Lu dutturi dî disideri. Lu sproloquiu abbilita la menti a trascènniri sé stissa. Casi di casa nun su’ cosa nè cusì di chiesa. Lu famigeratu "ju" si ricunfigura a sò ghiribbizzu. Fluttuanti damigelli si sfanciullizzanu cu grazia implumi. Ego logo meco e teco. Vagu cu sguardu di magu ma nun supra lu lagu, locu ca fa rima ma pi nenti ci trasi. Vagu ’n modu vagu, comu sulamenti si po’ vagari. Vagari, nenti strafari. Vagari pi evitari di stari. Cu’ sta, nun vaga. Cu’ nun vaga, nun vivi. Cu’ nun vivi, nun vivi. Cu’ nun vivi, nun vivi.
Sii dimènticu di chiddu ca ti conforta sempri arricurdari. Evita oppuru no di evitari li novità ca ntê toi meandri puru si cèlanu. La Novità è sempri ’na novità, o comunqui ci assumigghia assai. Assumigghiari è già nu gravi difettu, ma la perfezioni è difettu ancora cchiù gravi, pi cui è megghiu assumigghiari ca essiri perfettamenti quarchi cosa ca accussì nun assumigghia mancu a sé stissu. Cela nu sensu, stu apparenti periudu? Nun si vogghia saperlu pi certu! Cuncetti ca assumìgghianu a aviri sensu su’ mali, ma su’ megghiu di cuncetti ca nu sensu l’àbbianu e l’àbbianu precisu e perfettamenti. Pirchì? Cu’ lu sapi. Nun si sapi mancu si è accussì. O sinnò. Nun si sapi nenti. Si fa finta di sapiri di nun fari finta di sapiri. Nun si sapi nenti, mancu ca nun si sapi nenti. Sapiri di nun sapiri nenti è assai zen, e ipòcrita, e stúpidu. È paradossali, ’n modu banali. Sapiri di gelatu â fràvula è cchiù sèmplici e puru gustusu. Tutti vurrìanu sapiri di fràvula, prima o po’ ntâ sò vita, o ntâ vita di quarchidunu ca hannu ’ncuntratu. Nu scioccu dicirìa ca ogni fràvula vurrìa prima o po’ sapiri di quarchidunu ca vogghia sapiri di idda. Semu tutti sciocchi, e allura dicemulu, cû gustu di cu’ nun avennu gustu di fràvula si placa cu tutti li gusti ca pi casu sàutanu supra li papilli gustativi dâ propria interfaccia percettiva. Scupremu tra l’àutru di essiri lu meru elencu cchiù o menu urdinatu dâ infedeli registrazioni dû magma di fenòmini percettivi ca ni hannu riguardatu. È ’na frasi incompleta, comu tutti li frasi, e voli diri ben pocu. Esistinu frasi ca vògghianu diri ben assai? Si li frasi su’ frasi fatti nun vògghinu diri nenti ma lu dìcinu ’n modu assai comprinsibbili e ben cundivisibbili. Si li frasi nun su’ frasi fatti vògghinu diri fòrsi di cchiù ma dicennulu nun lu dìcinu propriamenti, o ’mmeci sì. Ecco la inditerminazioni, o fòrsi no, ecco però quarchi cosa... o fòrsi quarchi cos’àutru... è megghiu ’na frasi fatta oggi ca ’na frasi nun fatta dumani. O viceversa. Cu’ sia scegghia oppuru no. Cu’ sia pigghia vantaggiu dâ sò personalissima cunfusioni pi ginirari la release succissiva di sé stissu. Cu’ sia s’abbèvira oppuru no dî rari fonti di cunfusioni pura o comunqui pocu adulterata. La cunfusioni po’ essiri chiamata caos. Dû Caos pi Casu nasci Cosa, dici unu dî cchiù picettiani tra li Gigi Picetti ca ntê cosmi esistinu o esistirìanu. Lu caos è lu rimiscolamentu dî carti di jocu, è la ricunfigurazioni dî archetipi. Chissà po’ chi voli diri st’última frasi, ma sona tutta china di significatu recònditu, e lu significatu, speci chiddu recònditu, è la muneta di megghiu corsu ô gran mercatu dâ energia fattasi homo sapiens. Cu’ fui la cunfusioni fui lu principiu ca lu ha risu esistenti, rinuncia ô jocu dâ evuluzioni, qualsiasi cosa chistu possa, vogghia o nun possa o nun vogghia significari, oppuru no, o ’mmeci sì, almenu ’n parti.
