ce sta delirio e delirio 'o fatto ca io ogne tanto esibisco 'na certa cumpetenza dint'ô sproloquio è opinàbbile oje m'è succiesso 'e seguì 'o corzo d''e seguente penziere ca currèvano 'a isso p''a mínema buggerata 'a vagina soja e 'a cocincina soja tènono 'e sorde e accussì tènono sempe raggione lloro nun 'o spusarrìa manco si fosse ll'úrtemo ommo ô munno e po' tènono quaccosa 'e curioso 'e guagliune lloro sempe a addurà 'a tutte 'e parte chelle sporcaccione me chiedeva si chello ca faceva teneva cattivo addore e ca vuleva ca facesse si nun chillo oro fórzo che razza 'e dimanne si ce 'a spalmava 'nu poco dappertutto ncopp'a chillu viso viecchio tutto rughe cu 'e cumprimente mije avarrìa capito allora 'a passa bene passa che cosa 'a comme ne parlava penzava parlasse d''a rocca 'e Gibilterra a proposito è 'na bella invenzione overamente però doppo me piace lassàrme ì abbascio dint'â tazza forzanno 'o cchiù possìbbile e po' tirà 'a catena pe 'o annaffià bene punture 'e spillo gghiacce però ll'ato sistema tène 'e vantagge suoje sapeva sempe 'a comme 'a faceva Milly 'a criatura si teneva 'e viérmene o no però lle dà sorde 'o stesso quant'è dottore prego 'na ghinea e me chiedeva si teneva omissione 'e frequente ma addó 'e vanno a cercà chelle parole chille parruccune omissione cu chille uocchie 'a miope ca me teneva ncuollo 'e traverzo nun me sarrìa fidata a me fa dà 'o cloroformio o Dio sape che ato però me piaceva quanno s'è misso a sedé a scrívere tutto accussì serio e accigliato naso accussì 'ntelligente ô diàvolo brutto buciardo Oh tutto chello ca se vo' meno ca 'n idiota era abbastanza sveglio 'a se ne addunà via dipenneva tutto d''o penzà a isso e a 'e llettere pazze soje Stellina mia tutto chello ca riguarda 'o splènnido Cuorpo tuo tutto sottolineato ca vène 'a llà è 'na cosa 'e bellezza e 'e gioia pe ll'eternità quaccosa ca ha truvato 'n quaccheduno d''e libbre stúpede suoje io sempre a 'e prese 4 o 5 vvote ô juorno e lle diceva 'e no e sicura Oh sì dicette songo sicuríssema 'n 'nu certo senzo lle tuppaje 'a vocca sapeva chello ca steva pe venì debbolezza naturale e abbasta fuje isso ca me eccitaje nun saccio comme 'a primíssema sera ca ce 'ncuntràjemo quanno abitava a Rehoboth Terrace se rummanette 'n piede a guardàrce pe almeno 10 minute comme si ce fóssemo già 'ncuntrate 'a quacche parte credo pe via ca era ebrea aggio pigliato 'a mammà me diverteva allora 'e cose ca diceva cu chillu surriso indolente suo e tutte 'e Doyle dicèvano ca se sarrìa purtato deputato Oh scema nata ca nun ero ato a crédere a tutte chelle chiàcchiere soje ncopp'â autonomia irlandese e ll'unione nazionale me mannaje chella barba 'e romanza d''e Ugonotti 'a cantà 'n francese pecché faceva cchiù fino O beau pays de la Touraine nun ll'aggio maje cantata manco 'na vota 'nu sacco 'e spiegazione e filastrocche ncopp'â religgione e 'a persecuzione nun te fa godé niente naturalmente e po' puteva isso sulo â primma occasione 'n via 'e favore ca lle capitava a Brighton square currette dint'â càmmera 'a lietto mia facenno finta 'e s'essere macchiato 'e mmane cu ll'inchiostro pe se 'e lavà cu chillu sapone ô zurfo e llatte 'e