a scrìverte ancuo el xe el Max Morando che'l cova drento de mi. Doparò cussì formalmente el so sarvèło par scrìver tuto queło che seguirà, mostrando cussì la so facia, proprio come se mi fuse lu, o piutosto come lu el fuse mi, anca ognun de noaltri do eséndo prima de tuto se steso. Go cussì deciso de scrìverLe quando go visto tuti quei casi umani, o presunti tali, avisendarse su le so poltrone, o presunte tali. El canpionàrio el xe vàrio, el zoo el xe quasi a'l conpleto, ma mi rapresento el Caso racolto a fator comune, la esensa de la pietà, el sinònimo de la umana pietà, l'antìtesi de l'eroe e de l'antieroe. El pensa, Geòmetra Costanzo Show, che i voleva destinarme un quadratin su'l 740, proprio tra l'Union Cese cristiane aventiste del 7° giorno e le Asenblee di Dio in Italia, par farme gaver l'8 par mile, distribusion de pietà diretamente dai grosisti, da'l produtor a'l consumator. Come Ghe disevo, Rasonier Costanzo Show, mi son un pietòfago, me nutro de la pietà dei altri, no che fao gnente par meritàrmela, soło che le vicende che me ga colpìo le ga lassà na spece de segno invisìbile che'l condana le persone che le orbita la mia vita a sviłupar imediatamente sensi de colpa smisurà, complesi de superiorità tendenti a l'infinito, e in qualche raro caso le costrenze anca a burlarse de mi, ma con asè argusia. Queła che qualcun el identifica, senplicìsticamente, inte la scaogna (ma che mi preferiso, par vastità del fenòmeno, e par na mia tendensa a no etichetar gnente par no intrapolar fenòmeni conplesi in vodi schemi, no ridur a na soła parola) la xe inte'l mio caso atàvica. Preferiso, par brevità e par direta o quasi, conosensa dei fati scominsiar la mia storia da'l matrimònio dei mii genitori, tut'e do ovviamente de umilìsime orìgini (e come vedaremo dopo anca de umilìsimi destini). La note de le nose la ga crolà la diga del Vajont, primo segno premonitor, purtropo inascoltà. Dopo qualche ano, sensa che se ricordi tragedie degne de rilievo mi son venù a la luse, el 19 majo del 1966. Con na curiosa sintonia co la distribusion dei sacramenti la storia la prosegue co la mia prima comunion, e qua, solitamente, inte i mii interlocutori el scomìnsia un bało rituale de probàbile orìgine laponica, sicuramente un gesto propisiatòrio a la màscola fertilità, parché el prevede el rìtmico palpegiamento scrotal framisto a un mormorio pronunsià a denti streti e con i oci vodi a'l cieło. Disevo (me scusase Avocato Costanzo Sciò par sti intermezi mii, ma i serve a rénder pì figurà e viva la mia létera), la mia prima comunion (che la ga coinsidù anca co l'ùltima) i mii genitori i ga deciso de farmela "far" in coinsidensa co la nostra setimana bianca, in modo de permétar a le magre nostre finanse el svolzimento de tut'e do le atività sportive (siìstica e eucarìstica). El luogo preselto el xe stà Tesero, ridente sitadina che qualche ano dopo la xe stà parsialmente scavà via da'l croło de la diga de la Val di Stava, ma no antisipemo i tenpi. Inte i giorni imediatamente precedenti a la mia prima comunion la ga crolà la funivia de Cavalese (soło pochi chilòmetri da Tesero) provocando la morte de tuti i ocupanti, fora una, paralizà. La mia famija e i amighi i ga scominsià po a càscar, come in na guera no diciarà a partir da'l 1972, primo barba morto par càncaro, el primo nono el xe cascà ani prima de la mia nàsita anca lu par càncaro, e po capodano 1980 (amigo morto in afondamento Phoenix), 1981 àmia morta par càncaro, 1982 nona fortunatamente morta par cause naturali, ovaro sfondamento del crànio par 28 naturalìsime martełade infèrteghe da'l cònplice de mio cuzin (alora quindisene) a scopo rapina, par l'acquisto de un validìsimo motociclo. In queła ocasion el pare, mio barba, inte'l gofo tentativo de scagionar el fioło el ga esibìo come prova de inosensa un motorin, che lu el ga sostegnù de gaver regalà a Thor (da alora soranome predileto de l'amà cuzineto). Sfortunatamente, gavendo el barbeto qualche precedenteto penal, e eséndo el motorin risultà robà el xe finìo in preson anca lu, fin a qualche tenpo fa.. Me riesce a seguir Dotor Costanzo Show? O forse son tropo nebuloso inte la esposision dei fati? Ma la sa la presa la xe tirana, e po no se sa mai... Comunque disevo, la storia la ga da continuar, 1985 nono morto par probàbile trasfusion sbaglià, inte'l 1986 la morte de mia nona la ne ga colto de sorpresa, un ictus proprio no ghe lo spetavimo, ormai tifavimo par i tipi pì spetacolari de morte posìbili, el gera scominsià anca el totomorte necro-concorso a pronòstici. Inte'l 1987 mio pare che anca el brilava de originalità eséndo el creativo de famija el ga deciso de morir in modo banal, par càncaro ai polmoni, grasie a Dio (prego!) ghe ga pensà la dita indove el lavorava come operàio a vivacizarne la morte, la ga deciso de coparse, la dita, falimento, o mejo licuidasion, e cussì cicia schei, inùtile perfetamente visto che intanto gavevimo el sfrato esecutivo. Capise anca eła Minador Costanzo Show che la susesiva morte de un altro caro amigo par asma intanto che'l prestava servisio de leva, la scanparsa del pare e de la mare inte i susesivi do ani, la morte de tut'e do i genitori de un mio conpagno de clase in simultànea par do cause diferenti no le podeva che anoiarme. Un poco de pì me ga incuriosìo un altro fraterno amigo finìo polpetà soto un trator intanto che'l se recava a'l primo giorno del so lavor dopo un longo periodo de disocupasion, trascuràbile el fato che'l locale de propietà dei genitori el xe stà brusà do volte prima che lori i lo lassase. Na dita indove lavorava la gera condota da do sinpaticìsimi cònjugi, i quali i gaveva creà tuto par el fioło, un zóvane straordinàrio co l'hobby de la pesca subàcuea... go da terminar la storia o la imàgina eła? Finìa la parte necrològica, ghe tegnaria a dar na descrision somaria anca de altri momenti de vita felise e armoniosa, visto che come lo go dito mi son un pietòfago, e no podaria lassar na òpera inconpìa. El barba de cui prima, el pare del scultor de carne, Thor par capirse, no apena usìo da'l càrsere el xe stà fermà, sensa patente, a la guida de na màchina robà che la trasportava droga, un altro barba el xe stà sparà in circostanse misteriose, e mi go deciso de scrìverGhe sta létera un poco prima che i tentase de ridurla in frappé.... altri fati i saria da contar, ma el tenpo el xe tirano e el computer el se sta lentamente aflosciando soto el peso de la storia. Mi so che deso eła la me teme, no tanto parché in mia presensa ghe podaria capitar qualcosa, la xe abastansa intelisente par capir che ghe podaria capitar comunque, ma parché mi saria la storia final, queła l'ùltima puntata de Maurizio Costanzo Show, l'ùltima frontiera de la pietà. La siliegina su la torta la saria che'l teatro Parioli el crolase el giorno prima de la puntata a cui el me gavaria invità... Auguri Messia Costanzo Show

Max Morando