‹ Indiz de' sit · Ca de' museo · repêrt restaurê
Spartìs:FacebookXWhatsAppTelegramEmail
A t'âm, pio Maurizio Costanzo Show! (Caro Maurizio Costanzo Show... lettera n.5)




lètra n.5



U s'duvrèb gòdar dla gioia, dla bëlëza, de' culór, dla vita. Manch ch'u s'parla dal piaghi dla vita e mèj l'è.

OSCAR WILDE






















A T'ÂM, PIO MAURIZIO COSTANZO SHOW

Caro Maurizio Costanzo Show,

zért che "caro Maurizio Costanzo Show" l'è pröpi un bël tìtul... Un tìtul ch'e' bóta interès sóra a qualsìasi cvël ch'u i sia scrët sota. Alóra e' vô dì che qualsìasi caghêda la dvénta interesânta s'l'è intitulêda bën? Opùr... tot l'è interesânt, basta guardêl cun interès? (Fórsi l'è par quèst che una dòna incinta l'è in stê interesânt? Parchè tot i la guêrda cun interès par via dla su pânza strêna?) Qualsìasi cvël prubabilmënt l'è dègna d'interès, basta savéiél dê. Sè, sè. Ôltra che savé vdé, bsògna savé pinsê. Chi ch'e' guêrda sénza pinsê, e' n'vèd, e' filma. L'è una telecàmera, un strumént ad percezziôn visiva ch'u n'sint gnint. E' dis Gigi Picetti, ch'e' guêrda e' monitor de' computer intânt ch'a t'scrìv: "...però dria a la telecàmera u i è una parsôna ch'la pensa e la fa, sciglènd cun cura i muviment ad màchina par registrê quèl ch'u i và."
Mo n'a s'pirdèm, car Maurizio Costanzo Show. Incù a t'vòi dì tót un êtar cvël. A t'ò vèst jìr sîra int un bar, e tot i t'guardéva. A sò un pô gelós. T'intrévi tot al sîr int la mi cà, iluminènd cun e' cinescòpi la mi sulitùdin, e a t'cardéva tot par me. La ragiôn la m'dgéva che t'andévi cun tot, a dumicìli, mo e' cór, vëc idealésta, l'avléva piotòst ilùdas. Mo vdét lè, int cl bar, atóran a di cafòn imbariêgh ch'i rutéva e i dgéva dal parulàzi, u m'à fat pröpi mêl. E int la mi ment i s'è scatnê di pinsìr persecutòri-paranòic: a t'ò vèst a tu par tu cun dla zénta lurida, cun di maniac, psicopàtic, cocainòman, turturadùr, andreotti, ultras e naziskin. Insòma, t'éri ad tot. T n'sciglévi, t'at fasèvi sèglar. Da chiunque ch'u t'vlèss. Me a j éra sôl un di tânt. Un infinitèsum sotmùltipl int l'amucêda naziunêla de' share. Int cl bar a m'sò imbariaghê ad frizantìn e vermouth, sbrudlèndum tot. Pu a sò scap fura a zighzàgh, fumènd e pianzènd. A j ò insultê a n'so chi, però e' pichéva fôrt. Sbrêgh e insanguinê, a sò stê arcôlt s'e' marciapè da un misiunêri drughê, int e' lèt de' quêl a m'sò svigê e' dè dop, ch'a puzéva ad zìpria e ad vòmit.
Int la cà u n'gn'éra piò niseun, a sò scap fura e a j ò vèst lè d'arènt di giardinèt. Insdê s'una panchina de' parch a guardéva j oleândar e a pinséva: "U n'è tot brot, u i è ad mèj." Stóf d'ësar incomprensìbil ènca par me stèss, a zarchéva d'capì al ragiôn ascósi de' mi otimèsum gros, dèndi int e' stèss témp da magnê a di pasarìn ch'i n'savéva gnint cun i pinìn tuchìn dal patatìn ch'a m'éra mes in sacòcia int e' bar, fra un bichìr e cl'êtar, la sîra prèma, e sbrisulêdi intânt ch'i m'pistéva.
