stemo entrando inte la era de la verità. No so se sta frase la àbia asè senso, ma me diverte ciapar in considerasion la ipòtesi che eła la àbia senso. Cosa intendo dir? Vedaremo fra poco. Mi steso confido de aprénder da le stese mie parołe se a la diciarasion inisial i podarà seguir argomenti che i la legìtima almanco in parte.
Stemo donca entrando inte la època de la verità. Par tuta la storia del mondo la verità la xe stà soratuto un ato de fede. Chiunque el disese qualunque cosa el podeva dopo smentir tuto, proponendo na nova so verità in sostitusion de queła vecia ormai scòmoda. El gera fàsile crédar a na nova verità che la se sostituiva a na precedente, parché de questa no restava trasa inte la realtà, fora che inte la memòria de chi el se ostinase a ricordar. Ma quando ricordar el gera scòmodo o sconveniente, desmentegar el gera fasilìsimo. Da'l pasà no restava presoché gnente. Se mancava qualcosa de scrito, de na verità pasà el podeva no restar gnente del tuto. "Verba volant", se diseva de fato. Le parołe le esse da la boca e sùbito le voła via e le se disperde par senpre, e chi el ga in serte de lore credù no'l podarà mai a altri dimostrar che quełe serte un dì davero le xe esistìe.
Ancuo no'l xe pì cussì. Esiste la registrasion audiovisiva de imàgini e soni. Esiste la television.
Personaji pùblici de spico cultural e polìtico no i xe tali se no i "esiste" inte la Television. E l'anbiente màgico de la television el ga na proprietà davero sorprendente: el pol ricordar e riproponer tuto queło che'l sia acadù drento de sé. Na diciarasion fata no la pol pì venir negà, parché la menzogna la venaria smascherà fàsilmente, riproponendo la imàgine del mentitor durante l'ato steso de mentir. Inte la època moderna, par chi el àbia spico pùblico e el sia cussì parte del Universo Televisivo, Verba Non Volant Pì.
Semo soło ai inisi de la era de la verità, ma za le prime vìtime le casca e no le se rialsarà tanto fàsilmente. Vìtime ilustri, grose (ex-grose) polìtici, ma no soło lori. La voja de verità la crese iresistìbile inte i telespetatori, ovaro inte la società. Le ga suceso le cussì dite trasmision de "television-verità", che altro no le xe che'l roso enbrion de queło che sarà la television del futuro. Ma i antichi criteri stolidamente i resiste, e arocà inte le obsolete trincee lori la pì parte dei programi televisivi fondà su la finsion (cussì su la menzogna lècita) ancora i persèvera, anca senpre de pì inevitabilmente anoiando.
La reiterasion audiovisiva de rituali menzogne la mete ineluttabilmente a nudo la so natura de elementi ireali, rendendo via via senpre pì difìsile la sospension de la incredulità che la consente a'l spetator de zovarse del spetàcoło che'l osserva.
In parołe pì povare, se se abitua a'l fato che queło che se vede el sia tuto "par finta", e alora pasa la voja de vederlo. Par contrastar sta asuefasion, in sinematografia i xe ormai presoché indispensàbili i "efeti spesiali", ovaro l'espediente de mostrar qualcosa de finto in un modo che ancora el consenta a'l spetator l'esersisio de la sospension de la incredulità. In television, na soporìfera sebene sfavilante menzognera trasmision de varietà la se anima soltanto mediante iriverenti exploit de sparute personaji che za le vive e le àgise inte la granda Verità del futuro. La xe la categoria dei Grillo, dei Benigni, par capirse. No dei "còmici". I còmici in senso streto i xe destinà a sparir anca lori, parché no i farà pì rìder. La reiterasion dei bolsi schemi del falso e artefato so umorismo la metarà infine a nudo la intrìnseca so falsità. El vive de fato inte la menzogna el còmico che'l rècita a memòria un copion finzendo de improvisar come el polìtico che'l sciorina menzogne inte la falsa e orba convinsion de poderle in futuro negar.
El xe la Verità che senpre pì la avinse. Se ama o se òdia Sgarbi parché el vive e el sguasa con maestria inte la Verità. Ma no se resta indiferenti. O se ama se se condivide la so Verità. O se òdia se no la se condivide. La Verità no la xe una soła. La xe sénplise e confortante crédar che la lo sia, ma eła - ahimè e soratuto ahivoaltri - no la xe UNA.
Ghe xe cresente afesion, in tuto el mondo, par la Verità, "bona" o "cativa" che la sia. La eviratrise pì famosa dei Stati Uniti, carnéfese del falo de John Wayne, la xe diventà na eroina, parché "vera" in un modo ùnico e original, ancorché orìbile.
El Maurizio Costanzo Show el xe la trasmision italiana de pì reconosùo e duraturo suceso parché la xe "vera" da'l inisio a la fine. Poco importa che speso tristi o noiose figure le blatèra cose za dite mijara de volte. Queło che in asoluto el conta el xe saver che queło che se vede el acada davero, e non par finta.
Artisti particolarmente àbili a parer veri i durarà de pì, ma i sparirà anca lori, prima o po, sedendo el paso a chi, aparendo "vero" in virtù del fato de èserlo, el gavarà savù far del pròprio èser vero un degno spetàcoło.
Ma el canpo indove sta rivolusion la sarà pì inportante el xe par forsa de cose el canpo polìtico. El suceso de Funari el insegna. Funari el xe "vero", in ognun dei istanti in cui el apare su'l video.
I polìtici del futuro i gavarà da èser senpre pì veri. No necesariamente pì intelisenti. Soltanto pì veri. Na stupidità "vera" la sarà pì premià de na inteligensa "falsa". La dopiesa malselà la sarà foriera de roina. La dopiesa benselà la durarà soltanto pì a longo. La contradision la sarà aceta, purché la para genuina e "vera" e no un fruto de na colpévole volontà de ingano.
Tuto queło che me son incorto de gaver dito el podaria gaver asè senso o gaverne poco. No me convinse del tuto, parché me frula in mente anca na speculasion che la condurìa a conclusion oposte che qua e deso ve sparmio.
Ma no esito a esponer a chi me seguita anca sti dubi mii, parché viver inte la verità el significa anca dir queło che se pensa de queło che se ga scrito o se ga pensà.

Roberto Quaglia