Al dutåur di deṡidêri. Al sproloqui al abélita la mänt a trascénder sé istàssa. Câṡ ed cà an én cåsa né cusé ed cîṡa. Al famigerè "mé" al s riconfigûra a så ghiribézzi. Flutuànti damiġèli äli s ṡfanciulléssen con grâzia implûme. Ego logo mêco e têco. A vâg con ṡguèrd ed mâgo mo brîṡa in vatta al lègh, lågh ch'al fa rêma mo par gnínt al gh intra. A vâg in môd vâg, cme såul as på vaghèr. Vaghèr, gnínt strafèr. Vaghèr par evitèr ed stèr. Chi stà, an vâga brîṡa. Chi an vâga brîṡa, an vîv brîṡa. Chi an vîv brîṡa, an vîv brîṡa. Chi an vîv brîṡa, an vîv brîṡa.
Séppa dscurdåuṡ ed quall ch'at confôrta sänper arcurdèr. Evita opûr nå d'evitèr äli novitè che int i tå meandri pûr äli s scånden. La Novitè l'é sänper una novitè, o comónqued la i asvéggia tantéssum. Asvegèr l'é bèle un grâv difèt, mo la perfeziån l'é difèt ancåura pió grâv, par cui l'é méi asvegèr ch'èser perfetamänt quèl ch'dånca an asvéggia gnanc a sé istàss. Al scånd un säns, tèl aparänt perîod? An s våla brîṡa savairel par zêrt! Concèt ch'i asvégglien a avair säns i én mèl, mo i én méi ed concèt ch'un säns i al âbien e i al âbien precîṡ e perfetamänt. Parché? Chi al sa. An s sa gnanc s'l'é acsé. O altrimänti. An s sa gnínt. As fénż ed savair ed brîṡa fénżer ed savair. An s sa gnínt, gnanc ch'an s sa gnínt. Savair ed brîṡa savair gnínt l'é bän zen, e ipåcrit, e stópid. L'é paradosèl, in môd banèl. Savair ed gelè ala frâgola l'é pió sänzz e anc guståuṡ. Tótt i vrévnen savair ed frâgola, prémma o dåp int la så vétta, o int la vétta ed quelcdón ch'i an incuntrè. Un såcc al dirévv ch'ògni frâgola la vrévv prémma o dåp savair ed quelcdón ch'al våla savair ed lî. A sän tótt såcc, e alåra diṡénmel, col góst ed chi an avänd góst ed frâgola al s plâca con tótt i góst ch'par câṡ i sèlten in vatta ali papéll gustatîvi dla så interfâcia percetîva. A scuvrän tra l'èter d'èser al mêro elènch pió o manc ordinè dl'infedêl registraziån dal magma ed fenåmen percetîv ch'i s an riguardè. L'é una frèṡ incompléta, cme tótti äli frèṡ, e la vål dîr bän påch. Eṡésten frèṡ ch'äli vålen dîr bän tant? Se äli frèṡ äli én frèṡ fâti an vålen dîr gnínt mo i al dîṡen in môd asè cumprensébbil e bän cundivisébbil. Se äli frèṡ an én brîṡa frèṡ fâti äli vålen dîr magâri ed pió mo diṡàndel an al dîṡen brîṡa propiamänt, o invêzi sé. Ecco l'indeterminaziån, o fårsi nå, ecco però quèl... o fårsi quèl d'èter... l'é méi una frèṡ fâta incû ch'una frèṡ brîṡa fâta dmàn. O viceversa. Chiónqued al zêrna opûr nå. Chiónqued al câva vantâg̈ dala så personaléssima confuṡiån par generèr la release sucesîva ed sé istàss. Chiónqued al s abevaréssa opûr nå dali rèri fånt ed confuṡiån pûra o comónqued påch adulterè. La confuṡiån la på èser ciamè câos. Dal Câos par Câṡ al nâs Cåsa, al dîṡ ón di pió picetiàn tra i Gigi Picetti ch'int i còṡum i eṡésten o i eṡistrévnen. Al câos l'é al rimeskladûr däli chèrt da żûgh, l'é la riconfiguraziån di archetîpi. Chisà dåp csa la vål dîr st'ûltma frèṡ, mo la såna tótta pîna ed significhè recåndit, e al significhè, spêzie quall recåndit, l'é la monêda ed miåur côrs al grand marchè dl'energî fâtas homo sapiens. Chi al scâpa la confuṡiån al scâpa al prinzépi ch'al l à raiṡ eṡistänt, al rinónzia al żûgh dl'evoluziån, qualsîasi cåsa quasst al påsa, al våla o an påsa o an våla significhèr, opûr nå, o invêzi sé, almänc in pèrt.
