnà - comme quaccheduno overamente ha fatto - 'o famuso ditto 'n "NUN SE VIVE MANCO 'NA VOTA.", facenno pure ca nun se po' evità 'a nàscita 'a sé 'e 'nu ditto cullaterale: "NUN SE MAGNA MANCO 'NU WÜRSTEL."
Mèntre 'a 'nu lato è assaje pràteco a passà 'na serena vita gruossa senza curiosità 'mpetuose e senza dubbie 'e fuoco, (e chiunque sta a vìvere accussì 'a vita soja 'e sicuro sarrà d'accordo cu stu discurzo), è 'o stesso overo ca ll'emblema d''a vita è ll'entusiasmo scatenato d''a giuventù, e nun 'a 'mpusata inerzia d''a vicchiaja. Ogne criaturo è 'nu genio, si paragunato a 'n ommo gruosso. E genio resta fino a quanno 'a manìa d''e pecché nun accummencia a 'o lassà. Nun è 'n abbandono 'e prèssa. È 'mméce 'na morte lenta. Quaccheduno cunzerva gruosse piezze d''a curiosità 'e criaturo pe tutta 'a vita e addiventa 'nu scienziato, o 'nu gran sapiente. Ate rinùnciano a 18 anne a ogne ato ssapé e 'a chillu mumento sulamente 'mmìcchiano. 'E truove a 40 anne e po' a 50 e a 60 cu 'e stesse idee d''e vint'anne, 'ntramente vecchie, fora d''e tiempe e ridìcule, ca se dìcono superbe 'e chelle, pecché ncopp'a chelle e chelle sulamente è custruita 'a semplice immàggine ca chiste tènono 'e sé.
Ma ll'incredìbbele sviluppo culturale 'e ll'umanità, ca 'n poche migliara 'e generazione è passata 'a ll'Ommo-Scìmmia-Cacciatore a ll'Astronauta, nun è succiesso pe ll'azione 'e ll'inerte ca pòrtano annanze 'e prucedure 'mparate 'n giuventù, ovèro 'e 'mmicchiate primma d''o tiempo, ovèro 'a maggior parte superba d''e certezze soje. Ll'incredìbbele sviluppo culturale d''a specie nosta è 'o frutto d''o penzà e d''o fa dint'a 'e sècule 'e chella piccola percentuale 'e gruosse cu 'a manìa d''e pecché, guardate sempe cu suspietto 'a tutte ll'ate p''a divèrzità d''e idee lloro e p''a tuostezza d''e curiosità lloro.
Una d''e arme vincente d''a specie umana a paragone 'e ll'ate mammìfere, dint'ô corzo 'e ll'evoluzione, è stata 'a strateggia 'e fa durà cchiù a luongo chelle funzione d''o 'mparà ca chiammammo "juoco" e "curiosità 'e criaturo" e ca sò 'e tutte 'e mammìfere. Guardate 'e gattille mèntre jòcano, facènnose 'mmuscate a 'ntuorno: stanno 'mparanno a cacecià. O quanno, curiuse, fìccano 'o musillo 'a tutte 'e parte: stanno esploranno 'o territorio. Ma 'a 'nfanzia d''e gatte dura poche mise. Chella umana quase vint'anne. Quanno 'a 'nfanzia fernesce, juoco e curiosità fernìscono, lassanno 'e sé sulo vaghe tracce, e chello ca ll'individue sò, rèstano, senza 'mparà cchiù niente 'e 'mpurtante.
Fora 'e ll'uómmene gruosse 'nu poco ancora criature, mosse d''a manìa d''e pecché, pronte cu entusiasmo a 'e nuove juoche, ca comme 'e criature nun se pìgliano troppo sul serio, e comme 'e criature sò 'a ll'ate gruosse nun capite. E quanno 'nu juoco 'a lloro 'mmentato porta vantaggio a ll'umanità, doppo e sulamente doppo 'o nomme lloro addiventa 'na etichetta pusitiva.
'A "storia" è fatta 'a poche, ca fora d''a fatica 'e fa 'a storia hanno avuto 'a se carrecà 'o piso 'e se strascinà appriesso 'a zavorra 'e chille ca nun se mòvono.

Roberto Quaglia