uno d''e mite mudèrne ca 'a Televisione ce porta è ll'umorismo. 'N ato d''e mite ca 'ncàlzano è 'o lenguaggio vurgaro. Mito 'e mò ca sta nzalenno è pure 'a farneticazione, chiaro sìmbulo pusitivo (e 'n parte, se capisce, cuntrastato) d''a nun-cunfurmità. Pecché me revolgo a te, Maurizio Costanzo Show, sìmbulo ideale d''a Società Televisiva Taliana, e revolgènnome a te e pe miezo 'e te io mò virtualmente parlo a ll'Italia sana, è ùtele a me e ô lettore-utente ca io nun lasse 'a parte sti tre mite ca spóntano, e accussì cu coerenza annozze, 'e quanno 'n quanno, dint'a chesta o dint'a 'e lettere ca vénono o ca sò passate, 'a prosa mia 'e semanteme mudèrne e allègre, si po' sproluquianno. 'Nzomma, ca io ficche 'mmiezo a 'e rrighe quacche elemento 'e turpiluquio, 'ntarse 'e delirie a tema, quacche bella freddura e, cchiù raro, quacche fina battuta. Accussì, tanto pe accummencià, è ora ca 'a fernesco 'e parlà a muodo 'ntorciuto, e ca 'e frase meje addivèntano cchiù semplice e chiare, e pure 'e cuncètte cchiù chiare, cchiù banale, cchiù demucràteche, cchiù vicino â gente. Pecché sti lettere meje ca io te manno, â fine, addivèntano fórzo 'nu libbro ca quaccheduno, liggenno sti rrighe, fórzo già sta liggenno doppo ca s''o ha accattato o fatto 'mprestà 'a 'n amico o avuto 'n regalo pe Natale d''a nonna attirata d''o tìtulo ca fa gola, nun vulesse maje ca po' penzàssero ca voglio fa ll'intellettuale comme 'e tante alberoni e ca 'o libbro è 'na menata 'e pazze e ca 'n pràteca lle aggio futtuto 'e denare d''o prezzo d''o libbro, pecché defatte 'o libbro custava 'na cifra comme ormaje tutte 'e libbre, e po' dint'ô libbro, ovèro ccà dinto (quanno chesta lettera sarrà parte 'e 'nu libbro), nun ce se capisce 'na fava 'e chello ca dico e era meglio nun 'o accattà, accussì nun vulesse maje ca â fine se pàssano 'a parola e 'o libbro nun s''o accatta nisciuno. Ecco, era meglio si facevo 'na frase cchiù corta, è ca quanno accummencio a parlà me lasso purtà d''o entusiasmo e suprattutto d''e parole, dint'ô senzo ca ne scrivo 'na cifra tutte 'e fila e â fine me trovo cu certi frase accussì longhe comme chella 'e primma e comunque pure chesta ccà nun pazzéa.
Dicevo ca chesta lettera è 'na lettera, pecché overamente io sto mò scrivenno 'na lettera e tengo già pronta pure 'a busta, eppure è pure 'nu piezzo 'e 'nu libbro, pecché te giuro ca ne faccio 'nu libbro, e chi 'o tène già 'mmano 'o ssape. Quacche vota dico cose serie, pecché 'n ato d''e mite 'e pazze ca ce ha 'mparato 'a Televisione è ca è 'mpurtante a dìcere cose serie. Stu mito a nuje ce ll'ha 'mparato 'a Televisione, ma se tratta 'e 'nu mito antichìssemo. Quanno 'a Chiesa teneva ll'hobby 'e ll'Inquisizione, aveva purtato a ll'estremo ll'arte 'e piglià tutto sul serio, e defatte nun se spassava nisciuno. Mò pe furtuna, cu ll'aiuto d''a Televisione, ce sta 'nu mito pe tutte 'e fatice umane ca te può 'mmaginà, comme pe esempio johnholmes, 'o muorto porno attore ca 'o teneva luongo 35 cm, a chi elioelestorietese ha dedicato 'na canzone. johnholmes è 'nu mito mudèrno, mèntre 'a serietà è 'nu mito antico cu 'o ssapore overo, comme 'a vecchiaromagna (no, era 'o montenegro). Accussì, pe nun essere accusato 'e discriminazione mitològeca, sarraggio spisso serio, dint'a sti lettere, e spisso nun 'o sarraggio. Sarraggio spisso spesso (ca è 'o cuntrario 'e sottile, comme 'o dott. Amato), ovèro spesso dint'a 'e cuntenute, e sarraggio spisso sottile (ma nun comme 'o dott. Amato), sottile dint'a 'e cuntenute, qualunque cosa chesta sconzulata aggettivazione po' vulé dìcere, dint'â mente 'e chi sta liggenno.
