El dottor di desideri. El sproloqui el àbilita la ment a trascènd sé stessa. Cà de cà hinn minga ròba né cusì de gesa. El famigeraa "io" el se riconfigüra a sò ghiribizz. Flüttüant damisell se sfanciülìzzen con grazia implüma. Ego logo meco e teco. Vaghi con sguard de mago ma minga sora el lagh, loeugh che el fà rima ma el ghe intra per nagòtt. Vaghi in mòd vagh, come domà se pò vagà. Vagà, nagòtt strafà. Vagà per evità de stà. Chi sta, el vaga minga. Chi el vaga minga, el viv minga. Chi el viv minga, el viv minga. Chi el viv minga, el viv minga.
Sìi dimèntegh de quell che te conforta semper regordà. Evita opür no de evità i novità che in di tò meander anca se cèlen. La Novità l'è semper ona novità, o comunque la ghe someja assee. Somejà l'è già on grav difett, ma la perfezion l'è difett ancamò pü grav, per cui l'è mej somejà che vess perfettament quaicòssa che inscì el someja nanca a sé stess. El cela on sens, sto apparent perìod? Che se voeuria minga savèll de sigür! Concett che someja a avè sens hinn mal, ma hinn mej di concett che on sens ghe l'àbbien e ghe l'àbbien precis e perfettament. Perché? Chi el sa. Se sa nanca se l'è inscì. O altrimenti. Se sa nagòtt. Se fà finta de savè de fà minga finta de savè. Se sa nagòtt, nanca che se sa nagòtt. Savè de savè nagòtt l'è assee zen, e ipòcrita, e stüpid. L'è paradossal, in mòd banal. Savè de gelaa a la fràgola l'è pü sempliz e anca gustos. Tütt vorìen savè de fràgola, prima o poeu in la lor vita, o in la vita de quaidün che hann incontraa. On sciòcch el disaria che ògni fràgola la vorìa prima o poeu savè de quaidün che el voeur savè de essa. Sèmm tütt sciòcch, e alora disèmmel, con el güst de chi minga avend güst de fràgola el se placa con tütt i güst che per cas sàlten sora i papilla güstativa de la pròpria interfaccia percettiva. Descovrèmm tra l'alter de vess el mer elench pü o men ordinaa de la infedel registrazion del magma de fenòmen percettiv che ne hann riguardaa. L'è ona fras incompleta, come tütt i fras, e la voeur dì ben pòcch. Esìsten fras che voeuren dì ben assee? Se i fras hinn fras faa voeuren dì nagòtt ma el dìsen in mòd assee comprensìbil e ben condivisìbil. Se i fras hinn minga fras faa voeuren dì forsi de pü ma disèndel el dìsen minga pròpriament, o inveci sì. Ecco la indeterminazion, o forsi no, ecco però quaicòssa... o forsi quaicòss alter... l'è mej ona fras fada incoeu che ona fras minga fada doman. O vixeversa. Chiunque el scèlga opür no. Chiunque el ciapa vantagg de la soa personalìssima confüsion per generà la release süccessiva de sé stess. Chiunque el se abèvera opür no de la rara font de confüsion püra o comunque pòcch adülterada. La confüsion la pò vess ciamada caos. Del Caos per Cas nass Còsa, el dis vün di pü picettian tra i Gigi Picetti che in di còsmo esìsten o esistaríen. El caos l'è el rimescolament di cart de gioeugh, l'è la riconfigürazion di archetip. Chissà poeu cossa la voeur dì sta ültima fras, ma la sona tütta piena de significaa recòndit, e el significaa, spece quell recòndit, l'è la moneda de mej cors al gran mercaa de la energìa fàttase homo sapiens. Chi el füg la confüsion el füg el prinzipi che el l'ha res esistent, el rinuncia al gioeugh de la evolüzion, qualunque ròba questo el pòssa, el voeura o el pòssa minga o el voeura minga significà, opür no, o inveci sì, almen in part.
