ai é delîri e delîri al fât ch'mé ògni tant a eṡibéssa una zêrta competänza int al sproloqui l'é opinâbil incû m'é sucès ed seguîr al côrs di pinsîr ch'i gnan drî ch'i corêven da ló par la ménima bugerè la så vagina e la så cocincén'na i an i såld e acsé i an sänper ragiån låur an al maridarévv gnanc s'al fóss l'ûltum òm al månnd e dåp i an quèl ed curiåuṡ i så ragazû sänper a udorèr da tótti äli pèrt cäli spurcaciåni la m dmandèva se quall ch'a faṡêva al gh avêva catîv udåur e csa al vlêva ch'a faṡéss s'brîṡa quall åra fårsi ch'râza ed dmandi s'ai la ṡmulzèva un påch datócc' in vatta a cla fâza vècia tótta réggi coi mî complimänt al avrévv capé alåra la pâsa bän pâsa che cåsa da cme la n parlèva a pinsèva la parléss dla ròca ed Gibilterra a propôṡit l'é una bèla invenziån dabån però dåp am pièṡ lasèrum andèr żå int la tâza sfurzänd al pió possébbil e dåp tirèr la catäna par anafièrel bän puntûr ed spéll giâza però l'èter sistêma al gh à i så vantâg̈ a savêva sänper da cme la faṡêva Milly da ragazôla s'la gh avêva i vêrum o nå però dèregh di såld al stàss quant l'é dutåur prêghi una ghinêa e la m dmandèva s'a gh avêva omisiån ed frequänt mo indóv äli van a zerchèr cäli parål chi paruchén omisiån con chi ûć da mîop ch'al m tgnêva adòs ed travêrs an m srévv fidè a fèrum dèr dal cloroformi o Dío al sa csa d'èter però am piaṡêva quand al s é mass a séder a scrîver tótt acsé sêri e inzignè nèṡ acsé inteligänt al diàvel brótt buṡèder Oh tótt quall ch'as vål manc ch'un idiòta l'êra abastanza ṡvêlt da adèrsen vî al dipendêva tótt dal pinsèr a ló e ali så lêtri mâti Stelén'na mî tótt quall ch'al riguèrda al tå splêndid Côrp tótt sottolineè ch'al vén de là l'é una cåsa ed belèza e ed gòdd par l'eternitè quèl ch'l'à truvè in quelcdón di så stópid lébber mé sänper ali prai 4 o 5 vôlt al dé e ai diṡêva ed nå e sicûra Oh sé a déss a sån sicuréssima in un zêrt säns ai tapè la båca a savêva quall ch'al stêva par gnîr debolèza naturèl e bâsta al fó ló ch'al m eczitò an sò cme la prémméssima sîra ch'a s incuntränn quand a stêva a Rehoboth Terrace al s armàst in pî a guardèrs par almänc 10 minûd cme s'a s fóssen bèle incuntrè da quèlch pèrt a crädd par vî ch'a êra ebrî a i ò ciapè da mama la m divardêva alåra äli cås ch'al diṡêva con chal så surîṡ indolänt e tótt i Doyle i diṡêven ch'al s srévv purtè deputè Oh scêma nasó ch'an êra èter a crédder a tótti cäli så ciâcher in vatta a l'autonomî irlandaiṡa e l'uniån nazionèl al m mandò cla bèrba ed romanza dai Ugonotti da cantèr in franzaiṡ parché al faṡêva pió fén O beau pays de la Touraine an l ò mâi cantè gnanc una vôlta un mócc' ed spiegaziån e filastròcch in vatta ala religiån e la persecuziån an t fa gådder gnínt naturalmänt e dåp al psêva ló såul ala prémma ocaṡiån in vî ed favåur ch'ai capitèva a Brighton square al corò int la mî cambra da lèt faṡänd finta d'èsers maciè äli man con dl'inciåster par lavèrsli con chal savån al ṡôlfen e