ce sta tutta 'na categoria 'e perzone, ca racchiude tutta ll'umanità, ca nun capisce assolutamente che cosa 'A MORTE sia, suprattutto si se cunvince 'e ll'avé capito. 'N sta categoria naturalmente ce traso pure io, comme se sarrà ben pututo capì liggenno 'a lettera mia 'e ajere. 'A prova d''a 'ncomprensione 'e chello ca 'a morte sia ce vène data d''e perzone stesse ca nun 'o capìscono, appena ce 'o se chiede. 'A risposta sarrà sempe 'na metàfora, maje manco luntanamente 'a cosa 'n sé. 'E cchiù campagnule rispunnarranno ca 'a morte è se retruvà dint'a 'nu giardino sciurito tutto chino 'e rusciélle e 'nu sacco 'e frutta, nonché angiulille ca svulàzzano, 'nu viecchio barbuto Dio sornione ca ogne tanto s'affaccia surridente d''o squarcio preferito suo tra 'e nuvole e nun ce scurdammo 'a scritta EDEN ncopp'ô purtone 'e trasuta. A chiunque sia accussì campagnulo 'a se raffigurà 'o doppomorte suo accussì nun tène senzo rispònnere 'n nisciun muodo. Tutte ll'ate capìscono facilmente ca se tratta 'e 'na metàfora assaje semplice. A chìste piace o piacarrìa stà 'n giardino a se gòdere chello ca ce se gode stanno 'n giardino, e allora che ce sta 'e meglio ca se cunvìncere ca 'o farranno pe tutta ll'eternità?
'N realtà, ognuno ca creda a ll'esistenza d''o paraviso s'è cunvinto ca 'o paraviso àbbia 'a essere comme isso (o essa) ha deciso ca 'o paraviso àbbia 'a essere. Ognuno è defatte, sotto sotto, 'o Dio d''o paraviso suo. Che paraviso sarrìa, si nun fosse proprio comme nuje 'o vularrìamo? Pecché ognuno 'e chille ca crede dint'â esistenza d''o paraviso tène 'na visione tutta soja 'e comme 'o paraviso sarrà, è evidente ca almeno tutte fora uno se sbàgliano (oppure ce sta 'nu paraviso ncopp'a mesura pe ognuno? Ma si è accussì, ogne paraviso ospitarrà sulo 'na perzona sola, fora naturalmente Dio ca è ubiquo. Nun sarrà nuiuso, â longa?), o fórzo - cchiù ragionevolmente - se sbàgliano addirittura tutte.
Lassanno 'e clàssece paraviso, inferno e purgatorio, 'e cui già fin troppo se parla, esìstono 'nnumerèvole ate muode 'e se raffigurà 'a vita doppo 'a morte, oppure, cchiù semplicemente, 'a morte.
'A morte po' venì vista comme 'nu "passaggio" verzo 'na nova cundizione, comme 'na "liberazione" 'a quaccosa, comme 'na "cumunione" cu quacche cos'ato. Bene, si ce penzate cunvenarrite senz'ato ca se tratta 'e metàfore e niente 'e cchiù. Tenenno esperienza 'e "passà" 'n vita 'a 'na cundizione a ll'ata, estennimmo sta esperienza ô fenòmeno 'e murì, e descrivènnolo comme 'nu "passaggio" ce illudimmo 'e ne sapé accussì cchiù 'e primma. Ben sapenno quale sollievo ce dà 'a "liberazione" 'a quaccosa ca ce opprime, sona bene a 'e recchie noste ca sta esperienza se po' applicà â morte. Arricurdanno quanta gioia avimmo pruvato durante ll'ìntima "cumunione" cu 'na perzona cara o cu 'na idea astratta idealizzata, ce piace ce cuntà ca 'a morte àbbia 'a essere proprio 'na facenna 'e stu genere.
