e je dute une categorie di personis, che e ten dentri dute la umanitât, che no capìs nancje par sium ce che LA MUART e sedi, soredut se si convinç di vêlu capît. In cheste categorie naturalmentri o jentri ancje jo, come che si varà podût capî ben leint la mê letare di îr. La prove de incomprension di ce che e sedi la muart nus ven dade des personis stessis che no lu capissin, apene che si ur domande. La rispueste e sarà simpri une metafore, mai nancje di lontan la robe in se. I plui campagnûi a rispuindaran che la muart e je cjatâsi intun zardin florît plen di rois e di un grum di frute, e ancje agnuluts che a svolin, un vieli Diu cun la barbe e fûr di furbo che ogni tant si mostre ridint de sô sbreghe preferide tra i nûi e no dismenteìn la scrite EDEN sul puarton di jentrade. A cualsisei che al sedi cussì campagnûl di figurâsi il so dopomuart cussì no à sens rispuindi in nissune maniere. Ducj chei altris a capissin facilmentri che si trate di une metafore une vore sempliç. A chei ur plâs o ur plasarès stâ in zardin a gjoldisi ce che si gjolt stant in zardin, e alore ce isal di miôr che convincisi che lu fasaran par dute la eternitât?
In realtât, ognidun che al crôt ae esistence dal paradîs si è convint che il paradîs al vedi di jessi come che lui (o jê) al à decidût che il paradîs al vedi di jessi. Ognidun al è difat, sot sot, il Diu dal so paradîs. Ce paradîs saressial, se nol fos pròpit come che o volaressin nô? Stant che ognidun di chei che a crodin te esistence dal paradîs al à une vision dute sô di cemût che il paradîs al sarà, al è clâr che almancul ducj gjavât un a falin (o ben isal un paradîs su misure par ognidun? Ma se al è cussì, ogni paradîs al ospitarà dome une persone sole, oltri naturalmentri Diu che al è dapardut. No sarano noiôs, a la lungje?), o forsit - plui ragjonevulmentri - a falin adiriture ducj.
Lassant i classics paradîs, infier e purgatori, che za di lôr si fevele fin masse, a esistin tancj altris mûts di figurâsi la vite dopo la muart, o ben, plui semplicementri, la muart.
La muart si pues viodile come un "passaç" viers une condizion gnove, come une "liberazion" di alc, come une "comunion" cun alc altri. Ben, se o pensais o sarês dacuardi cence dubi che si trate di metaforis e nuie di plui. Vint esperience di "passâ" in vite di une condizion a chê altre, o slargjìn cheste esperience al fenomen dal murî, e descrivintlu come un "passaç" si ilusionìn di savênt cussì plui di prime. Savint ben ce solêf che nus da la "liberazion" di alc che nus oprim, al sune ben aes nestris orelis che cheste esperience si podedi aplicâ ae muart. Visantsi trope gjonde che o vin provât te "comunion" intime cuntune persone cjare o cuntune idee astrate idealizade, nus plâs contâsi che la muart e vedi di jessi pròpit une robe di chest gjenar.
Se tantis personis a rivin a evitâ lis rapresentazions plui kitsch e banâls, nissun, nissun, nissun, pensant ae muart, al rive a scjampâ de metafore, dimostrant cussì di no stâ pensant in realtât ae muart, ma a alc altri. Tipic de metafore al è di significâ une robe pe altre. Se difat o dîs a une femine "I tiei lavris a son petui di rose", no spieghi par nuie ce che a son i siei lavris, ma o fâs cenon dome al fat che a son morbits come petui di rose. Par fortune ducj o savìn ce che a son i lavris, parcè che ognidun di nô al à viodût, tocjât e forsit ancje bussât almancul un pâr di lavris. Ma se o spiegassin a un extratierestri inteligjentissim ma cence lavris (par esempli un extratierestri in forme di articioc), che i lavris a son "petui di rose", al crodarès di vê capît ce che a son i lavris (parcè che, stant che al è un articioc, al à cualchi esperience di rosis e petui), ma nô o savìn che in realtât al varès capît alc dal dut sbaliât. Al pensarès che i lavris a son i petui. Nuie di plui sbaliât!
Te stesse maniere, cuant che une persone e pense ae muart come ae "pâs eterne", come a un "polsâ meretât", come al "cjatâ la sô cuiete", evidentementri e dopre metaforis che no disin de muart plui di trop che i petui di rose a spiegjin dai lavris al articioc extratierestri. Dome parcè che un cadavar nol si môf par nuie, someant cussì un pôc (ma dome un pôc) a une persone che e polse, o tignìn leciti convincisi che la muart E SEDI un polsâ eterni. Se o tignissin il cadavar in salot (o miôr, te sô cjamare) par sîs mês, e lu viodessin e lu nasassin disfâsi in viers e po trasformâsi in moscjis, forsit o cambiaressin la nestre metafore (e imagjin mentâl) su la pâs eterne.