Cristàj e pappagàj, pòcch de cristàj, avànzen pappagàj variopint per finta, come tütt i püpazz. I pappagàj, anca otre o voeuj de orina, dann el via a ona fras che la sa minga come proseguì. Fras che prosèguen minga hinn come minivit troncaa, appartègnen a la realtà e fà finta che questo el sia minga l'è redìcola manifestazion de bassa ümanità o alta animalità, o vixeversa opür no. Quant pü fras nàssen che sàppen minga proseguì, tant pü fras miràbil inveci sürgen e se manifèsten in del ünich e de quel moment imitàbil lor splendor. Se tütta l'ümanità la parlass semper e domà doperand ògni individü a ògni fras semper e domà fras che mai nissün l'àbbia precedentement proferii, l'ümanità la sarìa ona ròba diversa. Questo l'è ben possìbil, essend l'ümanità pòcch miliard de crapp con còrp allegaa e i fras possìbil epür mai pronünciaa milion de miliard e disi de pü essi hinn ancamò de pü e mì hoo ditt milion de miliard per el convincent son che sto nümer tütt somaa astratt el possed o a nün spess el par che lü el possèda. Brütta la vita fada de fras astrüs a fas, o quasi, eh? La vita senza fas o con pòcch de essi, con fas ben definii etichettaa DOC, etichett di pü e di pü di pü in del presünt significaa lor condivis, la vita inscì ve allieta, sì, anca se negii minga che la sia inscì inscì. Pòcch fas pòcch confüs ve confónden minga e ve stüten, inscì che del ardor perdüü passii ann a regordàn sciocament l'ardor. L'è forsi minga sciòcch strüggìss a regordà l'ardor del ardor? L'è come implodè a pensà a l'amor del amor, a i danee di danee, a i paperon di paperon, a pensà de pensà... o inveci no? Pensii de pensà, poeu pensii de pensà de pensà... Se sii principiant procedii per grad. Affrontii el vòster prim penser on poo a la vòlta, per minga slogàvv el cervell. Prima mezz de lü, o ancamò de men. Quand on penser per intregh tegnarii, con somma caütela abinèm on alter, che el se ocüpa del prim. On penser che el se incòrg de on alter penser. Poeu, in la fòlla escalation che i bòn fòll ad art spontaneament aprènden, adornii, second abominèvol metàfora, l'àlber natalizzi del vòster vess al mond con barlüsciccant costelazion de penser independent benché conness, ognidün o quasi testimòni di alter e quaich vòlta anca de sé.
Nagòtt come el sproloqui autotematizzant ne sorprend se a vess sorpres nün per natüra o per scelta ghe se retrovèmm inclin. El sproloqui autotematizzant el andaria insegnaa a scòla come matèria a sé, come dissiplina de palestra mental, come vaccin contra ògni fondamentalismo, come profilassi de ona vasta gamma de patologìe che ccà e adess enümeri minga perché me vègnen minga in ment e vedi minga perché gh'avaria de sforzàmm pü de tant - anzi inscì sottometti a la sovrana volontà de chiunque adess el leng la mia sügerida opzion de accettà quell che a sto pont el tradiss de vess on sottintes còmpit de fà a cà, inscì sottintes che eviti senz'alter de sovraintènd disèndel.
Comunque, o adiritüra donca, perché sòta sòta sont dest adess me fermi, attesti che ve fermi minga né ve desti se destaa ancamò sii minga, e lest me appresti a mett fin a sto congest fors'anca molest ma onest manifest, perché giammai orchestri el vòster sequestr, né ve infesti o tempesti con el mè capestr. Sont on poo mest, e questo detesti. La mia veglia adess la volg al vespr. Ma prest, se el cervell de la ment el svesti minga, me rimettaroo in sest, con on sol gest. Fin del test.

Roberto Quaglia