gh'é delìrio e delìrio o fæto ch'mì ògni tànto ezibìsca 'na çèrta conpeténsa into sprolòquio o l'é opinàbile ancheu m'é sucèsso de segoî o córso di segoénti pensci ch'coréivan da lê pe-a mìnima buggeâ a seu vagìnn-a e a seu cocincìnn-a àn i dinæ e coscì àn sénpre raxón lô no ô sposiéiva manco s'o fîse l'ùrtimo òmmo a-o móndo e dòppo àn quarcösa de curiôzo i seu figgi sénpre a odorâ da tûtte e pàrti quélle sporcacioìn o me dimandâva s'quéllo ch'fâzéiva o l'avéiva cativo odô e ch'o voéiva ch'fâzésse se no quéllo öo fòrsci ch'ràssa de domànde s'ghe â spalmâva 'n pö dapertùtto in sce quéllo vîzo vêgio tûtto rûghe co-i mæ conpliménti o l'aviéiva capîo alôa a â pàssa bén pàssa cöse da cómme o ne parlâva pensâva o parlésse da ròcca de Gibilterra a propòxito a l'é 'na bèlla invençión pe davéi però dòppo me piâxe lasciâme anâ zu inta tàçça forsàndo o ciù poscìbile e dòppo tiâ a caténa pe annaffiâlo bén pontûe de spìllo giàsse però l'âtro sistêma o l'à i seu vantàggi savéiva sénpre da cómme a â fâzéiva Milly da figgétta s'a l'avéiva i vèrmi ò no però dâghe di dinæ o mæximo quànt'o l'é dotô prêgo 'na ghìnea e o me dimandâva s'avéiva omiscioìn de frequénte ma dôve ê vàn a çercâ quélle paròlle quélli parucconi omiscioìn con quélli éuggi da miòpe ch'o me tegnîva adòsso de travèrso no me saiéiva fidâ a fâme dâ do cloroformio ò Dîo o sa cöse d'âtro però me piaxéiva quànde o s'é misso a sêze a scrîve tûtto coscì sêrio e açigliòu nâzo coscì inteligénte a-o diâo brùtto buxiàrdo Oh tûtto quéllo ch'se vêu mêno che 'n idiòta o l'êa abàsta svêgio da acòrzîsene vîa o dipendéiva tûtto da-o pensâ a lê e a-e seu lettie màtte Stelìnn-a mæ tûtto quéllo ch'o riguàrda o teu splèndido Còrpo tûtto sotolineòu ch'o vêgne de là o l'é 'na cösa de beléssa e de gòddo pe l'eternitæ quarcösa ch'o l'à atrovòu in quarchedùn di seu stùpidi lìbbri mì sénpre a-e préize 4 ò 5 vòtte a-o giórno e ghe dixéiva de no e segûa Oh sci dîssi són segûíscima inte 'n çèrto sénso ghe tappæ a bócca savéiva quéllo ch'o stâva pe vegnî debolézza naturâle e bàsta o fû lê ch'o me eccitò no sò cómme a primíscima sêia ch'se incontrémmo quànde abitâva a Rehoboth Terrace o se restò in pê a goardâne pe a-o mànco 10 menûti cómme se se fîscimo za incontræ da quàrche pàrte créddo pe vîa ch'êa ebrêa ò piggiòu da mammà me divertîva alôa e cöse ch'o dixéiva con quéllo seu sorîzo indolénte e tûtti i Doyle dixéivan ch'o se saiéiva portòu deputòu Oh schémma nasciûa che no êa âtro a crédde a tûtte quélle seu ciàcoe in sce l'autonomîa irlandéize e l'unión nazionâle o me mandò quélla bàrba de romànsa da-i Ugonòtti da cantâ in françéize perché o fâzéiva ciù fìn O beau pays de la Touraine no l'ò mâi cantâ manco 'na vòtta 'na mûggia de spiegaçioìn e filastròcche in sce-a religión e a persecuçión no te fâ gòdde ninte naturalménte e dòppo o podéiva lê sôlo a-a primma ocaxón in vîa de favô ch'ghe capitâva a Brighton square o corse inta mæ càmera da léto fâzéndo fìnta d'ésise maciòu e màn con d'inciòstro pe lavâsele con quéllo savón a-o sólfo e làte