a i ò lèt äli lêtri precedänti scrétti dal mî alter ego (as dîṡ acsé?), direttamänt mäntr al äli scrivêva, dâto che eṡänd mé int la så tèsta a så malgrè a psêva benéssum ṡbirsèr, atravêrs i ûć ch'a gh avän in multipropietè, äli parål int al mumänt eṡatéssum ch'ló al äli scrivêva veramänt.
Mé ai crädd benéssum ch'i UFO i eṡésten. S'an eṡésten brîṡa, parché ai é la parôla par ciamèrli? Tótti äli cås ch'ai é la parôla äli an da eṡéster par fôrza parché s'nå an à inción säns ch'ai é la parôla. S'mé a dâg ch'ai é al tramånt, a al pås dîr såul parché a i ò vést ch'ai é dabån. Chi èter i m capéssen såul parché anca låur i san csa l'é al tramånt. Tótt a savän csa én i UFO, alåra l'é automâtich ch'sti qué i eṡésten automâticamänt par fôrza dabån sänza dóbbi.
Alåra an capéss parché cl'ètra persåna ch'mé anc a sån l'à détt int äli lêtri pasè acsé tanti cås ch'an stan brîṡa né in zîl né in têra e dånca an pålen brîṡa èser inción UFO (bèl żûgh ed parål, vaira? eh!).
La veritè l'é ch'i marziàn ai én, da quèlch pèrt, mo an én brîṡa qué, parché s'i fóssen qué an srévnen brîṡa marziàn, cme a s dîṡ la lågica. E i UFO i én naturalmänt i désch volànt, cme ognón l'à psó notèr quand i én cumparé qué e là. E i UFO i én pîn ed marziàn, mo ai n stà tanti parché i én znén.
Alåra an capéss csa ai é acsé tant da dîr in vatta a sta fantasiénza, ch'dåp in prâtica an srévv èter ch'i film in vatta ai UFO e con tótt chi efèt spezièl par atirèr äli persåni al zînema. Mo a mé an m frêghen brîṡa! Mé a aspèt ch'i film i vénnen in televiṡiån.
Mé a sån cunvént ch'ai é bèle stè tanti incånter ravviśinè. I extraterèster an én brîṡa catîv, o almänc, an én brîṡa cativéssum, mo i psrévnen dventèrel da un mumänt a l'èter. S'i fóssen cativéssum i s avrévnen bèle destrótt, quasst l'é åvi. Invêzi i s contrålen, par vàdder cme a s cumpurtän, parché par låur a sän impurtànt, anc s'an sò brîṡa parché. I psrévnen èseregh anc extraterèster travesté da èser umàn. I extraterèster i pålen fèr tótt, dåpotótt i én marziàn! Mé a crädd ch'biṡåggna stèr atänt a chi ch'i parlen ed sti cås faṡänd tanta confuṡiån. Ai é i UFOLÒGH sêri, ch'i van rispetè, e ai mancarévv! Mo dåp ai é chi cme chal tîp ch'a sån mé quand a al sån (scuṡè s'an sån brîṡa cièr), ch'i dîṡen acsé tanti parål ch'an vålen dîr un bèl gnínt, e ch'i servéssen såul a convénzer nuèter tótt ch'låur i n san pió ed nuèter! Mo mé an m fâg brîṡa freghèr! S'sti bî tîp i an avó quèlch incånter ravviśinè, anc dal têrz tîp, i al an da dîr ciaramänt e magâri fèr vàdder anc quèlch fotografî o méi al srévv una videocaséta. S'an l an brîṡa avó alåra ch'i s in stan zétt parché csa vålen savairen pió ed chi èter ch'magâri quèlch incånter ravviśinè i l an anc avó, discretamänt. A spêr ch'a sån stè cièr.
Csa vålen spieghèr a mé csa l'é la fantasiénza?!!! A al sò benéssum!! A i ò la videocaséta ed Guerre Stellari e a i ò vést anc tótt i film ch'i én gnó dåp. A i ò vést anc i film pió brótt, cme Blade Runner, ch'difâti an m é piaṡó parché an é brîṡa possébbil ch'al marziàn al s vgnéppa a fèr la morèl e ala fén al âbia ancåura ragiån ló anc s'giustamänt al môr.
