uno tra 'e cchiù diffuse preconcette è ca 'a morte sia quaccosa 'e negativo. Santa Mamma Chiesa ce suggerisce pure 'nu preconcetto cuntrario, ovèro ca 'a morte sia 'n realtà ll'inizio d''a vera vita, e ca accussì, 'ntrinsecamente, 'a morte sia bene 'mméce 'e male. Ma po', Santa Mamma Chiesa ce fa 'na assaje magra figura quanno 'o papa 'e mò, cuppato 'a malatie d''a carne, nun se vota fiducioso â Santa Provvidenza, ma ô laico Policlinico Gemelli, spitale terreno assaje. Mèntre pilote 'e Formula Uno mèttono a ogne Gran Premio 'a vita lloro dint'a 'e mane 'e Dio, mèntre dittature spietate fanno 'o stesso cuncedènnose perigliuse bagne 'e folla potenzialmente ostile, 'o Papa nun òsa manco se mustrà a 'e fedele suoje senza 'a màcabra cascia protettiva 'e cristallo trasparente stabilmente posta ncopp'â vettura fuoriserie soja, dimostranno accussì 'e avé meno fiducia dint'â protezione divina 'e chella ca tènono pilote e dittature, e esibenno pure 'na evidente iper-preoccupazione verzo chillu famuso sàveto, a parole sempe decantatìssemo, verzo 'a Vera Vita d''o Regno d''e Cieli.
Ma nun vuleva scrìvere sta lettera pe fa pubblicità ô Papa. Vuleva mèttere annuro, pe quanto sia dint'a 'e possibilità mije, 'o fatto ca 'o valore negativo dato â morte sia 'nu preconcetto, o quaccosa 'e stu genere.
Sapimmo ca nun vivimmo pe sempe. 'A vita nosta nun è 'nfinita, ma fenita. Essa tène 'e lìmmete. Quale sò? 'O lìmmete ô quale penzammo sempe è chillo ca chiammammo "Morte". Doppo stu lìmmete, nuje nun ce stammo. È chesto però ll'ùneco lìmmete assoluto d''a vita nosta? No, ce ne sta 'n ato. Pure dint'â direzione cuntraria ce sta 'nu lìmmete, primma d''o quale nuje nun ce stammo. Chiammammo stu lìmmete "Nascita". Morte e nascita 'n realtà nun esìstono, sò cuncètte ca nun tènono senzo, tant'è overo ca ll'uommene (e pure assaje femmene) nun sò maje riuscite a se mèttere d'accordo ncopp'a chello ca esattamente significàssero. Pe certuni 'a vita umana accummència a ll'atto d''o cuncepimento. Pe ate chesto succede buono nove mise doppo. Io addirittura sustengo ca 'a vita "umana" accummenciasse ancora doppo, quanno 'o criaturo nun sia cchiù 'nu tropismo d''o tutto senza spazio mentale, e acquisisce 'o linguaggio umano e cu chesto, finalmente, 'a cuscienza e 'a capacità 'e arricurdà, coscientemente, 'o passato. Pure ncopp'â morte ce stanno certe dispute. A parte chi a parole se dice cunvinto ca 'a morte sia 'n realtà ll'inizio 'e 'na vita nova cchiù bella (e allora pecché nun cerca 'e murì ampressa?), ce sta chi dice ca 'a morte nun esiste pecché quanno ce stammo nuje, essa nun ce sta, e quanno ce sta essa, nun ce stammo cchiù nuje.
ll'essere umane pènzano: Nàscere è bello. Murì è brutto. Ma tutt'e dduje sò cunfine d''a vita, dâ stessa mesura. ll'ùneca differenza è ca penzammo ca 'a nascita nun ce po' cchiù succèdere, mèntre 'a morte ce succedarrà. Chesta è 'na cunseguenza d''o fatto ca arricurdammo 'o passato, ma nun 'o futuro. Ovvio, penzarrà chi mò me sta liggenno. No, nun è ovvio, penzo nun sulo io, ma pure uno d''e cchiù gruosse scienziate vivente "Stephen Hawking".