d'Albione che alôa adêuviâva o l'êa ancón drénto a-o involùcro trasparénte Oh schiantæ da-o rîe quéllo giórno a pensâghe o l'é mêgio ch'o no ghe fàsse 'na sedûa fìnn-a a-o matìn in sce sto afâ doviéivan fâ di vâzi de dimenscioìn natuâli a-a mainêa ch'a 'na dònna a ghe pòsse sêze de sorva còmodaménte lê o s'inzenoggia pe fâla mì dîggo ch'no gh'é in tûtto o móndo 'n âtro ch'o l'àbbie e seu abitùdine goàrda quéllo mòddo ch'o l'à de dormî a-i pê do léto cómme o fâ sénsa 'n cuçìn dûo mêno mâ ch'o no tîa càrci sednò o me faiéiva saltâ tûtti i dénti o respîra co-a màn in sciô nâzo cómme quéllo dîo indiàn ch'o me portò a védde 'na domênega ciuvôza a-o mûzeo de Kildare street tûtto giàllo con 'n grenbiulìn stéizo in sciô fiànco appogiòu a 'na màn co-e die di pê feua ch'lê o dixéiva o l'êa 'na religión ciù grànde de quélla di ebrêi e de Nòstro Sciô missæ insémme in tûtta l'Àxia o ô imìta cómm'o l'é seu abitùdine de imitâ tûtti créddo ch'ascì lê o dormîse co-a tésta a-i pê do léto con quélle ciòtte squaddræ in bócca a-a moggê ch'sudiçêia comùnque dôve ò misso quélle péççe ah sci ô sò sperémmo ch'l'armâio o no scriccioli ah ô savéiva lê o dòrme sòddo o se dêve èse divertîo o ghe dêve avéi fæto spénde bén o seu dinâ naturalménte mìga o l'à avûa gràtis Oh ch'scociatûa spêro ch'ghe segge reservòu quarcösa de mêgio inte l'âtro móndo a ligâne tûtte coscì Dîo ne scànse e lìbeie pe stanéutte o va bén coscì e òua o vêgio léto bozolôzo e tintinnànte o me regòrda sénpre o vêgio Cohen ghe se dêve èse grataòu despésso drénto e lê o crédde ch'pappà o l'à acatòu da Lord Napier ch'mì ammiâva da figgétta perché gh'avéiva dîto cianìn cianìn Oh cómme se stâ bén a léto Dîo ghe risémmo cómme a-o sòlito dòppo sêze ànni in quànte câze saiémo stæti Raymond terrace e Ontario terrace e Lombard street e Holles street e lê o se ne va in gîro sciuscétàndo ògni vòtta ch'se dêve sloggiâ sénpre quélli ugonòtti ò a màrcia de-e rænn-e fâzéndo fìnta d'agiutâ i òmmi con quélli 4 stécchi de móbili ch'émmo e dòppo l'albèrgo City Arms de pézo in pézo o dîxe o provósto Daly quéllo postìçin deliçiôzo in sciô pianeròtolo sénpre quarchedùn drénto a pregâ dòppo tûtti se lasciâvan derê tûtte e seu ciûzanìe se sa sénpre chi gh'é stæto pe ùrtimo e cöse ne dîxi de tâli pensci o cûi córso ancheu m'é capitòu de segoî fàn scìffo són bèlli o trùcco ch'ò adêuviòu pe pensâli o l'é 'n vêgio trùcco ò avèrto l'Ulisse de Joyce e ne ò lézûa 'na pàgina méntre i mæ éuggi scorrîvan o tèsto me són atrovòu tâli paròlle in ménte e coscì sénsa dùbbio ê stâva pensàndo za ch'ghe êa ò pe coinçidénsa scrîto in ténpo reâle quéllo ch'me passâva pe-a tésta a-o rìtmo fìsso da letûa e ècco alôa avansâ sta lettia dòppo a serâ do lìbbro e a scompàrsa de quélli pensci da mæ tésta coscì feua che pe-e primme vìnti paròlle a-o de présso de sto tòcco e dòppo òua a repartî da quàrche moménto fâ inveçe ch'delirâ mì ò lasciòu delirâ Joyce e dòppo dîme vôtri se lê a seu ténpo e dòppo ascì dòppo o seu ténpo o no v'à piggiæ pe-o cûo tûtti.

Roberto Quaglia