ò lézûo e lettie preçedénti scrîte da-o mæ alter ego (se dîxe coscì?), diretaménte méntre o ê scrivéiva, dæto che esséndo mì inta seu tésta a seu mâgrado podéiva beníscimo sbexegâ, atravèrso i éuggi ch'émmo in multipropietæ, e paròlle into moménto esatíscimo ch'o ê scrivéiva veramente.
Mì ghe créddo beníscimo ch'i UFO existan. Se no existan, perché gh'é a paròlla pe ciamâli? Tûtte e cöse ch'gh'é a paròlla dêvan existe pe fòrsa perché sednò o no l'à nisciùn sénso ch'gh'é a paròlla. Se mì dîggo ch'gh'é o tramónto, ô pòsso dî sôlo perché ò vìsto ch'gh'é pe davéi. I âtri me capìscian sôlo perché ascì lô sàn cöse o l'é o tramónto. Tûtti savémmo cöse són i UFO, alôa o l'é automàtico ch'sti chì existan automaticaménte pe fòrsa pe davéi sénsa dùbbio.
Alôa no capìsço perché quéll'âtra persónna che mì ascì són o l'à dîto inte scòrse lettie coscì tànte cöse ch'no stàn né in çê né in tæra e coscì no pêuan èse nisciùn UFO (bèllo zêugo de paròlle, vêo? eh!).
A veitæ a l'é ch'i marziàn ghe són, da quàrche pàrte, ma no són chì, perché s'e fîsan chì no saiéivan marziàn, cómme o ne dîxe a lògica. E i UFO són naturalménte i dìschi volànti, cómme ciascedùn o l'à posciûo notâ quànde són comparsci chì e là. E i UFO són ciénn-i de marziàn, ma ghe ne stàn tànti perché són pìcin.
Alôa no capìsço cöse gh'é coscì tànto da dî in sce sta fantasciénsa, che dòppo in pràtica a no saiéiva âtro che i film in sci UFO e con tûtti quélli efètti speciâli pe atiâ e persónne a-o çìnema. Ma a mì no me frégan! Mì aspêto ch'i film vêgnan in televixón.
Mì són convìnto ch'ghe són za stæti tànti incóntri ravixinæ. I extraterèstri no són cativi, ò a-o mànco, no són cativíscimi, ma poriéivan deventâlo da 'n moménto a l'âtro. S'e fîsan cativíscimi ne l'aviéivan za destrûti, questo o l'é óvvio. Inveçe ne contròllan, pe védde cómme se conportémmo, perché pe lô sémmo inpurtànti, ànche se no sò perché. Poriéivan ésighe ascì extraterèstri travestîi da èsi umàn. I extraterèstri pêuan fâ tûtto, dòppotùtto són marziàn! Mì créddo ch'bézeugna stâ aténti a quélli ch'pàrlan de ste cöse fâzéndo tànta confuxón. Ghe són i UFOLOGI sêri, ch'vàn rispetæ, e ghe mancherîa! Ma dòppo ghe són quélli cómme quéllo tîpo che mì són quànde ô són (scuzæ se no són ciæo), ch'dîxan coscì tànte paròlle ch'no vêuan dî 'n bèllo ninte, e ch'sèrvan sôlo a convìnçe niâtri tûtti ch'lô ne sàn ciù de niâtri! Ma mì no me fàsso fregâ! Se sti bèi tîpi àn avûo quàrche incóntro ravixinòu, ascì do tèrso tîpo, ô dêvan dî ciaraménte e fòrsci fâ védde ascì quàrche fotografîa ò mêgio o saiéiva 'na videocassétta. Se no l'àn avûo alôa ch'se ne stàn cìtti perché cöse vêuan savéine ciù di âtri ch'fòrsci quàrche incóntro ravixinòu ô l'àn ascì avûo, discretaménte. Spêro ch'són stæto ciæo.
Cöse vêuan spiegâ a mì cöse a l'é a fantasciénsa?!!! Ô sò beníscimo!! Gh'ò a videocassétta de Guerre Stellari e ò vìsto ascì tûtti i film ch'són vegnûi dòppo. Ò vìsto ascì i film ciù brùtti, cómme Blade Runner, ch'defæti no m'é piaxûo perché no l'é poscìbile ch'o marziàn o ne vêgne a fâ a morâle e a-a fìn o l'àbbie ancón raxón lê ànche s'o giustaménte o mêue.