Cristâl e papagâl, påch i cristâl, i avanzen papagâl variopént par finta, cme tótt i pupâz. I papagâl, anc òter o vûd d'urén'na, i dan al vî a una frèṡ ch'an sa cme proseguîr. Frèṡ ch'an prosêguen brîṡa äli én cme minivît troncè, äli aparténen ala realtè e fénżer ch'quasst an séppa l'é ridécola manifestaziån ed bâsa umanitè o èlta animalitè, o viceversa opûr nå. Quanti pió frèṡ äli nâsen ch'äli n sâpien proseguîr, tanti pió frèṡ mirâbil invêzi äli sårghen e äli s manifèsten int al så ónich e da chal mumänt imitâbil splendåur. Se tótta l'umanitè la parléss sänper e såul druvänd ògni individui a ògni frèṡ sänper e såul frèṡ ch'mâi inción al âbia precedentemänt proferé, l'umanitè la srévv una cåsa dṡvêrsa. Quasst l'é bän possébbil, eṡänd l'umanitè påch milièrd ed crâni con côrp alighè e äli frèṡ possébbil epûr mâi pronunzè miliån ed milièrd e a dirò ed pió äli én ancåura ed pió e mé a déss miliån ed milièrd par al convinzänt sån ch'tèl nómmer tótt sumè astrât al posêda o a nuèter spass al pèr ch'al al posêda. Brótta la vétta fâta ed frèṡ astrûṡi a fâṡi, o quèṡi, eh? La vétta sänza fâṡi o con påchi ed låuri, con fâṡi bän definé etichetè DOC, etichèt dai pió e dai pió di pió int al så preṡónt significhè cundivîṡ, la vétta acsé la v aliêta, sé, anc s'an neghè brîṡa ch'la séppa acsé acsé. Påch fâṡi påch confûṡi an v confånden brîṡa e i v ṡmòrzen, acsé ch'dl'ardåur pêrs a trascurî ân a rimembrèrne sciocamänt l'ardåur. An é fårsi såcc struggîres a rimembrèr l'ardåur dl'ardåur? L'é cme implåder a pinsèr a l'amåur dl'amåur, ai såld di såld, ai paperón di paperón, a pinsèr ed pinsèr... o invêzi nå? Pensè ed pinsèr, dåp pensè ed pinsèr ed pinsèr... S'a sî principiànt procedî par grè. Afruntè al våster prémm pinsîr påch ala vôlta, par an ṡlughèrs al zarvèl. Prémma mèż ed låu, o ancåura ed manc. Quand un pinsîr par intîr a avrî, con sómma cautêla abinèvne un èter, ch'al s ocûpa dal prémm. Un pinsîr ch'al s adâga d'un èter pinsîr. Dåp, int la fòla escalation ch'i bón mât a ârt spontaneamänt i impèren, adornè, secånd abominêvvol metâfora, l'èlber natalézzi dal våster èser al månnd con barluciànt costelaziån ed pinsîr indipendänt anc s'conès, ognón o quèṡi testimòni di èter e däli vôlt anc ed sé.
Gnínt cme al sproloqui autotematizànt al s surprànd se a èser surpraiṡ nuèter par natûra o par zêlta a s artruvän inclén. Al sproloqui autotematizànt al andarévv insgnè a scòla cme matêria a sé, cme disziplén'na ed palèstra mentèl, cme vazén cånter ògni fondamentalîṡum, cme profilâsi d'una vèsta gama ed patologî ch'qué e adès an enûmer brîṡa parché an m vénnen brîṡa in mänt e an vèd parché a duvrévv sfurzèrum pió ed tant - anzi acsé a sottométt ala sovrèna volontè ed chiónqued adès al lêǵa la da mé suggeré opziån d'azetèr quall che a st'pónt al tradéss d'èser un sottintaiṡ cåmpit da fèr a cà, acsé sottintaiṡ ch'a evit sänz'èter ed sovraintànderel diṡàndel.
Comónqued, o adiritûra dånca, parché sätta sätta a sån dèst adès a m arêst, atèst ch'an v arêst né a v dèst s'dstè ancåura an sî, e lèst a m aprêst a pår fén a st'congèst fårs'anc molèst mo onèst manifèst, parché giamâi a orchestréggh al våster sequèster, né a v infèst o tempèst col mî cavèster. A sån un påch mèst, e quasst a detèst. La mî vêggia adès la volż al vèsper. Mo prèst, s'al zarvèl dla mänt an svèst, a m armetrò in sèst, con un såul gèst. Fén dal tèst.

Roberto Quaglia