Cristalli e pappagaddi, pochi li cristalli, avànzanu pappagaddi variupinti pi finta, comu tutti li pupazzi. Li pappagaddi, puru otri o vàcui d’urina, dànnu lu via a ’na frasi ca nun sapi comu prusiguiri. Frasi ca nun prusèguinu su’ comu miniviti truncati, appartèninu â realtà e fari finta ca chistu nun sia è ridicýla manifistazioni di bassa umanità o auta animalità, o viceversa oppuru no. Quanti cchiù frasi nàscinu ca nun sàppanu prusiguiri, tanti cchiù frasi mirabbili ’mmeci sòrginu e si manifèstanu ntô sò únicu e di ddu mumentu imitabbili splenduri. Si tutta l’umanità parrassi sempri e sulamenti adupirannu ogni individuu a ogni frasi sempri e sulamenti frasi ca mai nuddu àbbia pricèdentimenti prufferutu, l’umanità sarrìa ’na cosa diversa. Chistu è ben possibbili, essennu l’umanità pochi miliardi di crani cu corpu allegatu e li frasi possibbili eppuru mai prununziati miliuni di miliardi e dirò di cchiù chiddi su’ ancora di cchiù e ju dissi miliuni di miliardi pû cunvincenti sonu ca stu nýmiru tuttu summatu astrattu possiedi o a nuiautri spissu pari ca iddu possieda. Brutta la vita fatta di frasi astrusi a fasi, o quasi, eh? La vita senza fasi o cu pochi di chiddi, cu fasi ben definiti etichettati DOC, etichetti dî cchiù e dî cchiù dî cchiù ntô sò prisuntu significatu cundivisi, la vita accussì vi allieta, sì, puru si nun negati ca sia accussì accussì. Pochi fasi pocu cunfusi nun vi cunfònninu e vi stýtanu, accussì ca dû arduri persu passati anni a ni arricurdari scioccamenti l’arduri. Nun è fòrsi scioccu struggirisi a arricurdari l’arduri dû arduri? È comu implodiri a pinsari ô amuri dû amuri, ê sordi dî sordi, ê paperon dî paperuni, a pinsari di pinsari... o ’mmeci no? Pinsati di pinsari, po’ pinsati di pinsari di pinsari... Si siti principianti prucidìti pi gradi. Affruntati lu vostru primu pinseru pocu â vota, pi nun vi slugari lu ciriveddu. Prima menzu di iddu, o ancora di menu. Quannu nu pinseru pi ’nteru aviràiti, cu somma cautela abbinatèvini n’àutru, ca s’occupa dû primu. Nu pinseru ca s’adduna di n’àutru pinseru. Po’, ntâ folli escalation ca li boni foddi ad arti spuntaneamenti apprènninu, adurnati, secunnu abbuminabbili metàfura, l’arbulu natalizziu dû vostru essiri ô munnu cu barluccicanti custillazioni di pinseri indipendenti benchì cunnessi, ognunu o quasi testimoni dî àutri e quarchi vota puru di sé.
Nenti comu lu sproloquiu autotematizzanti ni surprendi si a essiri surprisi nuiautri pi natura o pi scelta ci ritruvamu inclini. Lu sproloquiu autotematizzanti jirìa ’nsignatu a scola comu materia a sé, comu discipplina di palestra mintali, comu vaccinu contra ogni fundamintalismu, comu profilassi di ’na vasta gamma di patulugìi ca ccà e ora nun enumeru pirchì nun mi vèninu ’n menti e nun vidu pirchì avirìa a mi sfurzari cchiù di tantu - anzi accussì sottomettu â suvrana vuluntà di cu’ sia ora leggi la di mia suggirita opzioni di accittari chiddu ca a stu puntu tradìsci di essiri nu suttintisu còmpitu di fari a casa, accussì suttintisu ca evitu senz’àutru di lu suvraintenniri dicennulu.
Comunqui, o addirittura dunqui, pirchì sutta sutta sugnu destu ora m’arrestu, attestu ca nun v’arrestu nè vi destu si distati ancora nun siti, e lestu m’apprestu a mèttiri fini a stu congestu fors’anchi molestu ma onestu manifestu, pirchì giammai orchestru lu vostru sequestru, nè v’infestu o tempestu cû miu capestru. Sugnu nu pocu mestu, e chistu detestu. La mia vigghia ora vorgi ô vespru. Ma prestu, si lu ciriveddu dâ menti nun svestu, mi rimittirò ’n sestu, cu nu sulu gestu. Fini dû testu.

Roberto Quaglia