Albione ca allora aduperava era ancora dinto a ll'invòlucro trasparente Oh schiantaje dâ risa chillu juorno a ce penzà è meglio ca nun ce faccia 'na seduta fino â matina ncopp'a chist'affare avarrìano 'a fa vase 'e dimensione naturale 'n muodo ca 'na femmena ce pòzza sedé ncoppa comodamente isso s'agginocchia pe 'a fa io dico ca nun ce sta 'n tutto 'o munno 'n ato ca tène 'e abitúdene soje guarda chillu muodo ca tène 'e dòrmere a 'e piede d''o lietto comme fa senza 'nu capezzale duro meno male ca nun tira càuce si no me farrìa sautà tutte 'e diente respira cu 'a mano ncopp'ô naso comme chillu dio indiano ca me purtaje a vedé 'na dummèneca chiuvosa ô museo 'e Kildare street tutto giallo cu 'nu grembiulino stiso ncopp'ô fianco appuiato a 'na mano cu 'e ddeta d''e piede fora ca isso diceva era 'na religgione cchiù granne 'e chella d''e ebrei e 'e Nuosto Signore misse 'nzieme 'n tutta ll'Asia ll'imita comm'è abitúdene soja 'e imità a tutte credo ca pure isso durmesse cu 'a capa a 'e piede d''o lietto cu chelle piote squadrate 'n vocca â mugliera che sudiciaria comunque addó aggio misso chelle pezze ah sì 'o saccio sperammo ca ll'armadio nun scricchiuléa ah 'o sapeva isso dorme sodo se dev'essere divertuto lle deve avé fatto spènnere bene 'o denaro suo naturalmente mica ll'ha avuta gratis Oh che scucciatura spero ce sia riservato quaccosa 'e meglio dint'a ll'ato munno a ce legà tutte accussì Dio ce scampe e libbera pe stanotte va bene accussì e mò 'o viecchio lietto bozoloso e tintinnante me ricorda sempe 'o viecchio Cohen ce se dev'essere grattato spisso dinto e isso crede ca papà ll'ha accattato 'a Lord Napier ca io ammirava 'a criatura pecché ll'aveva ditto chianu chiano Oh comme se sta bene a lietto Dio ce risimmo comme ô sòleto doppo sídece anne 'n quante case sarrammo state Raymond terrace e Ontario terrace e Lombard street e Holles street e isso se ne va attuorno fischianno ogne vota ca se deve sloggà sempe chille ugonotti o 'a marcia d''e rànocchie facenno finta 'e aiutà 'e uommene cu chille 4 stiecche 'e mòbbele ca tenimmo e po' ll'albergo City Arms 'e peggio 'n peggio dice 'o provosto Daly chillu posticino delizioso ncopp'ô pianerottolo sempe quaccheduno dinto a pregà po' tutte se lassàvano arreto tutte 'e puzze lloro se sape sempe chi ce sta stato pe úrtemo e che ne dice 'e sti penziere 'o cui corzo oje m'è capitato 'e seguì fanno schifo sò bbielle 'o trucco ca aggio aduperato pe 'e penzà è 'nu viecchio trucco aggio araputo ll'Ulisse 'e Joyce e ne aggio liggiuto 'na pàggina mèntre 'e uocchie mije scurrèvano 'o testo me songo retruvato sti parole 'mmente e accussì senza dubbio 'e steva penzanno già ca ce steva aggio pe coincidenza scritto 'n tiempo reale chello ca me passava p''a capa ô ritmo fisso d''a lettura e ecco allora avanzà sta lettera doppo 'a chiusura d''o libbro e 'a scomparsa 'e chille penziere dâ capa mia accussì fora ca p''e primme vinte parole circa 'e stu piezzo e po' mò a ripartì 'a quacche mumento fa 'mméce ca delirà io aggio lassato delirà Joyce e po' dicíteme vuje si isso a tiempo suo e po' pure doppo 'o tiempo suo nun v'ha pigliato p''o culo a tutte.

Roberto Quaglia