Mì créddo ch'in futûro a fantasciénsa a dêve pe fòrsa deventâ ciù inpurtànte, perché co-i modèrni computer ghe pêuan fâ sénpre ciù efètti speciâli, e quànde ghe saiâ 'n incóntro ravixinòu ufiçiâle questo ghe faiâ ascì 'na mûggia de publiçitæ (a-a fantasciénsa). Pe quànto a deventerâ inpurtànte, a fantasciénsa a saiâ però sénpre 'na consegoénsa de l'UFOLOGIA, de questo ne són segûo. Dòppo sorviatùtto òua ch'àn fæto tûtti sti modèrni telescòpi potentíscimi co-i quæ se porrâ de seguo védde i dìschi volànti ascì tànto ciù da lontàn e ingrandîi.
Mì dòppo gh'ò ascì 'na teorîa personâle, ch'no dîggo a nisciùn ma a tì ch'ti t'ê o Maurizio Costanzo Show pòsso dîla. Ghe són 'na mûggia de persónne famôze ch'probabilménte són di extraterèstri travestîi, ò pûre són in contàtto con lô. No vêuggio dî i nómmi, sednò se acòrzan ch'ê ò descovèrti e cómme a-o sòlito me sopprìman. Se ti m'invîti a-a teu trasmiscion te spiêgo tûtti i particolâri, ma ti devi promettîme de no invitâ ascì quéll'âtra persónna ch'gh'é ascì drénto de mì e ch'a se crédde coscì inteligénte sôlo perché a ô l'é, perché s'o vêgne ascì lê dòppo in sciô ciù bèllo, quànde devo parlâ mì, o me scàccia da-a goîda do çervèllo e o se métte a dî tûtte e belinæ ch'o dîxe sénpre pe confónde e persónne ciù sénplici cómme mì, e coscì finìsce ch'tì ti m'æ invitòu pe ninte.
Mì ê òddio quélli ch'fàn i superiôri lezéndo i lìbbri de fantasciénsa! No se acòrzan ch'són ridìcoli? Tûtte e persónne normâli a fantasciénsa a â goàrdan giustaménte sôlo a-o çìnema ò in tivù, e se pe davéi se apascionan devéntan UFOLOGI. Inti lìbbri no gh'é de seguo ninte de ciù che a-o çìnema: inti lìbbri ghe són sôlo e paròlle, ma ste chì ghe són ascì a-o çìnema ò in tivù, defæti i persongi pàrlan, no? Ma a-o çìnema e in tivù ghe són ascì e imàgine, l'açión, o seunno stêreo e in çèrte sâle ascì o sorround ò cómme diâo o se ciàmma. E dòppo i lìbbri són 'na invençión de quànde no gh'êa a televixón. Se ghe fîse stæta a televixón, i lìbbri no ê aviéivan inventæ de çèrto, questo o l'é segûo! E o çìnema e a tivù ê l'àn inventæ pròpio perché i lìbbri êan tròppo noiôxi. E dòppo ne l'àn insegnòu ch'bézeugna vîve co-a democrazîa, ch'a vêu dî ch'a magiorànsa a l'à sénpre raxón. E alôa mì sfîddo sti prezuntuôxi, cómme quéllo sapientón ch'ascì gh'é da quàrche pàrte drénto de mì, a dî ch'a magiorànsa a preferìsce i lìbbri a-o çìnema e a-a tivù! A magiorànsa i lìbbri ê massereîa sùbito, questa a l'é a veitæ, e o l'é pe davéi antidemocràtico ch'no se provvéde a avéilo za fæto da ténpo!
Sorviatùtto co-i lìbbri de fantasciénsa o divârio o l'é terìbile. I efètti speciâli, contæ in sciô lìbbro, sénsa figûe, me fàn sôlo tantíscima pénn-a. Pe fortùnn-a no ò mâi lézûo sti lìbbri, ma me imàgino ch'a descriçión a paròlle di efètti speciâli a segge a cösa ciù stùpida che me reûsço a imaginâ. E se da 'n lìbbro de fantasciénsa ghe câvi a descriçión di efètti speciâli, cöse ghe rèsta?

Roberto Quaglia