oje nun suppòrto 'e sociologe. Me ce songo miso a penzà cinche minute, e m'è venuto 'mmente ca pe essere ricanusciute sociologe abbasta piglià 'na làurea 'n sociologìa, ovèro avé 'mparato 'e nozione ca stanno dint'a 'nu certo nùmmero 'e libbre stabilute e avé passato ll'esàmme 'e chille (cosa pe niente difficile pe 'na perzona 'e 'ntelliggenza normale) Â fine, 'o sociologo cu 'o tìtulo nun è 'na perzona ca ha mustrato 'e avé capito quaccosa ncopp'ô cumpurtamiento d''a società, ma 'na perzona ca ha mustrato 'e avé studiato chello ca ate hanno capito ncopp'ô cumpurtamiento d''a società. 'A definizione mia putesse sunà 'nu poco estremista, 'o ammetto. Vedimmo allora 'a quistione 'a 'n'ata angulatura: 'nu tizio studia tutte 'e libbre regulamentare d''o corzo 'e sociologìa, piglia 'o suo bbravo certificato 'e sociologo, po' scarabbocchia articule fatte male addó 'mpastoccia a vànvera cu 'e cuncètte 'e ll'ate 'mparate 'a isso, o ancora peggio va a dìcere quacche frase 'e effetto â televisione, o se fa 'nchiùdere pe 'n anno sulo dint'a 'na grotta pe scrìvere 'nu libbro jènno a se cercà isso stesso, ed ecco ca 'a identità soja 'e sociologo è chiena chiena cunfermata e 'a tutte accettata. Overamente, abbasta scrìvere ca uno è sociologo ncopp'ô biglietto 'e visita, e quase tutte ce credòno. Pe fa stà zitte chille ca nun ce crédono abbasta annummenà ccà e llà comme vène vène Mac Luhan e quaccun ato ca nun saccio pecché io nun songo 'nu sociologo.
Proprio pecché nun songo 'nu sociologo, me songo 'mbattuto 'n certi penziere mieje ca 'a nisciun sociologo - uhi a me - m'è maje capitato fino a mò 'e sentì, e ca mò porto a te, caro Maurizio Costanzo Show, e a chiunque, pe miezo 'e te, 'e sti frase meje maje fosse bersaglio.
'O succo è semplice e a 'o pare banale assaje, e se 'nzerra dint'a 'na frase ca dice tutto e nun dice niente: "'A TELEVISIONE È 'A RELIGGIONE MUDÈRNA."
Bella scuperta, diciarranno tante. Ma nun ce fermammo 'ncoppa, dico io, e ne analizzammo 'e cunseguenze. Primma 'e tutto: a che è servuta, serve e sempe servarrà, 'n ogne tiempo e poste d''o munno, qualunque religgione? Niente suffisme o risposte 'ntorciute, pe piacere! 'Na sola risposta chiara, semplice, pràteca, ca nun se po' cuntrastà: "'A religgione serve a dà â pupulazione 'e modelle cummune 'e cumpurtamiento."
'E può chiammà comme vuoje: èteca, murale, valure ecc. 'A sustanza è 'a stessa. 'N ogne tiempo e poste d''o munno 'a religgione serve pe fa sapé â gente comme se ha 'a cumpurtà. Chiunque tène overamente fede dint'â religgione soja, se cumporta comme 'a religgione soja cumanna.
'A religgione è 'ndispensabbele pe ll'organizzazione sociale, e chi penza 'o cuntrario è 'nu fesso e 'o mustrarraggio fra poco. Nun esìstono, né sò maje esistute, società umane senza religgione. Ce sta ncopp'a chesto assaje cunfusione 'e termene, pecché sulamente 'e religgione tradizziunale pàreno oje accussì a chiunque 'e nuje (ma nun fuje sempe accussì; oje 'o cristiano sape ca pure 'o maumettano tène 'na religgione; sècule fa, 'o nun-cristiano era pô cristiano sulo 'n 'nfedele ca nun mereta 'e vìvere, e defatte era assaje pupulare 'a guerra santa, ancora oje pupularìssema 'mmiezo a ll'islàmmece) 'E religgione nun-tradizziunale, 'mméce, nun sò ancora state ricanusciute comme religgione a tutte ll'effette. 'A cchiù recente e putente 'mmiezo a 'e nuove religgione nun-tradizziunale è 'a Televisione, e nisciuno ne ha ancora pigliato e ditto 'mpubbreco chiena cuscienza.
'E sociologe ciàcciano ncopp'â chiara cunziderazione ca 'a Televisione sia 'o cchiù putente strumento 'e comunicazione ca maje sia esistuto. Chesto è overo. Ma è sulo 'o accumiénzo.
