El dotor dei desidèri. El sprolòquio el abìlita la mente a trascénder se stesa. Case de casa no le xe cosa né cusì de cesa. El famigerà "io" el se riconfigura a so ghiribiso. Flutuanti damizełe le se sfansełiza con grasia inplume. Ego logo meco e teco. Vago con sguardo de mago ma no su'l lago, luogo che fa rima ma par gnente ghe trase. Vago in modo vago, come soltanto se pol vagar. Vagar, gnente strafar. Vagar par evitar de star. Chi sta, no'l vaga. Chi no'l vaga, no'l vive. Chi no'l vive, no'l vive. Chi no'l vive, no'l vive.
Sii diméntego de queło che te conforta senpre ricordar. Evita opur no de evitar le novità che inte i to meandri anca le se seła. La Novità la xe senpre na novità, o comunque ghe someja asè. Somejar el xe za un grave difeto, ma la perfesion la xe difeto ancora pì grave, par cui el xe mejo somejar che èser perfetamente qualcosa che cussì no la someja gnanca a se stesa. Seła un senso, sto aparente periodo? No se voja saverlo par serto! Concèti che someja a gaver senso i xe mal, ma i xe mejo dei concèti che un senso i lo àbia e i lo àbia preciso e perfetamente. Parché? Chi lo sa. No se sa gnanca se el xe cussì. O altrimenti. No se sa gnente. Se fa finta de saver e de no far finta de saver. No se sa gnente, gnanca che no se sa gnente. Saver de no saver gnente el xe asè zen, e ipòcrita, e stùpido. El xe paradosal, in modo banal. Saver de gelato a la fràgola el xe pì sénplise e anca gustoso. Tuti voraria saver de fràgola, prima o po inte la so vita, o inte la vita de qualcun che i ga incontrà. Un siòco diria che ogni fràgola voraria prima o po saver de qualcun che'l voja saver de eła. Semo tuti siochi, e alora disémolo, co'l gusto de chi no gavendo gusto de fràgola el se placa con tuti i gusti che par caso i salta su le papile gustative de la so interfacia percetiva. Descovrimo tra l'altro de èser el mero elenco pì o manco ordinà de la infedel registrasion del magma de fenòmeni percetivi che ne ga riguardà. La xe na frase inconpìa, come tute le frasi, e la vol dir ben poco. Esiste frasi che le voja dir ben asè? Se le frasi le xe frasi fate no le vol dir gnente ma le lo dise in modo asè conprensìbile e ben condivisìbile. Se le frasi no le xe frasi fate le vol dir forse de pì ma diséndolo no le lo dise pròpriamente, o invese sì. Eco la indeterminasion, o forse no, eco però qualcosa... o forse qualche cos'altro... el xe mejo na frase fata ancuo che na frase no fata doman. O viseversa. Chiunque el siela opur no. Chiunque el ciapa vantajo da la personalìsima so confusion par generar la release susesiva de se steso. Chiunque el se abevera opur no da la rara fonte de confusion pura o comunque poco adulterà. La confusion la pol èser ciamà caos. Da'l Caos par Caso nase Cosa, dise uno dei pì picetiani tra i Gigi Picetti che inte i cosmi i esiste o i esistaria. El caos el xe el rimescolamento de le carte da zogo, el xe la riconfigurasion dei archetipi. Chisà po cosa vol dir sta ùltima frase, ma la sona tuta piena de significato recòndito, e el significato, spece queło recòndito, el xe la moneda de mejo corso a'l gran mercà de la energia fatasi homo sapiens. Chi el scanpa la confusion el scanpa el prinsipio che lo ga reso esistente, el rinunsia a'l zogo de la evolusion, qualunque cosa questo el posa, el voja o no'l posa o no'l voja significar, opur no, o invese sì, almanco in parte.
Cristali e papagai, pochi i cristali, vansa papagai variopinti par finta, come tuti i pupasi. I papagai, anca otri o vodi de urina, i dà el via a na frase che no la sa come proseguir. Frasi che no le proseguise le xe come minivite troncà, le partien a la realtà e far finta che questo no'l sia el xe redìcoła manifestasion de basa umanità o alta animalità, o viseversa opur no. Quante pì frasi nase che no le sàpia proseguir, tante pì frasi miràbili invese le sorze e le se manifesta inte'l ùnico e da queł momento imitàbile splendor loro. Se tuta l'umanità la parlase senpre e soltanto doparando ogni indivìduo a ogni frase senpre e soltanto frasi che mai nissun el àbia presedentemente proferìo, l'umanità la saria na cosa diversa. Questo el xe ben posìbile, eséndo l'umanità pochi miliardi de crani con corpo alegà e le frasi posìbili epuro mai pronunsià milioni de miliardi e digo de pì lore le xe ancora de pì e mi go dito milioni de miliardi par el convinsente son che sto nùmaro tuto somà astrato el posède o a noaltri speso ne par che'l posèda. Bruta la vita fata de frasi astruse a fasi, o quasi, eh? La vita sensa fasi o con poche de lore, con fasi ben definìe etichetà DOC, etichete de pì e de pì de pì inte'l presunto so significato condivise, la vita cussì ve alieta, sì, anca se no negè che la sia cussì cussì. Poche fasi poco confuse no le ve confonde e le ve studa, cussì che da'l ardor perdù pasè ani a ricordarne siocamente l'ardor. No'l xe forse siòco strùzerse a ricordar l'ardor de l'ardor? El xe come implòder a pensar a l'amor de l'amor, ai schei dei schei, ai paperon dei paperoni, a pensar de pensar... o invese no? Pensè de pensar, po pensè de pensar de pensar... Se sì prinsipianti procedì par gradi. Afrontè el vostro primo pensiero poco a la volta, par no slogarve el sarvèło. Prima mezo de lu, o ancora de manco. Quando un pensiero par intiero ti tegnarè, con soma cautela abinàteme un altro, che'l se ocupa del primo. Un pensiero che'l se incorze de un altro pensiero. Po, inte la fole escalation che le bone fole ad arte spontaneamente le aprende, adornè, secondo abominévole metàfora, l'àrbero natalìsio del vostro èser a'l mondo con barlusicante costelasion de pensieri indipendenti benché conesi, ognun o quasi testimòne dei altri e qualche volta anca de sé.
Gnente come el sprolòquio autotematizante ne sorprende se a èser sorprisi noaltri par natura o par selta se retrovemo incłini. El sprolòquio autotematizante el ndaria insegnà a scoła come matèria a sé, come dissiplina de palestra mental, come vasin contra ogni fondamentalismo, come profilasi de na vasta gama de patologie che qua e deso no enùmaro parché no le me vien in mente e no vedo parché gavaria da sforsarme pì de tanto - anzi cussì sotometo a la sovrana volontà de chiunque deso el lese la da mi suzerìa opsion de acetar queło che a sto punto el tradise de èser un sotinteso cònpito da far a casa, cussì sotinteso che evito sens'altro de sovrintènderlo diséndolo.
Comunque, o adiritura donca, parché soto soto son desto deso me aresto, atesto che no ve aresto né ve desto se destà ancora no sì, e lesto me apresto a méter fine a sto congesto forsanca molesto ma onesto manifesto, parché giamai orchestro el vostro sequestro, né ve infesto o tenpesto co'l mio capestro. Son un poco mesto, e questo detesto. La mia vejia deso la volze a'l vespro. Ma presto, se el sarvèło de la mente no desvesto, me rimetarò in sesto, con un soło gesto. Fine del testo.

Roberto Quaglia