al è delir e delir il fat che jo ogni tant o mostri une cierte competence tal sproloqui al è opinabil vuê mi è sucedût di stâ daûr al cors dai pinsîrs che a vignivin daûr che a corevin di lui pe minime buzarade la sô vagjine e la sô cocincine a àn i bêçs e cussì a àn simpri reson lôr no lu sposarès nancje se al fos l'ultin om dal mont e po a àn alc di curiôs i lôr fantats simpri a nasâ di dutis lis bandis chês purcitis mi domandave se ce che o fasevi al veve odôr trist e ce volevial che o fasès se no chel aur forsit ce raze di domandis se i e sprecavi un pôc dapardut su chê muse vecje dute grispis cui miei compliments al varès capît alore la passe ben passe ce da cemût che int fevelave o pensavi che al fevelàs de rocje di Gjibiltere a pròposit e je une biele invenzion pardabon però dopo mi plâs lassâmi lâ jù te tace sfuarçant plui che o pues e po tirâ la cjadene par bagnâlu ben ponturis di gusiele glaçadis però chel altri sisteme al à i siei vantaçs o savevi simpri di cemût che le faseve Milly di frute se e veve i viers o no però dâi bêçs compagn trop isal dotôr prego une ghinee e mi domandave se o vevi omissions dispès ma dulà lis vano a cirî chês peraulis chei parucons omissions cun chei voi di miop che mi tignive intor par stuart no mi sarès fidade a fâmi dâ dal cloroformi o Diu sa ce altri però mi plaseve cuant che si è metût a sentâ a scrivi dut cussì serio e ingrispât nâs cussì inteligjent al diaul brut bausâr Oh dut ce che si vûl mancul che un stupit al jere avonde svelt par inacuarzisint vie al dipendeve dut dal pensâ a lui e aes sôs letaris matis Stelute mê dut ce che al rivuarde il to Cuarp maraveôs dut sotlineât che al ven di là al è une robe di bielece e di gjonde pe eternitât alc che al à cjatât in cualchidun dai siei libris stupits jo simpri cun chel 4 o 5 voltis al dì e i disevi di no e sigure Oh sì o disei o soi sigurissime in cierte maniere i sierai la bocje o savevi ce che al stave par vignî debilece naturâl e baste al fo lui che mi ecità no sai cemût la primissime sere che si incontrarin cuant che o stavi a Rehoboth Terrace si restà in pîts a cjalâsi par almancul 10 minûts come se si fossin za incontrâts di cualchi bande o crôt par vie che o jeri ebree o ai cjolt di mame mi divertive alore lis robis che al diseve cun chel so ridi indolent e ducj i Doyle a disevin che si sarès presentât deputât Oh stupide nassude che no jeri altri a crodi a dutis chês sôs cjacaris su la autonomie irlandese e la union nazionâl mi mandà chê barbe di romance dai Ugonots di cjantâ par francês parcè che al faseve plui fin O beau pays de la Touraine no le ai mai cjantade nancje une volte un sac di spiegazions e filastrocjis su la religjon e la persecuzion no ti fâs gjoldi nuie naturalmentri e po al podeve lui dome ae prime ocasion in vie di favôr che i capitave a Brighton square al corè te mê cjamare di jet fasint fente di jessisi maglât lis mans cun ingjustri par lavâsilis cun chel savon al solfar e lat di Albion che in chê volte o doprevi al jere ancjemò dentri tal involuc trasparent Oh o crepai dal ridi chê dì a pensâi al è miôr che no i fasi une sentade fin ae matine su chest afâr a varessin di fâ vâs di dimensions naturâls in mût che une femine si podedi sentâ parsore in comoditât lui si inzenoglie par fâle jo o dîs che nol è in dut il mont un altri che al vedi lis sôs usancis cjale chel mût che al à di durmî ai pîts dal jet cemût fasial cence un cjavecâl dûr mancul mâl che nol tire pidadis se no mi fasarès saltâ ducj i dincj al respire cu la man sul nâs come chel diu indian che mi menà a viodi une domenie di ploe al museu di Kildare street dut zâl cuntun grumâlut distirât sul flanc pojât suntune man cui dêts dai pîts di fûr che lui al diseve che e jere une religjon plui grande di chê dai ebreus e di Nestri Signôr metudis dongje in dute l'Asie lu imite come che al è so vizi di imitâ ducj o crôt che ancje lui al durmìs cul cjâf ai pîts dal jet cun chês pioti cuadradis in bocje ae femine ce porcarie in ogni câs dulà ai metût chês peçotis ah sì lu sai sperìn che l'armâr nol crichi ah lu savevi lui al duar dûr al à di vêsi divertît i à di vê fat spindi ben i siei bêçs naturalmentri mighe le à vude a gratis Oh ce secje o speri che nus sedi tignût di bande alc di miôr tal altri mont a leânus dutis cussì Diu nus vuardi e liberi par chê gnot al va ben cussì e cumò il vieli jet plen di grops e che al tintine mi ricuarde simpri il vieli Cohen si à di jessi gratât dispès dentri e lui al crôt che papà lu à comprât di Lord Napier che jo o amiravi di frute parcè che i vevi dit planchin plan Oh trop che si sta ben tal jet Diu ve che o sin come simpri dopo sedis agns in tropis cjasis sarìno stâts Raymond terrace e Ontario terrace e Lombard street e Holles street e lui al va ator a cifulâ ogni volte che si à di sgomberâ simpri chei ugonots o la marcje des crots fasint fente di judâ i oms cun chei 4 stecs di mobii che o vin e po l'albergo City Arms di piês in piês al dîs il provost Daly chel puestut maraveôs sul pianerotul simpri cualchidun dentri a preâ po ducj si lassavin daûr dutis lis lôr spuzzis si sa simpri cui che al è stât par ultin e ce disistu di chescj pinsîrs che il lôr cors vuê mi è capitât di stâ daûr a fasin schifo a son biei il truc che o ai doprât par pensâju al è un vieli truc o ai viert l'Ulisse di Joyce e int ai let une pagjine intant che i miei voi a scorevin il test mi soi cjatât chestis peraulis tal cjâf e duncje cence dubi lis stavi pensant za che o jeri o ai par coincidence scrit in timp reâl ce che mi passave pal cjâf al ritmi fis de leture e ve alore vanzâ cheste letare dopo de sierade dal libri e la sparizion di chei pinsîrs dal gno cjâf duncje fûr che pes primis vincj peraulis plui o mancul di chest toc e po cumò a tornâ a partî di cualchi moment fa invezit di delirâ jo o ai lassât delirâ Joyce e po disêtmi vualtris se lui al so timp e po ancje dopo il so timp no us à cjolts pal cûl ducj.

Roberto Quaglia