Dint'ô libbro ben nuto suo "Dal big bang ai buchi neri" ('mpropia traduzione d''o tìtulo originale 'nglese "A brief history of time"), Hawking introduce 'o cuncètto 'e "freccia psicològeca d''o tiempo". Nun jarraggio dint'a 'e particulare pe duje 'mpurtante mutive: 'o primmo è ca chi ha deciso 'e lèggere chello ca aggio scritto io 'mméce 'e chello ca ha scritto Hawking tenarrà 'e mutive buone (o pèsseme) suoje. 'O secondo mutivo è assaje cchiù vàleto, e è fatto d''a inadeguatezza mia a ì dint'a 'e particulare 'n 'nu campo addó ce farrìa sùbbeto 'e gran brutte figure. Citarraggio accussì sulo 'na frase 'e Hawking: "'E legge d''a scienza nun distìnguono tra passato e futuro". Nuje 'o facimmo, pecché 'a accussì ditta freccia psicològeca d''o tiempo è girata d''o passato verzo 'o futuro. Ma 'n senzo assoluto (o, si nun ve piàceno ll'assolute, 'n senzo scientìfeco, o matemàteco), ce sta totale equivalenza tra passato e futuro.
'O fatto ca 'o passato sia già succieso e 'o futuro àbbia ancora 'a succèdere sò categurie 'e penziero noste. Secondo 'e scienziate, 'a Einstein 'n poi, tutto chello ca esiste è ll'universo, ovèro 'na "bolla" spaziotemporale fenita, ca comprende tutto 'o spazio e tutto 'o tiempo ca ce sò state, ce stanno e sempe ce sarranno.
Aduperammo 'na metàfora semplice. Tutto chello ca esiste è 'nchiuso dint'a 'nu libbro. Naturalmente, isso esiste tutto a 'o stesso tiempo. Quanno liggimmo 'o libbro, ce pare ca 'o tiempo scorre, 'e perzone primma nàscano e po' muòrono. Ma si liggimmo diece vote 'e seguito 'a pàggina addó ce sta uno ca nasce, chillu puveriello pe nuje nasce diece vote, pure essenno però sempe vivo 'na vota sola. Doppo ca uno è muorto, putimmo agilmente turnà arreto 'e quacche pàggina e ecco ca è n'ata vota vivo, pure essenno già muorto dint'ô futuro d''o libbro. Oppure putimmo lèggere ciento vote 'o libbro d''o principio â fine e pe ciento vote ce pare ca ll'avvenimiente cuntenute dinto pìgliano vita e se cunzùmano. O 'mméce, cu 'nu poco 'e fatica, putimmo lèggere 'o libbro ô cuntrario, e ecco ca dâ morte sòrgono 'e vive ca po' spariscono ô mumento d''a nascita e accussì via, fino ô principio addó tutto fernisce. Qualunque cosa nuje se decida 'e fa, 'o libbro cuntinua a cuntené tutto chello ca dint'ô libbro è succieso, succede e dint'ô futuro succedarrà. Si nun tenite dimestichezza cu 'e libbre se po' fa 'o stesso esempio cu 'nu film. Ecco, ll'universo è 'n stu senzo comme 'nu libbro o 'nu film, ca però nuje putimmo lèggere o guardà (o meglio vìvere) sulo pe 'nu verzo. E chesta sarrìa 'a freccia psicològeca d''o tiempo. 'N realtà, a prescìnnere d''o punto 'e vista obbligato nuosto, tutto 'o tiempo esiste a 'o stesso tiempo 'nzieme cu tutto 'o spazio 'e cui è tutt'uno, pe cui niente 'n realtà svanisce o appare, pecché tutto a 'o stesso tiempo e stabilmente è, 'n stu ipotètico Gran Libbro 'e ll'Universo.
Mò me so' perzo 'n sti discurze quanno 'mméce me vuleva cuncentrà ncopp'ô preconcetto ca 'a morte sia quaccosa 'e negativo. Parlarrammo allora ancora 'e morte dint'â lettera ca vène, si nun moro primma, o si nun murite primma vuje.

Roberto Quaglia