di sigûr "Cjâr Maurizio Costanzo Show" al è pròpit un biel titul... Un titul che al riflet interès su cualsisei robe che e sedi scrite sot. Alore vuelial dî che cualsisei monade e devente interessante se e à un biel titul? O ben... dut al è interessant, al baste cjalâlu cun interès? (Forsit par chest une femine incinte e je in stât interessant? Parcè che ducj le cjalin cun interès par vie de sô panze strane?) Cualsisei robe forsit e je degne di interès, al baste savêi dâlu. Sì, sì. Oltri che savê viodi, bisugne savê pensâ. Cui che al cjale cence pensâ, nol viôt, al filme. Al è une telecjamare, un strument di percezion visive cence sintiment. Al dîs Gigi Picetti, che al cjale il monitor dal computer intant che ti scrîf: "...però daûr de telecjamare al è une persone che e pense e e fâs, sielzint cun cure i moviments de machine par regjistrâ ce che i va."
Ma no stin a pierdisi, Cjâr Maurizio Costanzo Show. Vuê o ai altri di dîti. Ti ai viodût îr di sere intun bar, e ducj ti cjalavin. O soi un pôc zelôs. Tu jentravis ogni sere in cjase mê, inluminant cul cinescopi la mê solitudin, e ti crodevi dut par me. La reson mi diseve che tu lavis cun ducj, a domicili, ma il cûr, vieli idealist, al preferive ilusionâsi. Ma vioditi là, in chel bar, ator ator di cjocs vilans che a rutavin e a blestemavin, mi à fat pròpit mâl. E te mê ment si son scjadenâts pinsîrs persecutori-paranoics: ti ai viodût a tu par tu cun figuris sporchis, cun maniacs, psicopatics, cocainomans, torturadôrs, andreotti, ultras e naziskin. Insome, tu jeris di ducj. No tu sielzevis, tu ti fasevis sielzi. Di cualsisei che ti voleve. Jo o jeri dome un dai tancj. Un sotmultipli infinitesimâl te muçule nazionâl dal share. In chel bar mi soi incjocât di frizantin e vermouth, sbrodolantmi dut. Po o soi lât fûr a zic-zac, fumant e vaint. O ai insultât no sai cui, però al pestave dûr. Sbregât e sanganant, o soi stât cjapât sù dal marcjepît di un missionari tossicoman, che tal so jet mi soi sveât la dì dopo, che o spuçavi di ciprie e di vomit.
In cjase no 'nd jere plui nissun, o soi lât fûr e o ai viodût li dongje un zardinut. Sentât suntune bancjute dal parc o contemplavi i oleandris e o pensavi: "Nol è dut brut, al è di miôr." Stuf di jessi incomprensibil ancje par me stes, o cirivi di capî lis resons platadis dal gno otimisim gruessolan, dant di mangjâ intant a passaruts ignorants cui tocuts piçulins des patatinis metudis in sachete tal bar, tra un tai e chel altri, la sere prime, e fruçadis dilunc dal gno pestament.
E ve che mi saltin intor imagjins idilichis: tu, Maurizio Costanzo Show, tu jentravis a sere tarde in salots rococò, tra ninins, cicolatins e orloiuts, ricevût dai zovins gracions dal alt proletariât. O sintivi sunsurs e berlis di plasê, che si slargjavin dai zovins in flôr aes nonis flapidis, e dapardut ridadis e voi lusints, tra twinning e chivas e caffarel glotâts a planc.
Al passe tal zardinut un pitoc che al robe i fruçons di patatinis ai passarins, rufant golôs a gjatemau, e il pinsîr al svole a altris lûcs, trasformâts de tô presince interclassiste che e trascent, e ti viôt te stamberghe spoie di une famee bisugnose cun tancj fîs. I scûrs che a colin e i mus magrîts... di cui sono inluminâts? Di cui, se no di te, Maurizio Costanzo Show? A cui altri isal permetût il miracul? Dome tu tu unissis, dome tu ti dâs a ducj te stesse misure!
E alore la angosse dal gno spirt si è voltade in serenitât, l'afan dal anim al è deventât consolazion e la tanaie de zelosie e à molât il gno cûr che al doleve. O ai capît che la tô presince promiscue tes gnots di ducj e je messaç di sintî comun, di olocaust gjenerôs, di amôr universâl.
Cumò o stoi miôr, tant al è vêr che o ai apene smetût di esprimimi cussì. I efiets di chest gno tornâ in belance a larà indenant pal rest de letare, tu ti 'nt stâs inacuarzint, o speri. Ti fevelavi, prime dal gno delìri di zelosie (calmade), dal valôr di ogni robe, se considerade cu la juste dose di atenzion, interès e cussience. Fasìn l'esempli di une rose. Tu passis e no tu le cjalis nancje. Magari tu le pescjis parcè che a 'nd è tantis. O ben tu 'nt comprìs dal floricultôr i cadavars taiâts, che a gotin ancjemò di linfe e leâts intun mac, par tignîti buine la femine.
Une altre volte invezit tu ti cjatis a poltronâ distirât suntun prât, e l'voli ti cole suntune margarite. Cheste volte tu le cjalis di dongje e tu scuvierzis un microcosmo. A son i stams, i pistii, lis fueutis e ducj chei crocj e madonis che ti àn spiegât a scuele che a fasin part de rose e che no tu sâs plui cemût che si clamin, ma a son, tu ju viodis e ti interessin, tu capissis che a son i orghins di un jessi vîf e tu ti emozionis (se no tu sês dal dut incocalît, naturalmentri). Tu ti emozionis e tu pensis che ce che tu tu clamis cence che e savedi margarite, e mene une vite organiche complesse e sessualmentri stravagante, che si cubie cui siei simii par mieç di un nemâl, scjadenant ogni dì orgjis tal aiar a base di insets consenzients, di là de morâl umane e uman-divine.
E alore ti ven di pensâ: parcè une margarite no puedie lâ al Maurizio Costanzo Show, e une pornostar sì?

Roberto Quaglia
Gigi Picetti