In realtât, cuant che cualchidun al mûr, nol esist plui. Ma ancje chest nol è just. O alc al esist o nol esist. "No esisti plui" no je une categorie di esistence. Nô o clamìn muarte une persone che o sintìn che a restin olmis di memorie te nestre ment. Se chestis olmis no son o a sparissin, chê persone no je muarte, par nô. Semplicementri, jê NO JE. No esist. No esist, ni e je mai esistude, ni e esistarà mai.
Mi visi che di frut o vei, in plui ocasions, une cussience intensissime, mute, cence peraulis, di ce che la muart e voleve dî, e si tratave di un concet che no si pues dî e che al fâs pôre. Mi è une vore dificil (ma no impussibil), di grant, tornâ a cjatâ la stesse cussience che e glace. O ai in ment masse metaforis, su la muart, che dantmi la ilusion di capîle miôr in realtât mi slontanin de comprension di ce che e je. Di frut, evidentementri, o subivi mancul la contaminazion metaforiche, e mi jere cussì pussibil svicinâmi di plui al archetip de muart.
La plui part des personis madurivis o anzianis a smetin di preocupâsi o di patî al pinsîr di vê di murî, vint par esempli acetât che no si pues scjampâ. E je une osservazion che mi da solêf, parcè che mi podarès sucedi di deventâ anzian ancje jo. Ma mi da ancje di pensâ. La muart e je la muart, a cualsisei etât. Parcè fasie pôre in medie di plui di zovins che di vecjos? La rispueste e je che cul passâ dai agns e des decenis, lis metaforis che a cjapin il puest di une comprension inchietant di ce che al vûl dî murî, si rinfuarcin e si inlidrisin. Cuvierte di metaforis, l'archetip de muart che al glace al sparìs de viste, par simpri, fin ae muart. L'argoment preferît de plui part dai oltri-otantens a son lis ultimis gnovis sul front de muart. A fevelin tra di lôr di cui che al è apene muart e di cui che al sta par murî. Vuê o sin, doman cui sa. Dut chest cun grande calme e normalitât, come se invezit di lâ a murî si fevelàs di lâ a fâ... un viaç.
Cumò fasêt un biel esercizi. Provait a pensâ ae muart, e pensait a ce che o pensais che e sedi la muart. Ise une metafore? Cioè, si tratial di une vision che e nas de vuestre esperience... su la tiere? Alore e je sbaliade. Di fat no pues jessi altri che sbaliade. Se o varês fat ben l'esercizi, o varessis di tacâ a sintî za i siei prins efiets. Une cierte inchietece, forsit adiriture ansie, di sigûr no une sensazion di plasê. Ah, a proposit: si sarês inacuarts che chest nol è un di chei sagjis psicologjics tip "La vite tes tôs mans" o "Parcè copâsi? No stait a fâlu!" che a peraulis a volaressin risolvi ducj i vuestris problemis. Chi o stoi cence dubi cirint di aumentâ, a peraulis, la cuantitât dai vuestris problemis. Cun dut chel, stant che la assence totâl e definitive di problemis, par ce che o savìn, e je tipiche dome de muart, mi semee di no fâus un dispiet esagjerât. Tra l'altri, dit tra di nô, no sai nancje cui che o sês, o ben cui che al sedi di fat chel o chê che mi stares rivolzint. No sint di rivolzimi a cualchidun in particolâr. Ma cualsisei che al sta cumò leint chestis riis al è cence dubi la persone in particolâr che mi stoi rivolzint. Prime di jessi odeât plui di trop che mi vadi ben di jessilu, mi sint in dovê di sugjerî a cui che si sintìs danegjât dal esercizi che o ai apene proponût, l'antidot ai efiets colaterâi di ce che o scrîf: Impiait la television, zirait un numar just di minûts tra i canâi cul telecomant, po cjalait, fin ae fin, ce che al è sul schermi, fin che i sintoms a sparissin. Al funzione simpri. Cuant che jo stes o ripuarti dams de leture di ce che cualchi volte o scrîf, o ricor cun sucès a chest antidot oramai antîc, une vere panacee cuintri lis patologjiis dal pinsîr.
Par concludi: Cualsisei metafore che o cjolin par figurâsi la muart, o sin di sigûr in erôr. Tra dutis lis metaforis che si puedin imagjinâ, a 'nd è però une che un pôc di atinence ogjetive cul passaç de esistence ae no esistence le à, e si trate de nassite. Imagjinant di fâ indaûr la nestre vite, e finìs tal moment de nassite. Cui si visial dal moment de sô nassite? Il moment de nestre muart nus fasarà probabilmentri il stes identic efiet de nestre nassite, o ben nissun. Al è logjic pensâ che dopo muarts si sintarìn juste come prime di nassi. Cemût si sintivis, dilunc di dute la eternitât passade dal inizi dai timps fin al moment de vuestre nassite?

Roberto Quaglia