Chi avesse esaminato, primma 'e chesta, 'e ddoje lettere 'e primma scritte 'a me - ca ll'esaminatore sia 'nu funzionario d''o Maurizio Costanzo Show, ca sia 'mméce 'o lettore d''o libbro 'e cui chesta lettera fosse parte - avarrà 'e sicuro nutato gruosse difference 'e stile e 'e tema tra 'e lettere 'e primma e chesta. Putesse essere paruto, liggenno 'e primme ddoje, ca io tenevo 'n animo 'e fa quacche sorta 'e saggio ncopp'a 'e fantasiuse rruole simbòlece ca 'a Televisione tarrìa dint'ô core d''a società nosta. Sbagliato. Nun songo abbastanza saggio pe scrìvere 'nu saggio overo, e a paro songo abbastanza saggio pe nun me mèttere a scrìvere 'nu saggio. 'E studie mieje sò state troppo scarze pe me dà 'e tìtule ca sarrìa bbuono ca s'annozzasse 'n aspirante saggista, e chesto io 'o ssaccio benissimo, e accussì nun caro dint'â trappula 'e vulé cunfezziunà 'nu saggio. 'A 'n ato canto, e pure accussì, io overamente esisto, nun sulo pecché cogitoergosum, ma pure pecché ll'anàgrafe 'o certìfeca cu gran cunvinzione, e chiunque, fino a quanno io sustengo 'e essere vivo, po' se fa 'na bella fila a ll'anàgrafe pe cuntrullà, truvànnone cunferma. E pure, ogne vota ca me guardo â specchiera me revéco, e ormaje ce credo proprio ca chillo llà songo io, ovèro quaccheduno ca overamente esiste overo overo. Esistenno, m'è capitato pure 'e penzà, e ll'invenzione d''e strumiente meccànece 'e scrittura (comme 'o computer) nun m'aiùtano a evità 'e mèttere niro ncopp'â janco 'o frutto d''o cammino d''o penzà mio. Ecco accussì sti lettere e - a 'n ato livello - stu libbro. Sti sequenze 'e lettere, parole, frase, pàggine semplicemente scàturano 'a chillu gran casino 'e prutune, neutrune e elettrune ca miso 'n ordine a 'nu certo muodo fanno 'o accussì ditto "me", 'o accussì ditto Roberto Quaglia. Scàturano 'a Roberto Quaglia deritto 'mmiezo a te, 'o totem, 'o Maurizio Costanzo Show, 'o pèrno e core 'e chella ca io chiammo 'a Società Televisiva Taliana. Tu ommo taliano ca liegge sti rrighe e dint'â mente 'e chi chelle sònano, lassanno ll'eco d''o significato lloro, sàcce ca nun a te sò state 'a me 'nderizzate primma 'e tutto, ma ô nuosto punto 'e riferimento cummune ca nun se po' fa a meno: 'o Maurizio Costanzo Show. Quanno a fa 'a mediazione d''a comunicazione tra ll'uómmene era 'a religione, 'e cuncètte trasèvano meglio dint'a ll'interlocutore si annozzate cu rafforzative sacre comme 'a spressione "sediovuole", Oje 'o rafforzativo cchiù sacro e accussì cchiù efficiente è 'o annummenà 'o Maurizio Costanzo Show. Se dummanasse, chiunque sta liggenno sti rrighe: 'e starrìa isso (o essa) liggenno si io nun ll'avesse primma ditto annanze e a gran voce 'a parulélla màseca "Maurizio Costanzo Show"?

Roberto Quaglia