Dint'a tante d''e paise addó 'a Televisione cchiù s'è spànnuta, 'a religgiosità pupulare tradizziunale s'è abbasciata assaje. Pecché? Chello ca sto scrivenno, comme già ditto, nun vo' essere (comme defatte nun è) 'nu saggio sociològeco ncopp'a 'e relazione ca ce stanno tra televisione e senzo religiuso, ma 'na lettera ô Maurizio Costanzo Show addó semplicemente se gira 'a luce d''a cuscienza cullettiva 'n 'na direzione fino a mò poco battuta. Tante e troppe semiglianze se truóvano dint'a 'e cumpurtamiente 'e chi è devoto a 'na religgione tradizziunale e 'e chi è devoto â Televisione, pe 'e fa passà comme casualità. Quale semiglianze? Beh, pruvammo a ne truvà quaccuna 'nzieme:

• 'E MODELLE CUMMUNE 'E CUMPURTAMIENTO: Comme già ditto, chiunque è devoto a 'na religgione, 'a essa piglia 'e modelle suoje 'e cumpurtamiento. Succede a 'e cristiane, a 'e buddiste e a 'e maumettane. E accussì defatte succede pure a 'e telespettature: lloro accàttano 'e prudutte reclamizzate â Televisione, còpiano 'e battute 'e spìreto d''e cabarettiste Televisive, guìdano 'a màcchena cu 'a spericulatezza cu cui se guida â Televisione (accussì facenno, pe esempio, 'e famuse strage d''o sàbbato sera), 'mpàrano a fa 'a viulenza cu 'a sderèggula cu cui se fa â Televisione (comme 'o sennò nun spiegato fenòmmeno d''a iperviulenza d''e criature 'n America mostra), fórmano 'e preferenze sessuale soje ncopp'ô modello d''o gruosso catàlogo 'e sex-symbols ca ce sta dint'a ll'universo Televisivo, e accussì avante.
• 'E DOGME: Chiunque è devoto a 'na religgione, ne accetta senza penzà 'e dogme. 'E devote dint'â Televisione, crédono dogmaticamente a chello ca lle vène ditto dint'ô teleggiurnale (chille cchiù scaltre se gòdono a crédere a 'nu certo teleggiurnale cchiù ca a 'n ato, ma 'a sustanza nun cagna). Emblemàteca è ncopp'a chesto 'a famosa frase, aduperata pe mustrà 'a verità 'e 'na 'nfurmazione: "'O ha ditto 'a televisione..."
• 'A "TRANCE": Carattere 'e ogne fedele mèntre se fa 'a funzione religiosa è 'o suo cadé 'n stato 'e trance. Succede a buddiste, catòlece, islàmmece e zulù. Succede pure a chi sta annèvuto dint'a 'nu prugramma televisivo. Guardanno 'a televisione uno se scolla d''a realtà individuale soja e 'o cerviello manna fora onde alfa (signo ca nun se po' negà 'e 'na alterazione d''o stato 'e cuscienza). Comme 'n chiesa cu 'o dio suo, annanze â Televisione uno se 'mmedèsema cu ll'oggetto d''a venerazione soja, ovèro 'e persunagge Televisive. Quanno 'a 'mmedesimazione nun resce se cagna canale (uno se gira a 'n ato santo), ma nun se esce d''a chiesa, ovèro nun se stuta 'a Televisione. Se ricorre a 'o zapping quanno nun se sape cchiù a che santo se vutà.
• 'O RISPIETTO 'E LL'AUTURITÀ SACERDOTALE: Qualunque overo fedele 'e qualunque religgione s'accustarrà tremmanno a chi 'mpèrzona 'o sìmbulo d''o culto suo, ovèro ll'auturità sacerdotale. A guardà 'e trìmmule, 'e tartagliamiente e 'a sulennità 'e dinto 'e chiunque se trova faccia a faccia cu 'a celebrità Televisiva preferita soja, nun pàreno starce dubbie ca se tratta d''o stesso e idènteco fenòmmeno mentale.
• 'A ERESÌA: Uno d''e carattere 'e qualunque religgione ca sia accussì putente ca 'e fedele ne tènono 'na esperienza accussì assoluta 'a nun essere pe niente cunzapèvule ca se tratta 'e 'na religgione, è chillo 'e fa nàscere 'o fenòmmeno d''a eresìa, ovèro 'a senza pietà demolizione 'e chiunque nun mostra dint'a 'e fatte 'e ne essere seguace. Succedette - cu piccole varianze - dint'ô Cattolicèsimo e dint'ô Nazismo, e ancora oje succede - 'n mesura diversa - dint'a 'e nuove religgione nun tradizziunale, comme 'a ricerca scientìfeca, 'a psicanàlisi (Repigliammo primma o doppo, dint'a quacch'ata lettera - o pure no... chi 'o ssape? - ll'argumiento ca pure 'a scienza, comme 'a psicanàlisi - ca scienza nun è - sìano, 'n sustanza, strutturate nun assaje divèrzo a paragone 'e 'e religgione tradizziunale.), e 'a Televisione. Pruvasse 'o lettore, si a 'e parole meje nun crede, a fa fenta cu chi parla 'e nun sapé ch'è 'o Maurizio Costanzo Show, 'o Teleggiurnale, 'e nun sapé chi sò pippobaudo, mikebongiorno, mauriziocostanzo, sgarbi... 'Nzistènno a uoltranza, cu chiunque, 'e nun sapé assolutamente chi o ch'è ca 'e ditte divinità sìano, uno se guadagnarrà 'a fama 'e individue "strane", asociale, ca fanno fenta 'e essere pazze o 'mméce 'o sò. 'Nzomma, uno se truvarrà d''o tutto miso 'a parte. È 'o marchio d''a eresìa mudèrna. Eppure, quase nisciuno 'e nuje ha maje visto 'e ditte divinità cu ll'uocchie suoje... dô vivo! Chelle abìtano dint'a 'e cerville nuoste pecché pigliammo ll'essenza lloro â Televisione, accussì comme 'o bbuono cristiano piglia ll'essenza 'e Dio 'n Chiesa. Pecché ll'essenza Televisiva è cchiù fàcele 'a piglià 'e chella d''a chiesa, pecché tène buone immàggine a culure e suone cunvincente (mò pure stereo), 'a religgione Televisiva sta d''o tutto pigliànno 'o posto 'e chella d''a chiesa tradizziunale.