Mé a crädd ch'in futûr la fantasiénza la à da par fôrza dventèr pió impurtànt, parché con i modêren computer as på fèr sänper pió efèt spezièl, e quand ai srà un incånter ravviśinè ufizièl quasst ai farà anc un mócc' ed publizitè (ala fantasiénza). Par quant la dventarà impurtànt, la fantasiénza la srà però sänper una conseguänza dl'UFOLOGÎ, ed quasst a n sån sicûr. Dåp såver tótt adès ch'i an fât tótt sti modêren telescòpi potentéssum con i quèl as psrà ed sicûr vàdder i désch volànt anc bän pió da luntàn e ingrandé.
Mé dåp a i ò anc una teorî personèl, ch'an dâg a inción mo a té ch't î al Maurizio Costanzo Show a pås dîrla. Ai é un mócc' ed persåni famåuṡi ch'probâbilmänt äli én di extraterèster travesté, opûr äli én in contât con låur. An vói dîr i nómm, s'nå i s adàn ch'a i ò scupêrt e cme al sòlit i m soprémmen. S't am invît ala tå trasmisiån a t spiêg tótt i particolèr, mo t è da promåtterum ed brîṡa invitèr anc cl'ètra persåna ch'ai é anc dänter ed mé e ch'la s crädd acsé inteligänt såul parché al l é, parché s'al vén anc ló dåp in vatta al pió bèl, quand a i ò da parlèr mé, al m scâza dala gvîda dal zarvèl e al s métt a dîr tótti äli minción'nè ch'al dîṡ sänper par cunfånder äli persåni pió sänzi cme mé, e acsé al finéss ch't am è invitè par gnínt.
Mé a i udî chi ch'i fan i superiåur lżänd i lébber ed fantasiénza! An s adàn brîṡa ch'i én ridécol? Tótti äli persåni normèl la fantasiénza äli la guèrden giustamänt såul al zînema o in tivó, e s'dabån i s apasiånen i dvänten UFOLÒGH. Int i lébber an ai é ed sicûr gnínt ed pió che al zînema: int i lébber ai é såul äli parål, mo quassti ai én anc al zînema o in tivó, difâti i personâg̈ i parlen, nå? Mo al zînema e in tivó ai é anc äli imâgini, l'aziån, al sån stêreo e in zêrti sèl anc al sorround o cme diàvel as ciâma. E dåp i lébber i én un'invenziån ed quand an ai êra brîṡa la televiṡiån. S'ai fóss stè la televiṡiån, i lébber an i avrévnen brîṡa inventè ed sicûr, quasst l'é sicûr! E al zînema e la tivó i l an inventè pròpri parché i lébber i êren tröp noiåuṡ. E dåp i s an insgnè ch'biṡåggna vîver con la democrazî, ch'la vål dîr ch'la magioranza la gh à sänper ragiån. E alåra mé a sfîd sti preṡuntuåuṡ, cme chal sapientån ch'anc ai é da quèlch pèrt dänter ed mé, a dîr ch'la magioranza la preferéss i lébber al zînema e ala tivó! La magioranza i lébber i äli mazarévv sóbbit, quassta l'é la veritè, e l'é dabån antidemocrâtich ch'an s provéda a avairel bèle fât da tänp!
Såver tótt con i lébber ed fantasiénza al divâri l'é terébbil. I efèt spezièl, cuntè in vatta al lîber, sänza figûr, i m fan såul tantéssima pêna. Par furtóna an ò mâi lèt sti lébber, mo a m imâgin che la descriziån a parål di efèt spezièl la séppa la cåsa pió stópida ch'a m rîṡ a imaginèr. E s'da un lîber ed fantasiénza a i câv la descriziån di efèt spezièl, csa ai arèsta?

Roberto Quaglia