go leto le létere precedenti scrite da'l mio alter ego (se dise cussì?), diretamente intanto che le scriveva, dato che eséndo mi inte la so testa so malgrado podevo benìsimo sbirsiar, atraverso i oci che gavemo in multipropietà, le parołe inte'l momento esatìsimo che lu el le scriveva davero.
Mi ghe credo benìsimo che i UFO i esiste. Se no i esiste, parché ghe xe la parola par ciamarli? Tute le cose che ghe xe la parola le ga da esìster par forsa parché senò no'l ga nissun senso che ghe sia la parola. Se mi digo che ghe xe el tramonto, lo poso dir soło parché go visto che ghe xe davero. I altri i me capise soło parché anca lori i sa cosa xe el tramonto. Tuti savemo cosa i xe i UFO, alora el xe automàtico che questi i esiste automàticamente par forsa davero sensa dubio.
Alora no capiso parché queła altra persona che mi anca son la ga dito inte le scorse létere cussì tante cose che no le sta né in cieło né in tera e cussì no le pol èser nissun UFO (bon zogo de parołe, vero? eh!).
La verità la xe che i marsiani i ghe xe, da qualche parte, ma no i sta qua, parché se i fuse qua no i saria marsiani, come ne dise la lògica. E i UFO i xe naturalmente i dischi volanti, come ognun el ga podùo notar quando i xe aparsi qua e là. E i UFO i xe pieni de marsiani, ma ghe ne xe asè parché i xe pìcoli.
Alora no capiso cosa ghe xe cussì tanto da dir su sta fantasiensa, che po in pràtica no la saria altro che i film su i UFO e con tuti quei efeti spesiali par tirar le persone a'l sìnema. Ma a mi no i me frega! Mi speto che i film i vien in television.
Mi son convinto che ghe xe za stà asè incontri ravisinà. I extraterestri no i xe cativi, o almanco, no i xe cativìsimi, ma i podaria diventarlo da un momento a l'altro. Se i fuse cativìsimi i ne gavaria za destruti, questo el xe ovio. Invese i ne controła, par véder come se conportemo, parché par lori semo inportanti, anca se no so parché. I podaria èserghe anca extraterestri travestìi da èseri umani. I extraterestri i pol far tuto, dopotuto i xe marsiani! Mi credo che ghe vol star atenti a queli che i parla de ste cose fasendo tanta confusion. Ghe xe i UFOLOGI seri, che i va rispetà, e ghe mancaria! Ma po ghe xe queli come queł tipo che son mi quando lo son (scusè se no son ciaro), che i dise cussì tante parołe che no le vol dir un bel gnente, e che le serve soło a convìnser a noaltri tuti che lori i ne sa pì de noaltri! Ma mi no me fao fregar! Se sti bei tipi i ga gavù qualche incontro ravisinà, anca del terso tipo, i ga da dirlo ciaramente e forse far véder anca qualche fotografia o mejo la saria na videocaseta. Se no i lo ga gavù alora che i se sta siti parché cosa i vol saverne pì dei altri che forse qualche incontro ravisinà i lo ga anca gavù, discretamente. Spero che son stà ciaro.
Cosa i vol spiegar a mi cosa xe la fantasiensa?!!! Lo so benìsimo!! Go la videocaseta de Guerre Stellari e go visto anca tuti i film che i xe venùi dopo. Go visto anca i film pì bruti, come Blade Runner, che de fato no'l me xe piasùo parché no'l xe posìbile che'l marsian el ne vien a far la moral e a la fine el ga ancora ragion lu sebene che giustamente el more.
Mi credo che in futuro la fantasiensa la ga par forsa da diventar pì inportante, parché con i moderni computer se pol far senpre pì efeti spesiali, e quando ghe sarà un incontro ravisinà ufisial questo el ghe farà anca un saco de publisità (a la fantasiensa). Par quanto la diventarà inportante, la fantasiensa la sarà però senpre na conseguensa de la UFOLOGIA, de questo ne son sicuro. Po soratuto deso che i ga fato tuti sti moderni telescòpi potentìsimi con i quali se podarà de sicuro véder i dischi volanti anca asè pì da lontan e ingrandìi.
Mi po go anca na teoria personal, che no la digo a nissun ma a ti che ti sì el Maurizio Costanzo Show poso dirla. Ghe xe un saco de persone famose che probabilmente i xe extraterestri travestìi, opur i xe in contato con lori. No vojo dir i nomi, senò i se incorze che li go descoverti e come el sòlito i me soprime. Se ti me inviti a la to trasmision te spiego tuti i particolari, ma ti ga da prométarme de no invitar anca queła altra persona che ghe xe anca drento de mi e che la se crede cussì intelisente soltanto parché la lo xe, parché se el vien anca lu po su'l pì beło, quando go da parlar mi, el me scasa da la guida del sarvèło e el se mete a dir tute le siochese che'l dise senpre par confónder le persone pì sénplise come mi, e cussì el finise che ti me ga invità par gnente.
Mi li òdio queli che i fa i superiori lezendo i libri de fantasiensa! No i se incorze che i xe redìcoli? Tute le persone normali la fantasiensa la varda giustamente soło a'l sìnema o in tivù, e se davero i se apasiona i diventa UFOLOGI. Inte i libri no ghe xe de sicuro gnente de pì che a'l sìnema: inte i libri ghe xe soło le parołe, ma queste ghe xe anca a'l sìnema o in tivù, de fato i personaji i parla, no? Ma a'l sìnema e in tivù ghe xe anca le imàgini, l'asion, el son stereo e in serte sale anca el sorround o come diàvolo se ciama. E po i libri i xe na invension de quando no ghe gera la television. Se ghe fuse stà la television, i libri no i lo gavaria inventà de serto, questo el xe sicuro! E el sìnema e la tivù i lo ga inventà proprio parché i libri i gera tropo noiosi. E po i ne ga inparà che ghe vol viver co la democrasia, che vol dir che la magioransa la ga senpre ragion. E alora mi sfido sti presuntuosi, come a queł sapienton che pur ghe xe da qualche parte drento de mi, a dir che la magioransa la preferise i libri a'l sìnema e a la tivù! La magioransa i libri li coparia sùbito, questa la xe la verità, e el xe davero antidemocràtico che no se proveda a gaverlo za fato da tenpo!
Soratuto con i libri de fantasiensa el divàrio el xe terìbile. I efeti spesiali, contà su'l libro, sensa figure, i me fa soło tantìsima pena. Par fortuna no go mai leto sti libri, ma me imagino che la descrision a parołe dei efeti spesiali la sia la cosa pì stùpida che me rieso a imaginar. E se da un libro de fantasiensa ghe cavemo la descrision dei efeti spesiali, cosa ne resta?

Roberto Quaglia