E ecco ch'u m'vén adòs dal imàgin idìlichi: te, Maurizio Costanzo Show, t'intrévi a sîra têrda int di salòt rococò, fra ninnoli, ciculatìn e pendulìn, arcôlt da i graziós ramòl de' êlt proletariêt. A sintéva di sussùr e di stridìn ad gradimént, ch'i s'spandéva da i zóvan in fiór a al nòni apasìdi, e da par tot di surìs e di òc lustar, fra twinning e chivas e caffarel mandê zò pianìn.
E' pàsa int e' giardinèt un barbòn ch'e' róba al brìcli ad patatìn ma i pasarìn, grufulènd golós a quàtar zâmp, e e' pinsìr e' vôla in êtar pöst, cambiê da la tu presènza trascendènta interclassésta, e a t'vèd int la stambèrga nuda d'una faméja prulìfica e bisugnósa. I infìs ch'i casca e al fâz smagridi... da chi ch'al è iluminêdi? Da chi, s'nö da te, Maurizio Costanzo Show? A chi êtar ch'l'è cunzèss e' miràcul? Te sôl t'unifich, te sôl t'at dé a tot int la stèsa misura!
E alóra l'angòsia de' mi spìrit la s'è vultêda in serenità, l'ambàsia dl'ânma la s'è fata cunsulaziôn e la tnàja dla gelusì la j à mulê e' mi cór ch'e' fa mêl. A j ò capì che la tu presènza prumìscua int al nòt ad tot l'è un messàg d'un sintì cumùn, d'un olocàust generós, d'un amór universêl.
Adës a stëgh mèj, tânt l'è vér ch'a j ò apèna smès d'esprìmum acsè. J efèt ad stu mi riequilìbri i andarà avânti par e' rest dla lètra, t'at n'stè adànd, a spér. A t'parléva, prèma de' mi delìri ad gelusì (calmêda), de' valór d'ògni cvël, s'u s'la guêrda cun la giusta dòs d'atenziôn, interès e cunsapevulëza. Fasèm l'esèmpi d'un fiór. Te t'pès e t'n'e' guêrd gnânca. Magari t'e' pìst parchè u i n'è tânt. Opùr t'cumpr da e' fiurêr i su cadàvar tajê, ch'i gòcia ancóra ad linfa e ligh int un mâz, par tnìt bôna la dòna.
Un'êtra vôlta invezi t'at tróv a fê e' pultrón slunghê s'un prê, e l'òc u t'casca s'una margarita. Sta vôlta t'la guêrd da d'arènt e t'scôvr un microcòsum. U i è i stâm, i pistìl, al fujìni e tot chi cristi e madòn ch'i t'à spieghê a scôla ch'i fa pêrt de' fiór e che t'n'sé piò cum ch'i s'ciâma, mo i i è, t'i vid e i t'interèsa, t'capès ch'i è j òrgan d'un èser viv e t'at emoziòn (se t'n'si dl'ignìt rimbambì, naturalmënt). T'at emoziòn e t'pins che quèl che te t'ciâm, sénza ch'la e' sapa, margarita, la fa una vita orgànica cumplichêda e sessualmënt stravagânta, acupièndas cun i su simil par mëz d'un animêl, scatnènd tot i dè dal òrgi in ària a bês d'insèt cunsenzìent, ad là dla moralità umâna e umâna-divina.
E alóra u t'vén da pinsê: parchè una margarita la n'pò andê a e' Maurizio Costanzo Show, e una pornostar sè?

Roberto Quaglia
Gigi Picetti





Lasa un Cumént.

Lèz i cumént di êtar.

U m'pis! U m'pis! U m'pis!

Indiz dal lètar.

Cuperta.

Mo chi èl Roberto Quaglia?





L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.




















Spartìs:FacebookXWhatsAppTelegramEmail