de seguru chi "caru Maurizio Costanzo Show" est propiu unu bellu tìtulu... Unu tìtulu chi betat interessu subra cale si siat cosa b'est iscrita in bàsciu. Tando cheret nàrrere chi cale si siat porcheria devenit interessante si est bene intitulada? O puru... totu est interessante, bastat abbaidare cun interessu? (Fortzis pro custu una fèmina prìngia est in istadu interessante? Proite totus l'abbàidant cun interessu pro more de sa panza istrana sua?) Cale si siat cosa fortzis est digna de interessu, bastat su ischire bi lu dare. Emmo, emmo. Foras chi su ischire bìdere, bi cheret su ischire pensare. Chie abbàidat chene pensare, no bidet, filmat. Est una telecàmera, unu istrumentu de pertzetzione visiva chene cussèntzia. Narat Gigi Picetti, chi abbàidat su monitor de su computer mentras ti iscrio: "...però segus a sa telecàmera b'est una persone chi pensat e faghet, seberende cun cura sos movimentos de màchina pro registrare su chi li andat."
Ma no nos perdamus, caru Maurizio Costanzo Show. Oe bene àteru ti cherjo nàrrere. T'apo bidu eris a sero in unu bar, e totus t'abbaidaiant. So unu pagu gelosu. Intraias totu sas seros in domo mia, allughende cun su cinescòpiu sa soledade mia, e ti creia totu pro me. Sa resone mi naraiat chi andaias cun totus, a domo, ma su coro, betzu idealista, cheriat prus a prestu s'ingannare. Ma a ti bìdere incue, in cussu bar, ingiriadu dae maleducados imbriagos chi rutaiant e naraiant paràulas grussas, m'at fatu propiu male. E in sa mente mia si sunt iscadenados pensamentos persecutòrio-paranoicos: t'apo bidu cara a cara cun figuras lordas, cun maniàticos, psicopàticos, cocainòmanos, torturadores, andreotti, ultras e naziskin. Insomma, fias de totus. No seberaias, ti faghias seberare. Dae chie si siat ti cheriat. Deo fia isceti unu de sos medas. Unu infinitèsimu sutamùltiplu in s'amuntonada natzionale de su share. In cussu bar mi so imbriagadu de frizzantinu e vermouth, imbrodolèndemi totu. Posca so essidu zigzaghende, fumende e prànghende. Apo insurtadu no isco a chie, però menaiat forte. Istratzadu e sambenende, so istadu abbandonadu subra su marciapee dae unu missionàriu tossicòmanu, in su letu de chie mi so ischidadu a manzanu, chi fetia de tzìpria e bòmbitu.
In domo no b'aiat prus nemos, so essidu e apo bidu incue a curtzu unos cantos giardineddos. Assentadu subra unu bancu de su parcu abbaidaia sos olianders e pensaia: "No est totu lègiu, b'at de mègius." Iscuntzertadu de èssere incomprensìbile fintzas a me etotu, chircaia de cumprèndere sas resones cuadas de s'otimismu meu rùdile, dende a su matessi tempus a papare a pigioneddos chi no ischiant nudda cun sos mìnimos petzigheddos de sas patatinas imbussadas in su bar, tra unu tzìchere e s'àteru, sa sero prima, e fatas milli petzos mentras m'aiant menadu.
E eccu chi m'assàllint imàgines idìllicas: tue, Maurizio Costanzo Show, intraias a sero tardu in salones rococò, in mesu a ninne-ninne, tzoccolatinas e pìndulas, acollidu dae sos gentiles rampollos de s'auto proletariadu. Intendia sùsuros e tzìchidos de gradimentu, chi s'ispainaiant dae sas giòvanas in frore a sas jajas assupidas, e dae ogni parte risigheddas e ogros lùghidos, in mesu a twinning e chivas e caffarel ingullidos a bellu a bellu.
Colat in su giardineddu unu barbudu chi furat sas mìgias de patatinas a sos pigiones, grufuliende gulosu a bator peis, e su pensamentu bolat a àteros logos, cambiados dae sa presèntzia tua chi totu trapassat e no faghet classe, e ti bido in sa ispozada barraca de una famìlia prolìfica chi tenet bisòngiu. Sos serramentos chi ruent e sas caras isortas... dae chie sunt alluminadas? Dae chie, si no dae tie, Maurizio Costanzo Show? A chie àteru est permìtidu su miràculu? Tue isceti unìficas, tue isceti a totus lis das de sa matessi mesura!
E tando s'angùstia de s'ispìritu meu s'est gerada in serenidade, sa pena de s'ànimu s'est fata cunsolatzione e sa tenàglia de sa gelosia at mulladu su coro meu dolente. Apo cumpresu chi sa presèntzia tua menada cun totus in sas notes de totus est messàgiu de unu sentire comune, de generosu olocàustu, de amore universale.
Immoe isto mègius, tantu est beru chi apo giustu agabbadu de m'imprìmere gasi. Sos efetos de custu meu riecuilìbriu ant a sighire pro su restu de sa lìtera, ti nde ses acatende, ispero. Ti faeddaia, primu de su delìriu meu de gelosia (acuietada), de su valore de ogni cosa, si abbaidada cun sa giusta dosi de atentzione, interessu e cussèntzia. Faghimus s'esempru de unu frore. Tue colas e mancu lu abbàidas. Fortzis lu pistas proite bi nde sunt medas. O puru nde acatas dae su froraju de mortos tagliados, chi galu gotzant lenfa e atacados a matzu, pro ti tènnere bona sa fèmina.
Un'àtera borta imbetzes t'agatas a fàghere nudda corcadu subra unu pradu, e s'ogru ti falat subra una margarita. Custa borta la abbàidas a curtzu e iscoberis unu microcosmu. Bi sunt sos istàmenes, sos pistillos, sas foghigheddas e totu cussos deos e madonnas chi t'ant ispiegadu a iscola chi faghent parte de su frore e chi no ischis prus comente si tzèrriant, ma bi sunt, los bides e ti interessant, cumprendes chi sunt sos òrganos de unu èssere bivente e ti emotzionas (si no ses de su totu rincoglionidu, naturalmente). Ti emotzionas e pensas chi su chi tue tzèrrias chene chi issa lu ischat margarita, menat una vida orgànica cumplessa e sessualmente istravagante, acopièndesi cun sos pares suos in mesu de unu animale, iscadenende ogni die orgias in s'aera fatas de intzetos chi bi sunt, foras de sa morale umana e umano-divina.
E tando ti benit de pensare: proite una margarita no podet andare a su Maurizio Costanzo Show, e una pornostar emmo?

Roberto Quaglia
Gigi Picetti