certo ca "caro Maurizio Costanzo Show" è proprio 'nu bello tìtulo... 'Nu tìtulo ca jetta 'nteresse ncopp'a qualunque cosa ce sta scritta sotto. Allora vo' dìcere ca qualunque puttanata addiventa 'nteressante si è bona 'ntitulata? O pure... tutto è 'nteressante, abbasta 'o guardà cu 'nteresse? (Fórzo pe chesto 'na femmena prena sta 'n stato 'nteressante? Pecché tutte 'a guàrdano cu 'nteresse pe via d''a panza strana soja?) Qualunque cosa fórzo è degna 'e 'nteresse, abbasta 'o ssapé ce 'o dà. Sì, sì. Fora ca 'o ssapé vedé, ce vo' 'o ssapé penzà. Chi guarda senza penzà, nun vede, filma. È 'na telecàmmera, 'nu strumento 'e percezione visiva senza cuscienza. Dice Gigi Picetti, ca guarda 'o monitor d''o computer mèntre te scrivo: "...però areto â telecàmmera ce sta 'na perzona ca penza e fa, scegliènno cu cura 'e muvimiente 'e màcchena pe registrà chello ca lle va."
Ma nun ce perdimmo, caro Maurizio Costanzo Show. Oje ben ato te voglio dìcere. T'aggio visto ajere sera dint'a 'nu bar, e tutte te guardàvano. Songo 'nu poco geluso. Trasive tutte 'e sere dint'â casa mia, alluminanno cu 'o cinescopio 'a sulitùdene mia, e te credevo tutto pe me. 'A ragione me diceva ca jive cu tutte, a casa, ma 'o core, viecchio idealista, vuleva cchiù priesto se 'ngannà. Ma a te vedé llà, dint'a chillu bar, attuorniato 'a maleducate 'mbriache ca ruttàvano e dicèvano parolacce, m'ha fatto proprio male. E dint'â mente mia se sò scatenate penziere perzecutorio-paranoiche: t'aggio visto faccia a faccia cu figure lorde, cu maniace, psicopàteche, cocainòmane, torturature, andreotti, ultras e naziskin. 'Nzomma, ire 'e tutte. Nun scigliive, te facive scègliere. 'A chiunque te vuleva. Io ero sulo uno d''e tante. 'Nu 'nfinitèsimo sottomùltiplo dint'â ammucchiata nazziunale d''o share. Dint'a chillu bar me songo 'mbriacato 'e frizzantino e vermouth, 'mbrodolànnome tutto. Po' songo asciuto zigzaganno, fumanno e chiagnenno. Aggio 'nsultato nun saccio a chi, però menava forte. Strazzato e sanguinanno, songo stato arrunzato ncopp'ô marciappiede 'a 'nu missionario tossicòmane, dint'ô lietto 'e chi me songo arresbigliato 'a dimane, ca fetevo 'e cìpria e vòmmeto.
Dint'â casa nun ce stava cchiù nisciuno, songo asciuto e aggio visto llà vicino certi giardinette. Assettato ncopp'a 'na panca d''o parco guardavo ll'oleandre e penzavo: "Nun è tutto brutto, ce sta 'e meglio." Scucciato 'e essere 'ncomprensibbele pure a me stesso, cercavo 'e capì 'e raggiune annascuse d''o ottimismo mio rozzo, danno 'o stesso tiempo 'a magnà a passariélle ca nun sapèvano niente cu 'e mìneme piezzille d''e patatine 'mpussate dint'ô bar, tra 'nu bicchiere e ll'ato, 'a sera primma, e fatte mille piezze mèntre m'avèvano menato.
Ed ecco ca m'assàllono immàggine idilliache: tu, Maurizio Costanzo Show, trasive a tarda sera dint'a salotte rococò, 'mmiezo a ninne-ninne, cioccolatine e pénnele, accuoto d''e gentile rampolle 'e ll'auto proletariato. Sentevo sussurre e strille 'e gradimento, ca se spannèvano d''e giuvene 'n fiore a 'e nonne appassite, e 'a tutte 'e parte risatelle e uocchie lustre, 'mmiezo a twinning e chivas e caffarel agliuttute chianu chianu.
Passa dint'ô giardinetto 'nu varvone ca arrobba 'e mulliche 'e patatine a 'e passere, gruffuliànno gulùso a quatto piére, e 'o penziero vola a ate poste, cagnate d''a presenza toja ca tutto trapassa e nun fa classe, e te veco dint'â spogliata catapecchia 'e 'na famiglia prulìfeca ca tène abbisuogno. 'E 'nfisse ca càdono e 'e facce sciupate... 'a chi sò allumminate? 'A chi, si nun 'a te, Maurizio Costanzo Show? A chi ato è permisso 'o miracolo? Tu sulo unifiche, tu sulo a tutte te daje d''a stessa mesura!
E allora ll'angoscia d''o spìreto mio s'è gerata 'n serenità, 'a pena 'e ll'ànemo s'è fatta cunzulazione e 'a tenaglia d''a gelusìa ha mullato 'o core mio dulente. Aggio capito ca 'a presenza toja menata cu tutte dint'a 'e notte 'e tutte quante è messaggio 'e 'nu sentì cummune, 'e generuso ulocausto, 'e ammore universale.
Mò sto meglio, tant'è overo ca aggio appena fernuto 'e me sprìmere accussì. 'E effette 'e stu mio riequilibrio cuntinuàrranno pô riesto d''a lettera, te ne staje addunanno, spero. Te parlavo, primma d''o delirio mio 'e gelusìa (acquietata), d''o valore 'e ogne cosa, si guardata cu 'a giusta dose 'e attenzione, 'nteresse e cuscienza. Facimmo ll'esempio 'e 'nu sciore. Tu passe e manco 'o guarde. Fórzo 'o piste pecché ce ne sò tante. O pure ne accatte d''o sciuraro 'e muorte tagliate, ca ancora gócciano lenfa e attaccate 'n mazzo, pe te tené bona â femmena.
'N'ata vota 'mméce te truove a fa niente stiso ncopp'a 'nu prato, e ll'uocchio te casca ncopp'a 'na margherita. Sta vota 'a guarde 'a vicino e scuopre 'nu microcosmo. Ce stanno 'e stame, 'e pistille, 'e fugliarelle e tutte chille criste e maronne ca t'hanno spiegato a scola ca fanno parte d''o sciore e ca nun saje cchiù comme se chiàmmano, ma ce stanno, 'e vide e te 'nteressano, capisce ca sò ll'òrgane 'e 'n essere vivente e t'emoziune (si nun si d''o tutto rincuglionuto, naturalmente). T'emoziune e pienze ca chello ca tu chiamme senza ca essa 'o ssape margherita, mena 'na vita orgàneca cumplessa e sessualmente stravagante, accuppiànnose cu 'e suoje pare pe miezo 'e n animale, scatenanno tutt'e juorne orge p'aria fatte 'e 'nsette ca ce stanno, fora d''a murale umana e umano-divina.
E allora te vène 'a penzà: pecché 'na margherita nun po' jì ô Maurizio Costanzo Show, e 'na pornostar sì?

Roberto Quaglia
Gigi Picetti