lât d'Albione ch'alåra a druvèva l'êra ancåura dänter a l'involócro trasparänt Oh a schiantè dal rédder chal dé a pinsèregh l'é méi ch'an s fâga una sedûta fén ala matén'na in vatta a st'afèri i duvrévnen fèr di vèṡ ed dimensiån naturèli in môd ch'una dòna la s påsa astèr in vatta comodamänt ló al s inżnåcia par fèrla mé a dâg ch'an ai é in tótt al månnd un èter ch'al âbia äli så abitûdin guèrda chal môd ch'al gh à ed durmîr ai pî dal lèt cme al fa sänza un cavzèl dûr manc mèl ch'an tîra brîṡa câlz s'nå al m farévv saltèr tótt i dént al respîra con la man in vatta al nèṡ cme chal dío indiàn ch'al m purtò a vàdder una dménnica piuvåuṡa al muṡêo ed Kildare street tótt żâl con un gremialén dstaiṡ in vatta al fiânch apogè a una man con äli dîda di pî fòra ch'ló al diṡêva l'êra una religiån pió granda ed cla di ebrî e ed Nåster Sgnåur mass insàmm in tótta l'Âṡia al l imita cme l'é så abitûdin d'imitèr tótt a crädd che anca ló al durméss con la tèsta ai pî dal lèt con cäli piåt squadrè in båca ala mujêr che spurchézzia comónqued indóv a i ò mass cäli pèz ah sé a al sò sperän ch'l'armèri an schéccola brîṡa ah a al savêva ló al dôrum såd al s dev èser divardé ai à dvó fèr spänder bän al så dnèr naturalmänt mégga al l à avó grâtis Oh che scocènza a spêr ch'ai séppa reservè quèl ed méi int l'èter månnd a legèrs tótti acsé Dío a s scâmpa e lébbera par stanòt al va bän acsé e adès al vèć lèt bozolåuṡ e tintinànt al m arcôrda sänper al vèć Cohen as s dev èser gratè spass dänter e ló al crädd ch'papà al l à cumprè da Lord Napier ch'mé a amirèva da ragazôla parché a i avêva détt pianén pian Oh cme as stà bän al lèt Dío a s ai sän cme al sòlit dåp sédeṡ ân in quanti cà a srän stè Raymond terrace e Ontario terrace e Lombard street e Holles street e ló al s in va in gîr fisción'nänd ògni vôlta ch'as à da ṡlogèr sänper chi ugonotti o la mèrcia däli rangi faṡänd finta d'aiutèr i òmen con chi 4 stécch ed móbil ch'a gh avän e dåp l'albèrgh City Arms ed pîṡ in pîṡ al dîṡ al provòst Daly chal påsten delizióṡ in vatta al pianeråtel sänper quelcdón dänter a preghèr dåp tótt i s lasèven drî tótti äli så spózz as sa sänper chi ai é stè par ûltum e csa t in dî ed tèl pinsîr al cui côrs incû m'é capitè ed seguîr i fan schîv i én bî al trócch ch'a i ò druvè par pinsèrli l'é un vèć trócch a i ò avêrt l'Ulisse ed Joyce e a n ò lèt una pâgina mäntr i mî ûć i scorêven al tèst a m sån artruvè tèl parål in mänt e dånca indóbbiamänt äli stêva pinsänd bèle ch'a i êra a i ò par coinzidänza scrétt in tänp reèl quall ch'am pasèva par la tèsta al rétum fés dla letûra e ecco alåra avanzèr sta lêtra dåp la ciuṡûra dal lîber e la scumparsa ed chi pinsîr dala mî tèsta dånca fòra che par äli prémmi vint parål zérca ed st'pèz e dåp adès a ripartîr da quèlch mumänt fa invêzi ch'delirèr mé a i ò lasè delirèr Joyce e dåp diṡîm vuèter s'ló al så tänp e dåp anc dåp al så tänp an v à ciapè par al cûl tótt.

Roberto Quaglia