Si assaje perzone rièscono a evità 'e rappresentazione cchiù kitsch e banale, nisciuno, nisciuno, nisciuno, penzanno â morte, riesce a sfuggì â metàfora, dimostranno accussì 'e nun stà penzanno 'n realtà â morte, ma a quacche cos'ato. Tìpeco d''a metàfora è 'e significà 'na cosa pe ll'ata. Si defatte dico a 'na femmena "'E llàbbra toje sò pètale 'e rosa", nun spiego pe niente che cosa sò 'e llàbbra soje, ma allùdo sulo ô fatto ca esse sò morbide comme pètale 'e rosa. Pe furtuna tutte sapimmo che cosa sò 'e llàbbra, pecché ognuno 'e nuje ha visto, tuccato e fórzo pure vasato almeno 'nu paro 'e llàbbra. Ma si spiegàssemo a 'n extraterrestre 'ntelligentìssemo ma senza llàbbra (pe esempio 'n extraterrestre a forma 'e carciòffola), ca 'e llàbbra sò "pètale 'e rosa", isso credarrìa 'e avé capito che sò 'e llàbbra (pecché, essenno 'na carciòffola, tène quacche esperienza 'e ciure e pètale), ma nuje sapimmo ca 'n realtà avarrìa capito quaccosa 'e completamente sbagliato. Penzarrìa ca 'e llàbbra sò 'e pètale. Niente 'e cchiù sbagliato!
 stessa manera, quanno 'na perzona penza â morte comme â "pace eterna", comme a 'nu "meritato ripuoso", comme a "truvà 'a quiete soja", evidentemente fa uso 'e metàfore ca nun dìcono d''a morte cchiù 'e quanto 'e pètale 'e rosa spiègano d''e llàbbra â carciòffola extraterrestre. Sulo pecché 'nu muorto nun se move pe niente, accussì vagamente assumiglianno (ma sulo vagamente) a 'na perzona ca se sta arripusanno, penzammo lècito se cunvìncere ca 'a morte SIA 'nu ripuoso eterno. Si ce tenìssemo 'o muorto 'n salotto (o meglio, dint'â càmmera soja) pe sei mise, e 'o vedìssemo e ll'addurassemo decompònnere 'n viérmene e accussì se trasfurmà 'n mosche, fórzo cagnàssemo 'a metàfora nosta (e immàggine mentale) ncopp'â pace eterna.
'N realtà, quanno quaccheduno more, nun esiste cchiù. Ma pure chesto nun è curretto. O quaccosa esiste o nun esiste. "Nun esìstere cchiù" nun è 'na categoria 'e esistenza. Nuje definimmo morta 'na perzona 'e cui sentimmo sussìstere tracce 'e memoria dint'â mente nosta. Si ste tracce nun ce stanno o svanìscono, chella perzona nun è morta, pe nuje. Semplicemente, essa NUN È. Nun esiste. Nun esiste, né è maje esistuta, né esistarrà maje.
Arricordo ca 'a criaturo tenette, 'n varie occasione, 'na cuscienza intensìssema, muta, senza parole, 'e chello ca 'a morte significasse, e se trattava 'e 'nu cuncètto 'nesprimìbbile e terrificante. M'è assaje difficile (ma nun impossìbbile), 'a gruosso, retruvà 'a stessa agghiacciante cuscienza. Tengo 'mmente troppe metàfore, ncopp'â morte, ca dànnome ll'illusione 'e 'a capì meglio 'n realtà m'alluntànano d''a comprensione 'e chello ca essa sia. 'A criaturo, evidentemente, subivo 'n mesura minore ll'inquinamento metafòreco, e m'era accussì possìbbile avvicinàrme 'e cchiù a ll'archetipo d''a morte.