  'A cchiù grossa forza d''a religgione Televisiva è ca tutte 'e fedele suoje - ca pure cchiù o meno sàpono ch'è 'na religgione - nun tènono cuscienza ca se tratta 'e 'na religgione, e ne sò accussì devote comme cchiù nun putarrìano. Cu chesto nun tiro cunclusione murale ncopp'â cchiù o meno "buntà" d''a religgione Televisiva. Buntà e Cattivèria sò categurìe 'nfide, ca maje mèttono d'accordo 'o giudizio. Senza dubbio avèttero paré "cattive", a 'e erètece torturate d''a Inquisizione Cristiana, 'e sacerdote 'e Santa Mamma Chiesa, ca 'e torturàvano nun pe cattivèria lloro, ma pe genuina cunvinzione ca 'e "cattive" fóssero ll'ate.
  'A religgione Televisiva nun è né bona, né cattiva, pure si dint'a essa se po' piglià sia 'o Bene ca 'o Male. 'A Televisione dà oje a tutte nuje 'e modelle cummune 'e cumpurtamiento. 'Mpara 'o valore d''a ecologìa (valore d''o tutto assente dint'a tutte 'e paise addó 'a Televisione nun ll'ha purtato annanze a luongo), ma pure 'o valore d''a viulenza (è chesto pe certune, me cumpreso, 'nu valore negativo, ma pe ate 'nu valore pusitivo, tant'è overo ca 'a tante cu fierezza vène fatta). 'Mpara 'o valore d''e diritte civile, ma pure 'o valore d''e dovere consumìsteche, cundizziunànnoce a avé 'a consumà, consumà, e sempe cchiù faticà pe cchiù consumà. 'Mpara 'o valore d''a lealtà spurtiva, ma pure d''a guerriglia tra tifuserìe, marcànnola cu 'e parole, ma 'o stesso tiempo purtànnola annanze, facènnone 'nu mito negativo d''a trasgressione. 'Mpara 'o valore d''a solidarietà, ma pure chillo d''o rampantismo, d''a ricchezza a tutte 'e custe. 'Mpara 'o valore d''o Cattolicèsimo, tenènnoce aggiurnate ncopp'a 'e prière papale, ma pure 'o valore 'e 'na visione sulamente genitale d''o sesso, facènnoce truvà migliara 'e videocassette porno. 'Mpara 'o valore 'e essere comme madreteresadicalcutta, ma pure 'o valore d''o consumismo sentimentale a ll'americana.
  Capisce, caro Maurizio Costanzo Show, comme stanno 'e ccose? 'A maggior parte d''e valure nuoste e d''e cunvinziune noste ce vénono oje date d''a Televisione, proprio comme ce vénevano 'na vota dô temore 'e Dio. Ma 'a Televisione esiste 'a poco tiempo, 'a pochìssemo tiempo. 'A maggior parte d''e taliane è cresciuta senza 'o temore d''a Televisione, e 'na cunversione 'n età gruossa nun vale 'na fede arradicata 'a 'e primme anne 'e vita. 'E vere e overe adepte assolute â religgione d''a Televisione sò sulamente 'e guagliune ca ancora stanno crescenno... ed è accussì dint'â società 'e dimane, quanno tutte sarranno cresciute 'a ll'accumiénzo dint'ô temore Televisivo, ca vedimmo a pieno 'e gruosse effette d''a rivoluzione ca sta 'n atto...
  Fantastecà è lècito, addivertente e quacche vota duvuto, caro Maurizio Costanzo Show. Sarrà dint'a 'n'ata lettera, fórzo, ca me sfrenarraggio a fantastecà ncopp'a comme sarrà 'a società 'e dimane, quanno 'a Televisione cumannarrà suvrana 'mmiezo a 'e religgione d''o munno, 'nu regno accussì assoluto ca 'e sùddete ce ubbidìscono ciecamente, cu devozione pare a chella ca ate sùddete, 'n ate tiempe, tenèttero 'mverzo 'o re lloro, 'o papa lloro, o 'mverzo 'o strione d''o casale. Cunzapèvule sulamente d''a 'ncurmabbele divèrzità geràrcheca ca 'e spartarrà d''e nuove ddeje lloro.

  Roberto Quaglia

  ---