ghe stà delìri e delìri el fatt che mì ògni tant esibissi ona certa competenza in del sproloqui l'è opinàbil incoeu m'è sücced de seguì el cors di seguent penser che corriven de lü per la mìnima bügerada la soa vagina e la soa cocincina gh'hann i danee e inscì gh'hann semper reson lor el sposaria nanca se el füss l'ültim òmm al mond e poeu gh'hann quaicòssa de curios i lor fioeu semper a odorà de tütt i part quij sporcaccion el me ciedeva se quell che faseva el gh'aveva cattiv odor e che el voeureva che fasess se minga quell or forsi che razza de domand se ghe la spalmava on poo dappertütt sora quel vis vècc tütt rüg con i mè compliment el gh'avaria capii alora la passa ben passa cossa da come ne parlava pensavi el parlass de la ròca de Gibilterra a propòsit l'è ona bella invenzion denver però dòpo me pias lassàss andà giò in la tazza sforzand el pü possìbil e poeu tirà la caden per annaffiàla ben pontür de spilla giascc però l'alter sistema el gh'ha i sò vantagg el saveva semper da come la faseva Milly la creatüra se la gh'aveva i verom o no però ghe dà danee istess quant'è dottor prego ona ghinea e el me ciedeva se la gh'aveva omission de frequent ma indoe i van a cercà quij parol quij parüccon omission con quij oeugg de mìope che el me tegneva adòss de travers me sarìa minga fidada a fàm dà el cloroformi o Dio el sa cossa alter però me piaseva quand el s'è mettüü a sedè a scriv tütt inscì seri e accigliaa nas inscì inteligent al diàvol brütt bosàrd Oh tütt quell che se voeur men che on idiòta l'era assee svelt de incorgìssen via el dependeva tütt del pensà a lü e a i soe letter matt Stelina mia tütt quell che riguarda el splèndid Còrp tò tütt sottolineaa che vègn de là l'è ona ròba de belezza e de gioia per l'eternità quaicòssa che l'ha trovaa in quaidün di sò liber stüpid mì semper a i pres 4 o 5 vòlt al dì e ghe disevi de no e sicüra Oh sì l'ha ditt sont sigürìssima in on cert sens ghe tapavi la bòca el saveva quell che stava per vegnì debolezza natüral e basta el fü lü che el me eccità soo minga come la primìssima sera che se incontràsom quand el abitava a Rehoboth Terrace el se rimanett in pee a vardàss per almen 10 minüt come se se füssom già incontraa in quaich part credi per via che l'era ebrea hoo ciapaa de la mama me divertiva alora i ròb che el diseva con quel soris indolent sò e tütt i Doyle diseven che el se sarìa portaa depütaa Oh scema nada che s'eri alter a crèd a tütt quij ciàcer soe sora l'autonomìa irlandesa e l'union nazional el me mandà quela barba de romanza di Ugonotti de cantà in frances perché la faseva pü fin O beau pays de la Touraine l'hoo mai cantada nanca ona vòlta on sacch de spiegazion e filastròcch sora la religion e la persecüzion te fà godè nagòtt natüralment e poeu el podeva lü domà a la prima ocasion in via de favor che ghe capitava a Brighton square l'è cors in la mia càmera de lett fasend finta de vèss maciaa i man con l'inchiòster per lavàssi con quel savon al zolfo e lacc de Albione che alora el doperava l'era ancamò dent in l'invòlücher trasparent Oh sont s'ciantada de la ridada quel dì a pensàgh l'è mej che el faga minga ona sedüda fina a la matina sora sto affare gh'avaríen de fà vas de dimension natüral in mòd che ona dòna la ghe pòssa sedè adòss còmodament lü el se ingenoggia per fàla mì disi che ghe n'è minga in tütt el mond on alter che el gh'ha i soe abitüdin varda quel mòd che el gh'ha de dormì ai pee del lett come el fà senza on cavezzal dür men mal che el tira minga càuz senò el me farìa saltà tütt i dent el respira con la man sora el nas come quel dio indian che el m'ha portaa a vedè ona domèniga ciovosa al museo de Kildare street tütt giald con on grembialin distes sora el fianch pogiaa a ona man con i dida di pee foeura che lü el diseva l'era ona religion pü granda de quela di ebrei e del Nòster Signor mettüü insèma in tütta l'Asia el l'imita com'è soa abitüdin de imità a tütt credi che anca lü el dormiss con la crapa ai pee del lett con quij piòd squadraa in bòca a la miee che sudiciaria comunque indoe hoo mettüü quij pezz ah sì el soo speremm che l'armadi el scricchiòla minga ah el saveva lü el dorm sòd el s'è dovüü divertì el gh'ha dovüü fàgh spend ben el sò danee natüralment mica el l'ha avüda gratis Oh che scocciadüra speri ghe sia riservaa quaicòssa de mej in l'alter mond a ligàss tütt inscì Dio ne scampa e lìbera per stanòtt va ben inscì e adess el vècc lett bozzolos e tintinnant el me regòrda semper el vècc Cohen el se dev vèss grattaa spess dent e lü el cred che papà el l'ha compraa de Lord Napier che mì ammiravi la creatüra perché el ghe l'aveva ditt pian pianin Oh come se sta ben a lett Dio ghe rìdom come al sòlit dòpo sedes ann in quanti cà sarèmm staa Raymond terrace e Ontario terrace e Lombard street e Holles street e lü el se ne va intorna sübiland ògni vòlta che el se dev slogià semper quij ugonòtt o la marcia di ranocc fasend finta de aiütà i òmm con quij 4 stècch de mòbil che gh'èmm e poeu l'albergh City Arms de pès in pès el dis el provòst Daly quel postisin delizios sora el pianeròtol semper quaidün dent a pregà poeu tütt se lassaven dree tütt i sò spüzz se sa semper chi ghe stà staa per ültim e cossa ne dis de sti penser el cui cors incoeu m'è capitaa de seguì fann schifi hinn bèi el trücch che hoo doperaa per pensàj l'è on vècc trücch hoo dervii l'Ulisse de Joyce e n'hoo legiüü ona pàgina mentre i mè oeugg scorriven el test me sont retrovaa sti parol in ment e inscì senza döbbi i stavi pensand già che ghe stava hoo per coincidenza scrivüü in temp real quell che me passava per la crapa al ritmo fiss de la lettüra e ecco alora avanzà sta lettera dòpo la ciusüra del liber e la scomparsa de quij penser de la mia crapa inscì foeura che per i prim vint parol circa de sto tòcch e poeu adess a ripartì de quaich moment fa inveci che delirà mì hoo lassaa delirà Joyce e poeu disìm vialter se lü al sò temp e poeu anca dòpo el sò temp el v'ha minga ciapaa per el cül a tütt.

Roberto Quaglia