'A cchiù parte d''e perzone mature o anziane fernìscono 'e se preoccupà o 'e suffrì ô penziero 'e avé 'a murì, avènnone pe esempio accettato ll'ineluttabilità. È 'na osservazione ca me dà sollievo, pecché putesse succedérme 'e addiventà viecchio pure io. Ma me dà pure 'a penzà. 'A morte è 'a morte, a qualunque età. Pecché 'mpaura 'n media 'e cchiù 'a giùvene ca 'a viecchie? 'A risposta è ca cu 'o passà 'e ll'anne e d''e decenne, 'e metàfore ca se sostituìscono a 'na 'nquietante comprensione 'e chello ca murì significhe, se fortificano e se radicalìzzano. Summerzo 'e metàfore, ll'agghiacciante archetipo d''a morte scumpare â vista, pe sempe, fino â morte. ll'argumiento preferito d''a cchiù parte 'e ll'ultraottantenne sò ll'ùrteme nutizie ncopp'ô fronte d''a morte. Pàrlano tra 'e lloro 'e chi sia appena muorto e 'e chi sta pe murì. Oje ce stammo, dimane chissà. Tutto chesto cu gran carma e normalità, comme si 'mméce 'e ì a murì se parlasse 'e ì a fa... 'nu viaggio.
Mò facite 'nu bbuono esercizio. Pruvate a penzà â morte, e penzate a chello ca penzate ca 'a morte sia. È 'na metàfora? Ovèro, se tratta 'e 'na visione ca nasce d''a esperienza vosta... terrena? Allora è sbagliata. Defatte nun po' essere ato ca sbagliata. Si avarrite eseguito correttamente ll'esercizio, avarrìate accummencià a sentì già 'e primme effette suoje. 'Na certa 'nquietùdene, fórzo addirittura ansia, certamente nun 'na sensazione 'e piacere. Ah, a propòseto: ve sarrite addunate ca chesto nun è uno 'e chille tìpece sagge psicològece tipo "'A vita dint'a 'e mane toje" o "Pecché s'accìdere? Nun 'o facite!" ca vularrìano a parole risòlvere tutte 'e prubbleme vuoste. Ccà sto innegabilmente cercanno 'e aumentà, a parole, 'a quantità d''e prubbleme vuoste. Tuttavia, pecché 'a totale e definitiva assenza 'e prubbleme, pe quanto ne sapimmo, è tìpeca sulo d''a morte, me pare 'e nun ve fa 'nu eccessivo dispietto. Tra ll'ato, ditto tra nuje, nun saccio manco chi site, ovèro chi sia defatte chillo o chella a cui me starrìa rivolgenno. Nun sento 'e me rivòlgere a quaccheduno 'n particulare. Ma chiunque sta mò liggenno ste righe è incontrovertibilmente 'a perzona 'n particulare â quale senza dubbio me sto rivolgenno. Primma 'e essere detestato cchiù 'e quanto me va bene 'e ll'essere, me sento 'n dovere 'e suggerì a chi se sentesse danneggiato d''o esercizio appena pruposto 'a me, ll'antìdoto a 'e effette collaterale 'e chello ca io scrivo: Appicciate 'a televisione, vagate 'nu congruo nùmmero 'e minute tra 'e canale cu 'o telecomando, po' guardate, a oltranza, chello ca ce sta ncopp'ô schermo, fino â scumparsa d''e sìntome. Funziona sempe. Quanno io stesso ripòrto 'e danne d''a lettura 'e chello ca quacche vota scrivo, ricorro cu successo a stu ormaje antico antìdoto, 'na vera panacea cuntra 'e patologgie d''o penziero.
'N cunclusione: Qualunque metàfora nuje s'adotta pe se raffigurà 'a morte, simmo certamente 'n errore. Tra tutte 'e metàfore immagginàbbele, ce ne sta però una ca 'nu poco 'e attinenza oggettiva cu 'o passaggio d''a esistenza â non esistenza ce ll'ha, e se tratta d''a nascita. Immagginanno 'e percòrrere a ll'arreto 'a vita nosta, essa cessa ô mumento d''a nascita. Chi s'arricorda ll'istante d''a nascita soja? ll'istante d''a morte nosta ce farrà probabilmente 'o stesso idèntico effetto d''a nascita nosta, ovèro nisciuno. È lògeco penzà ca doppo muorte ce sentarrammo esattamente comme primma 'e nàscere. Comme ve sentìveve, durante tutta ll'eternità passata d''a origine d''e tiempe fino ô mumento d''a nascita vosta?

Roberto Quaglia